Etlang go nna – Letšatši la 9

Dilo ga di sepele gabotse go Kgoši ya Juda. Sa pele, go bile tlhaselo ya motse gomme ga bjale o botšwa gore o tlo hlokafala. Go Temana ka letšatši ya go feta, re bone ka fao a iphetoletšego go boemo bjo bo hlobaetšago bja sešole. Hiskia o be a hloka go rapela gomme ka gona, a phenkgoga a lebelela lebotong a lla. Re ka ithuta tše ntši go tsela ye kgoši a tlišitšego kgopelo ya gagwe ya moragorago go Modimo. E be e se thapelo ya boiketlo goba ya tlhompho. O phenkgišana le Modimo, dikeledi di elela marameng a gagwe, a tlaletšwe ka lebaka la bophelo bja gagwe.

Go rapela ke go bolela. Thapelo e ka ba go ipelaetša, go ngangišana, go nyama le go kgopela tebalelo. Modimo o tla theeletša selo le ge e le sefe se re hlokago go se bolela, go sa šetšwe gore re se bolela bjang. Ka Bibeleng ka moka, batho ba ngangišana le Modimo le go lla ka lebaka la bohloko. Ge re feditše go bolela, go lla, go ipelaetša le go bolela tše di lego dipelong tša rena, ka gona Modimo o thoma go re fodiša le go re homotša. Ka gare ga ditu le go lapa, ge go se na se sengwe se re ka se bolelago, re ka homola le go letela Modimo gore a arabe. A ka no se arabe ka tsela ye re nyakago ka gona goba re letetšego, eupša o tla araba. Re ka tshepha kholofetšo yeo.

Hiskia o be a na le pelo ya thapelo, pelo moo a bego a tla bolela sa mafahleng pele ga Modimo. Naa o na le pelo ya thapelo lehono?

MORENA o kwele thapelo ya Hiskia, o bone dikeledi tša gagwe gomme a araba. O fele Hiskia mengwaga ye mengwe gape ye 15 ya bophelo. Jesaya o laetše gore ba tšee phaphathi ya makwapi a mago ba gatiše sekaku sa kgoši Hiskia se se bego se mo lwatša wa go hwa, gomme Hiskia a se hlokafale, eupša a fola (Jesaya 38).