Etlang go nna – Letšatši la 14

Aowa, se ga se papatšo ya mošomo wa go botsofatša manala a maotong! Ge e le gabotse, ke akanya ka maoto a motseta ao Jesaya a a hlalošago gore a be a kgahliša. Jesaya o bona ka leihlo la kgopolo motse wo o dikaneditšwego, go letešwe fela lentšu go tšwa go motseta mabapi le dipoelo tša ntwa. Naa ke ditaba tše botse? Naa ba fentše – ba tla hlakodišwa? Naa ke ditaba tša gore ba tla fenywa? Gomme, tseleng ya go ya motseng, maoto a tšwelela. Gomme ge motseta a batamela, batho ba ba lebeletšego ba lemoga gore ga a kitime kudu go feta ge a bina. Ditaba tša motseta di phatlalatšwa motseng gomme maoto a motseta a tsebatšwa gore ke a mabotse.

Phenyo ya Babilonia ka Korese ke ditaba tše botse go mathopša a Juda, ka gobane go ra gore a lokolotšwe. Ditaba tše dibotse lehono ke gore Kriste o tlile gomme o re lokolotšwe ditlemong tša sebe le lehu. Paulose o tsopola Jesaya 52:7 go gatelela tema e kgethwa ya badumedi bao ba begago molaetša wa ebangedi. O ngwala gore, “Mang le mang yo a kgopelago Morena thušo o tla phološwa. Eupša ba ka mo kgopela thušo bjang ba se ba dumela go yena? Gomme ba ka dumela go yena bjang ba se ba kwa molaetša wa gagwe? Molaetša wa gagwe wona ba ka o kwa bjang ba sa o begelwe? Gomme molaetša o ka begwa bjang go se gwa rongwa batseta? Bjalo ka ge Mangwalo a Makgethwa a bolela a re: ‘Go botse bjang go bona batseta ba etla, ba re tlela le taba ye botse!’ ” (Baroma 10:13-15).

Bjalo ka Bakriste, re a bitšwa go ba le maoto a mabotse – go bega ditaba tše botse tša gore re lokolotšwe. Ga se mošomo wa go kgahliša gomme go na le kgonagalo ya gore o hwetše maphone, eupša re na le ditaba tše botse kudu le boikarabelo bja go ka di bega.