Etlang go nna – Letšatši la 13

Go kwešiša se se diregago temaneng ya lehono, re hloka go kwešiša se sengwe ka molao wa Majuda. Mo moprofeta o šomiša Molao wa Moshe, wo o amanago le tlhalo le tefelo ya lekgoba, bjalo ka papišo go bontšha gore Juda e arogane le Modimo gomme e bokgobeng ka lebaka la dibe tša yona.

Ge monna a hlala mosadi wa gagwe, o be a swanetše go mo nea lengwalo la tlhalo (Doiteronomio 24:1-4). Mo, go Jesaya, Modimo o bolela le Juda o re, “ga ke a go hlala semmušo”. O ra gore go bile le karogano ya nakwana magareng ga “monna le mosadi” ka lebaka la dibe tša Juda. Morena ga a na baadimiši, eupša o rekišitše “bana” ba gagwe ka lebaka la dibe tša bona. E bile ditiro tša bona, e se tša gagwe, tše di bakilego gore ba rekišetšwe bokgobeng Babilonia.

Re bala gape gore Morena o lekile go hlakodiša setšhaba sa gagwe, eupša ba se mo arabe. E bile Juda ye e lahlilego Morena, e se Morena yo a lahlilego Juda. Ge a etla go ba tšea, go ba hlakodiša, ga go yo a tlago go mo dumediša. Ba kgethile go se theeletše baprofeta ba ba ba boditšego gore bothopša bja bona kua Babilonia e be e le bja nakwana fela. Ba be ba sa nagane gore Morena o be a kgona go ba hlakodiša.

Ge re e ba le nako e ntši le Modimo, ga se gantši mo re dirago dikgetho tša sebe. Moragonyana go kgaolo ye re bala gore, “Morena, Mong wa bohle … Mosong wo mongwe le wo mongwe o dira gore ke hlwaye tsebe ke theeletše tše a nthutago tšona” (Jesaya 50:4). Beela ka thoko bonnyane metsotso e mehlano mosong wo mongwe le wo mongwe go bala Bibele le go theeletša go se Modimo a nyakago go go ruta sona.