Go sepela le Modimo – Letšatši la 1
Go sepela le Modimo: ka moka re bohlokwa go Modimo
(Di)temana ya Bibele
Pesalome 8
Ge ke lebelela leratadima, mošomo wa diatla tša gago, ngwedi le dinaledi tše o di beilego madulong, ke re motho ke eng ge o bile o mo gopola, motho wa lešidi ge o mmabalela? Eupša o mo hlaeditše gannyane a se lekane le wena; o mo godišitše ka letago le tlhompho. Pesalome 8:3-5
Bibele e tletše ka maitemogelo a mantši le Modimo ka batho ba go swana le nna le wena: ba bangwe ba šegofaditšwe kudu go sa šetšwe maemo a bona a šiišago, ba bangwe ba ikhweletša pefelo ya gagwe le kahlolo ka lebaka la borabele, bošilo le boikgogomošo. Ge re phetla matlakala a Bibele, go a kgahliša go nwelela ka gare go terama ya “go ba motho” ye e diregago. Go tloga mathomong, Modimo o bontšha gore o na le kgahlego e kgolo go tlholo ya gagwe, motho, gomme o nyaka go phela tswalanong le yena.
Re ka hwetša gore re ba bjalo ka ba bangwe ba batho ba re balago ka bona ka Bibeleng le go akanya gore go bile bjang go ba fao, eupša go ba bangwe ba rena, maitemogelo a bona a ka bonala e le nnete, bjalo ka Moshe yo sefahlego sa gagwe se phadimago morago ga go bolela le Modimo thabeng (Eksodose 34:29); Eliya yo a laetšego mollo go theoga legodimong (2 Dikgoši 1:12), yo ka morago a sa hwego ka gobane o tšere ke koloi ya mollo (2 Dikgoši 2:11); Jesaya yo “a bonego Morena a dutše setulong sa bogoši, se se phagamego kudu, gomme (a bona gore) morumo wa seaparo sa gagwe o tletše tempele” (Jesaya 6:1). Le ge batho ka dinako tše dingwe re ka se ba kwešiše, yo mongwe wa bona e ka ba e bile mogale wa rena goba mohlala wo mobotse.
Mohlomongwe, go bonolo go ba bjalo ka bao ba swanago le Jakobo, yo a katanego le Modimo (Genese 32:24-30) goba Petrose, yo a latotšego gore o tseba Jesu ge a be a boifa (Johanese 18:17), goba Maria yo a ikokobeditšego yo ka lethabo a tumišitšego Modimo ka, “Moyeng wa ka ke hlalalela Modimo, Mophološi wa ka …” (Lukase 1:46-47), go sa šetšwe tsebo ya gore ditaba tše botse tša morongwa di tla hlaloša gore o tla ima ngwana wa ka ntle ga lenyalo.
Modimo o re hlodile, le rena, go ba tswalanong le yena, eupša o boledišana le rena ka nako ye e fapanego historing gomme a ka bea ditlhohlo tše fapafapanego maphelong a rena. Phapano e nnoši magareng ga bona le rena ke nako le lefelo. Modimo ga a so fetoge goba lentšu la gagwe le merero ya gagwe go batho; “Jesu Kriste o a swana maabane le lehono le go ya go ile” (Baheberu 13:8).
Nakong ya kgwedi ye, re tla kopana le go tseba banna le basadi ba go fapafapana go tšwa Bibeleng, le go bona seabe sa Modimo maphelong a bona. Re ba lebelele ka mahlo a maswa; re hlohleletšwe le go tutuetšwa ke maitemogelo a bona le Modimo le go lebelela go yena go boitemogelo bja gago bjo boswa.
