Etlang go nna – Letšatši la 7

Kgoši Ahase o a hlokafala gomme Kgoši Hiskia, yo a bego a rata Modimo wa nnete, ga bjale o dutše setulong sa bogoši sa Juda. Bothata ke gore, ka ge o gopola, Ahase o dirile kwano le Baasiria. Baasiria ba tšea sephetho sa gore ba ka se amogele fela tšhelete ya go loba ya Ahase – ba nyaka naga ya gagwe ka moka! Ga bjale, Hiskia o na le maatla a madira a Baasiria mojakong wa gagwe gomme molaodi wa madira o rapile kopano go boledišana ka go ineela ga Jerusalema. Molaodi yo wa madira o a emelela gomme o thoma go bolela le batho ba Jerusalema, ka Seheberu, go netefatša gore ba a kwešiša. Ge e le gabotse, o ba botša gore Hiskia a ka se ba phološe, Modimo a ka se ba phološe, gomme ba swanetše go ineela. O ba holofetša gore o tla ba swara gabotse ge ba ka dira bjalo.

Ga se tšhošetšo ya lefeela. Baasiria ba na le histori ya phenyo e kaonekaone. Hiskia o lahlegetšwe ke dintwa tša gagwe. Ga gona pelaelo ya gore Baasiria ba na le maatla a sešole go fenya Jerusalema, ka ge ba fentše ba bangwe ba bantši. Tše ke dinnete. Le ge go le bjalo, go na le nnete e tee e bohlokwa kudu ye molaodi yo wa madira a e hlokomologago – ba ke batho ba Modimo gomme Modimo o na le polelo go se sengwe le se sengwe se se diregago go bona.

Go diphetho tše re di dirago, re hloka gape go gopola gore re neetše maphelo a rena go Morena gomme, le ge re sa tsebe dinnete tše dingwe, yena o a di tseba. Ge ka nnete re nyaka go kwešiša, re swanetše go theeletša Morena ka kelohloko, go se ba ba lego kgauswi le rena ba se bolelago.