Segwera – Letšatši la 15

O na le bagwera ba bakae? Ge e ba nomoro ya pele ye e tlago monaganong wa gago ke palo ya bagwera ba gago go Facebook, ke gore mohlomongwe o motho yo, bjalo ka nna, a agago le go tiiša segwera inthaneteng. Mehleng ye, ga go kgonege go bolela ka segwera ka ntle go bolela ka mekero ya poledišano inthaneteng. Re di bjang, bjalo ka Bakriste, segwera inthaneteng?

Ke therešo, gore Bibele ga e lebanye ka se se swanetšego goba se sa swanelago go pharwa mekerong ya poledišano inthaneteng, eupša go na le melawana ya segwera sa inthaneteng. Ge e le gabotse, Paulose, Petrose le Johanese ba ngwaletše Bakriste mangwalo, gantši ba be ba sa kopane. Mangwalo a be a balwa phatlalatša le go fetišetšwa dikerekeng tše dingwe. Naa se se kwala e le se se tlwaelegilego? Lehono, re ka bitša seo go bapatša inthaneteng.

Pitšo e bohlokwa go Bakriste ke go bontšha lerato, go gola leratong la Jesu Kriste le go bontšha mogau wa gagwe le nnete lefaseng. Poledišanong ya sefahlego le sefahlego, re leka go bontšha thekgo le tlhokomelo, ge re šoma ka thata go se bolele selo sa pele se se tšwago melomong ya rena, kudukudu dilo tša go hloka kwelobohloko goba go kweša bohloko. Go hloka gore re be le bohlale bjo bjalo inthaneteng! Ke tla ba wa pele go emiša letsogo le go dumela gore ke itlontlollotše phatlalatša dinakong tše ntši, ka lebaka la go thelela ga lleme la ka, dilo tša inthaneteng e ka ba tše mpe kudu. Go phara selo inthaneteng se go bonalago eka se lokile ka nako yeo gantši go bonala go sa loka letšatši le le latelago – morago ga ge batho ba bantši ba se bone. Go nna, go bile tshepetšo ya go ithuta le go gola go se nka se pharago inthaneteng, se nka bolelago ka sona go bagwera ka noši le seo ke sa swanelago go se bolela.

Facebook e ka ba sedirišwa se sebotse sa go aga le go godiša segwera, ge fela re gopola gore mantšu a na le maatla; e se fela mantšu a a boletšwego, eupša ditshwayotshwayo tšeo di thaepilwego ka potlako le tšeo di pharwago.