Segwera – Letšatši la 10

Tobo e go batametša go batho ba bangwe, eupša go bonala eke e hlola maboto magareng ga gago le batho ba bangwe. Go Puku ya Jobo, re kopana le monna yo a bego a humile gape e le leloko le le hlomphegaga la setšhaba, eupša ga bjale o lahlegetšwe ke tšohle – lehumo la gagwe, thoto ya gagwe, mosadi wa gagwe, bana ba gagwe le go pheleng gabotse mmeleng ga gagwe. Bagwera ba bararo ba a fihla, Elifase, Bildade le Tsofare, gomme ba leka go kwešiša gore ke ka lebaka la eng Jobo a hlagetše ke masetlapelo.

Matšatšing a mararo a latelago, re tla be re bolela ka banna ba ba bararo le ka fao ba ikarabetšego go Jobo nakong ya gagwe ya tlalelo e kgolo. A re thome ka Elifase.

Ge o nagana ka yona, Elifase o be a le boemong bjo thata. E bile wa mathomo go bolela le mogwera yo lefase la gagwe le welego, gomme a tlaišega kudu mmeleng le monaganong. O bolela bjang le motho yo bjalo? O tla re o kgopela tshwarelo? Seo se ka kwagala se tlwaelegile. Naa o bolela seo o nyakago go se bolela? Seo se ka kwagala se se na botho. Elifase o dira ka tsela ye kaone kudu yeo a ka kgonago; o ya go Jobo ka tsela ya bogwera.

Gomme o tšwela pele go botša Jobo gore go ya ka se yena, Elifase, a itemogetšego le go se bona bophelong, bao ba dirago tše di fošagetšego ba a tlaišega. O naganne gore ka ge Jobo a tlaišega, a ka be a dirile sebe gomme o laiwa ka lebaka la sebe seo. Elifase o naganne gore Jobo o be a swanetše go fetoša ka fao a naganago ka gona go dumelelana le se Modimo a se naganago gomme ka morago, Jobo o tla atlega gape. Le ge a be a sa tsebe gore ke ka lebaka la eng Jobo a be a tlaišega, Elifase o naganne gore o na le tharollo go mathata a mogwera wa gagwe. (E sa le ka ba boemong bjoo, wena?)

Tše dintši tša tše a di boletšego ke nnete. Modimo o laya badiradibe, eupša se e be e le selo se se fapanego; selo se Elifase a bego a sa se kwišiše.

O ikarabela bjang go tobo bophelong bja mogwera wa gago? Naa o akanya go ba le dikarabo ka moka go tšwa go maitemogelo a gago?