Segwera – Letšatši la 16

Ke rata go hwetša batho ka Bibeleng bao ba dirago phapano. Prisila le Akhwila e be e le balekani bao ba bego ba šoma le go rera ebangedi mmogo. Paulose o kopane le bona ge a fihla Korinte gomme a hwetša gore ke bagwera ba nnete. Bjalo ka Paulose, le bona e be e le badiri ba ditente, ka gona Paulose a šoma le go dula le bona.

Paulose o be a sa tšwa go fihla go tšwa Athene moo a bego a le noši a letetše Silase le Timotheose, gomme a ferekane kudu ge a bona motse o tletše ka medingwana (Ditiro 17:16-32). Ke tšhogofatšo go hwetša bagwera le bašomi-gotee ba lerato le borutho kua Korinte! Ga go maketše gore boraro bja bona ba gwerane le semeetseng.

E be e se mošomo wa bodumedi, le ge go le bjalo, wo o tiišitšego tlamo ya bona – ke mošomo wo ba o diretšego Kriste mmogo. Kapejana, go bonala eka ba bile le mafolofolo bodireding bja Paulose. Bagwera ba ba bararo ba ikgafile ka mo go feletšego go aga kereke kua Korinte. Ge mafelelong a tloga Korinte go ya Siria, Prisila le Akhwila ba sepetše le yena. Mafelelong ba arogana, eupša segwera goba bodiredi bja bona bja se fele.

Ge Paulose a ngwalela Roma, o kgopela kereke ya Roma gore ba dumediše Prisila le Akhwila, le go phuthego ye e kopanago ntlong ya bona. Mmogo, sehlopha se sa monna le mosadi ba butše legae la bona go bana ba gabobona go Kriste – mohlala o mmotse wa kamogelabaeng ya Bakriste, segwera le setšhaba.

Segwera sa bona le Paulose se tšwetše pele bophelo bja Paulose ka moka. Pejana ga lehu la Paulose, o romela lengwalo le le kopana la tšhoganetšo go Timotheose. O na le nako e kopana, eupša o botša Timotheose go “Dumediša Prisila le Akhwila …” Mafelelong, o gopola bao a šomilego le go hlankela le bona, gomme o ba mogwera wa kgonthe.