E100 Letšatši 80 – Leeto la go ya Roma

₁Festose o rile go fihla seleteng seo sa mmušo wa gagwe, a dula Kesarea matšatši a mararo, a kgona a eya Jerusalema. ₂Baprista ba bagolo le baetapele ba Bajuda ba tla ba latofatša Paulose mo go yena. Ba rapela Festose ₃ba re a ba šetše a ba tlišetše Paulose Jerusalema; gape ba be ba lakana go mo lalela mo tseleng. ₄Festose a ba fetola ka go re: “Paulose o ka kgolegong Kesarea, gomme le nna ke tla tloga ke boela gona.” ₅A ba a re: “Baetapele ba lena a ba ye le nna ba fihle ba mo latofatše ge eba o na le molato.”

₆Festose a tšea matšatši a mangwe a e ka bago a seswai go iša go a lesome, a kgona a boela Kesarea. Ka le le latelago a dula setulong sa kahlolo, a laela gore Paulose a tlišwe. ₇Paulose o rile go tlišwa Bajuda ba go tšwa Jerusalema ba mmokanela, ba mo latofatša ka tše dintši tše dikgolo tše ba bego ba šitwa ke go tšweletša bohlatse bja tšona. ₈Paulose a iphetolela ka go re: “Ga se ka fošetša molao wa Bajuda goba Tempele goba Kesare.”

₉Fela Festose, ka ge a be a rata go ithatiša Bajuda, a botšiša Paulose a re: “Na o ka dumela go ya Jerusalema gore ke yo go sekiša gona ka taba tše?”

₁₀Paulose a re: “Mo ke eme kgorong ya Kesare ya kahlolo mo ke swanetšego go sekišwa gona. Bajuda ga se ka ba fošetša ka selo, bjalo ka ge le wena o tseba gabotse. ₁₁Ge nkabe ke na le molato mme ke dirile se se dirago gore ke swanele go bolawa, ke be nka se gane go bolawa. Fela ge eba tše ba ntatofatšago ka tšona ga se therešo, ga go yo a kago nkgafela bona. Ke nyaka go sekišwa ke Kesare.”

₁₂Ke moka Festose a re go boledišana le baeletši ba gagwe a re: “O nyakile go sekišwa ke Kesare, gomme o tla ya gona go Kesare.”

₁₃Ka morago ga matšatšinyana Kgoši Agripa le Bernise ba tla Kesarea go dumediša Festose. ₁₄Ge ba seno fetša matšatši moo, Festose a anegela kgoši taba ya Paulose a re: “Go na le monna yo mongwe mo yo Felikise a mo tlogetšego e le mogolegwa. ₁₅Mola ke le Jerusalema baprista ba bagolo ba Bajuda le bagolo ba setšhaba ba ile ba mo latofatša gomme ba nkgopela gore ke mmone molato. ₁₆Fela nna ka ba botša gore ga se mokgwa wa Baroma go ahlolela motho lehu a se a ka a fiwa sebaka sa go iphetolela pele ga ba ba mo latofatšago. ₁₇Ge ba fihla mo ka se diege, ka dula setulong sa kahlolo ka le le latelago ka laela gore monna yoo a tlišwe. ₁₈Balatofatši ba gagwe ba ema, fela ba se ntšhe taba le e tee ye mpe ya tše nna ke bego ke gopotše gore ba tla di bolela. ₁₉Se ba se bolelago ya dio ba kgang ya bona le yena ka tša tumelo ya bona, le ka monna yo mongwe yo a hwilego yo ba rego ke Jesu, yo Paulose yena a rego o a phela. ₂₀Nna, ka ge ditaba tše di be di ntladitše dimpa, ka botšišiša Paulose ge eba a ka dumela go ya Jerusalema go sekišwa gona mabapi le ditatofatšo tšeo. ₂₁Eupša Paulose a nyaka go sekišwa ke Kesare. A kganyoga go bewa ka kgolegong ge a sa letetše tsheko. Ka gona nna ka laela gore a dule a letilwe go fihlela ge a tlilo išwa go Kesare.”

₂₂Agripa a re go Festose: “Ke nyaka go ikwela monna yoo ka bonna.”

Festose a re: “O tla mo kwa gosasa.”

₂₃Ka le le latelago Agripa le Bernise ba tla ka mokgabo le botšhepi bja bogoši, ba tsena ka ntlong ya lekgotla ba na le bagolo ba madira le baetapele ba motse. Festose a laela gore Paulose a tlišwe, mme a tlišwa. ₂₄Festose a re: “Kgoši Agripa le lena ka moka le nago le rena mo: Monna yo le mmonago yo ke yena yo Bajuda ka moka ba llago ka yena mo go nna kua Jerusalema le gona mo, ba goa ba re ga a sa swanela go phela. ₂₅Eupša nna ga se ka hwetša a dirile selo se se dirago gore a swanele go bolawa. Gomme ka ge le yena mong a nyakile go sekišwa ke Kesare, ke phethile ka go re ke tla mo romela gona. ₂₆Fela ga ke na taba ye e lego yonayona ye nkago e ngwalela morena ka yena. Ka gona ke mo tlišitše mo go lena, gagolo go wena, Kgoši Agripa, gore ge go seno nyakišišwa, ke be le se nkago se ngwala. ₂₇Gobane nna ke bona e se tshwanelo go romela mogolegwa felo ke sa bontšhe molato wa gagwe gabotse.”

₁Agripa a re go Paulose: “O dumeletšwe go ipolelela.” Paulose a bontšha ka seatla gore o nyaka go bolela, mme a iphetolela ka go re:

₂“Kgoši Agripa, ke bona ke na le mahlatse ge lehono ke tlilo iphetolela mo pele ga gago ditabeng tšohle tše Bajuda ba ntatofatšago ka tšona, ₃gagolo ka ge mekgwa ya Bajuda le dikgang tša bona wena o di tseba gabotse. Ka gona ke kgopela gore o ntheeletše o sa mphelele pelo.

₄“Tša bophelo bja ka go tloga bjaneng ka mo ke phetšego ka gona go tloga mathomong mo setšhabeng sa gešo le kua Jerusalema Bajuda ka moka ba a di tseba. ₅Ke bona ba ntsebago go tloga mathomong, gomme ge ba rata ba ka hlatsela gore go tloga le go tloga ke be ke ntše ke phela ke le wa lekgotla la Bafarisei, e lego lona le le nago le melao ye methata kudu go feta ohle mo sedumeding sa gaborena. ₆Gomme bjale ke emišitšwe mo ka lebaka la ge ke holofela gore Modimo o tla phetha se a se tshepišitšego borakgolokhukhu ba rena, ₇sona se dikgoro tše lesome le tše pedi tša gaborena di holofetšego go se amogela ge di ntše di khunamela Modimo bošego le mosegare. Ke ka lebaka la yona kholofelo ye, mong wa ka, ge ke latofatšwa ke Bajuda. ₈Lena Bajuda, le reng le bona e le taba ye e sa kgodišego gore Modimo o tsoša bahu?

₉“Ge e le nna ke be ke bona ke swanetše go lwantšha taba ya Jesu wa Nasaretha ka mo nka kgonago ka gona. ₁₀Ke sona se ke bego ke se dira kua Jerusalema. Ke be ke filwe maatla ke baprista ba bagolo go tswalelela badumedi ba bantši ba Modimo ka kgolegong; le mola ba ahlolelwa lehu le nna ke be ke ba tšwa. ₁₁E bile makgathe a mantši ke laela gore ba otlwe ka disinagogeng, e le go ba gapeletša gore ba kgeloge. Ke be ke ba galefela ke bile ke ba hlomara le metseng e šele.”

₁₂“Ke sona se ke bego ke se etše Damaskose ke filwe ke baprista ba bagolo maatla le ditaelo. ₁₃Ya re ge ke le tseleng mosegare wo mogolo, mong wa ka, ka bona seetša se se tagago go feta letšatši se etšwa legodimong sa re gadimela ka mathoko ohle, nna le banna ba ba bego ba sepela le nna. ₁₄Ka moka ra wela fase, gomme nna ka kwa lentšu le mpotšiša ka Seheberu le re: ‘Saulo, Saulo! O ntlhomaretšeng? Gape go nkgwabela ga gago ke go ikgobatša.’ ₁₅Nna ka botšiša ka re: ‘Ke wena mang, Morena?’ Gomme Morena a mphetola a re: ‘Ke nna Jesu yo o mo hlomerego. ₁₆Fela emelela. Ke itšweleditše mo go wena gore ke go bee mohlanka wa ka le hlatse ya ditaba tša ka tše o di bonego le ya tše ke sa tlilogo go bontšha tšona. ₁₇Ke tla go hlakodiša go setšhaba sa geno le go baditšhaba ba ke go romago go bona. ₁₈O swanetše go ba foufolla, gore ba tšwe leswiswing ba ye seetšeng, ba tšwe maatleng a Sathane ba ye go Modimo, gore ka go dumela go nna ba swarelwe dibe tša bona, gomme ba fiwe bohwa bja ba ba kgethilwego ke Modimo.’ ”

₁₉“Ka gona, Kgoši Agripa, nna ga se ka nyatša pono ya se ke se bonego se etšwa legodimong. ₂₀Ke thomile ka go begela ba Damaskose le ba Jerusalema, ka kgona ke begela bohle ba Judea le baditšhaba gore ba itsholele dibe tša bona, ba sokologele go Modimo mme ba dire tše di bontšhago boitsholo. ₂₁Ke yona taba ye e dirilego gore Bajuda ba ntshware mola ke le ka Tempeleng, ba leke go mpolaya. ₂₂Fela ke ka lebaka la ge ke thušitšwe ke Modimo go fihlela le lehono le ge ke eme mo ke hlatselela ba bagolo le bathofela, ke bolela fela tše baprofeta le Moshe ba rilego di tla direga, ₂₃e lego gore Kriste o tla tlaišwa, a tla a ba wa mathomo wa go tsoga bahung, a begela Bajuda le baditšhaba seetša sa phologo.”

₂₄E rile ge Paulose a iphetolela ka mokgwa woo, Festose a mo kgadimola, a re: “O a gafa, Paulose! O gafišwa ke go rutega kudu mo ga gago!”

₂₅Paulose a mo fetola a re: “Ga ke gafe, mohlomphegi Festose. Tše ke di bolelago ke nnete mme di a kwala. ₂₆Gape kgoši ditaba tše o a di tseba, gomme ke bolela ka tšona go yena ke sa šie, gobane ga ke dumele gore go na le ye e mo širetšego, ka ge di se tša direga mo di sa bonwego. ₂₇Kgoši Agripa, na baprofeta o a ba dumela? Fela ke a tseba gore o a ba dumela.”

₂₈Agripa a re go Paulose: “Etse o hloma nke o ka ntira Mokriste ka nakonyana.”

₂₉Paulose a mo fetola a re: “Ana ke ka nakonyana ana ke ka nako, nna se ke se rapelago ke gore e se be wena fela wa go ba se ke lego sona ntle le diketane tše, eupša e be le bohle ba ba ntheeleditšego lehono.”

₃₀Ke moka kgoši le mmušiši le Bernise le ba bangwe ka moka ba emelela, ₃₁ba re go tšwa ba botšana seng ba re: “Gape motho yo ga go se a se dirilego se se dirago gore a lebanwe ke go bolawa goba go golegwa.” ₃₂Agripa a re go Festose: “Motho yo a ka be a lokolotšwe ge a ka be a se a nyaka go sekišwa ke Kesare.”

₁Ge go šetše go kwanwe gore re išwe Italia ka leselawatle, ba gafela Paulose le bagolegwa ba bangwe go Juliose, yo e bego e le ralekgolo wa sekgao sa madira sa kgošikgolo. ₂Ra namela leselawatle la go tšwa Adramitiomo le eya maemakepeng a naga ya Asia, gomme ra tloga. Aristargose wa go tšwa Matsedonia motseng wa Thesalonika o be a na le rena. ₃Ka tšatši le le latelago ra fihla Sidone. Juliose o be a swere Paulose gabotse, gomme a mo dumelela go yo bona bagwera ba gagwe, le go fiwa tše a di hlokago. ₄Go tloga moo ra šika le sehlakahlaka sa Saeprose ka thoko ye go sa fokelego phefo ka ge re be re lebane le yona. ₅Ra re go tshela lewatle kwa Tsilitsia le Pamfilia ra yo fihla Mira kwa Lisia. ₆Gona motseng woo ralekgolo a hwetša leselawatle le le tšwago Aleksandria le eya Italia, gomme a re nametša lona.

₇Ra sepela ka go nanya matšatši a mantši, ra ba ra fihla go lebana le motse wa Kenidose ka bothata. Ka ge phefo e be e sa re dumelele go fetela pele, ra tla sehlakahlaka sa Kreta ka thoko ye go sa fokelego phefo, ra lebana le Salmone. ₈Ra ipata le lebopo re sepela ka bothata, ra ba ra fihla felo mo ba rego ke Maemakepe a Mabotse, kgauswi le motse wa Lasea.

₉Ra tšea nako ye telele moo gomme go tšwela pele ka leeto leo la lewatle gwa ba gwa šiiša, ka ge Letšatši la go itima Dijo e be e le šetše le fetile. Ke mo Paulose a ba eleditšego a re: ₁₀“Banna, ke a bona gore go tloga fa leeto la rena e tla ba la kotsi; e sego fela ya go loba kudu diphahla le leselawatle, eupša le bona batho.” ₁₁Fela ralekgolo o be a kgolwa se se bolelwago ke molaolaleselawatle le mongleselawatle, e sego se se bolelwago ke Paulose. ₁₂Ka ge boemakepe bjoo e be e se bjo bo loketšego go dulwa marega, bontši bja bona bja kwana le gore ba tloge, mme ge go kgonega ba leke go yo fihla Fenikise gore ba dike ba le moo marega. Fenikise ke boemakepe bja sehlakahlaka sa Kreta bjo bo lebeletšego borwabodikela le leboabodikela.

₁₃E rile ge phefo ya borwa e thoma go foka bosele, ba gopola gore ba tla kgona go phetha se ba ikemišeditšego sona; ka gona ba tloga ba ipata le sehlakahlaka sa Kreta. ₁₄Ya re go se gwa ya kae gwa tsoga ledimo le ba rego ke “Letsotabohlabela” la tšubotla le etšwa sehlakahlakeng. ₁₅La fefeutla leselawatle, ra ba ra palelwa ke go le lebanya le lona, gomme ra ineela ra le lesa le laolwa ke ledimo. ₁₆Ra re go fetela ka borwa bja sehlakahlaka sa Kauda ra hwetša boširelo. Gona moo ra swara bothata pele re ka kgona go bofa leselawatlana. ₁₇Ba le gogela ka leselawatleng mme ba kgoka leselawatle ka fase ka dithapo, ba le tsirimetša. Ka go šia gore re ka no fefeutlelwa ke ledimo dithotobolong tša mohlaba lebopong la Libia, ba phutha diseila tša leselawatle gomme ba dio kgorometšwa ke ledimo. ₁₈Ka ge re letše re fefeutlwa ke ledimo bjalo, ka le le latelago ba tsoga ba fokotša morwalo ka go o lahlela ka lewatleng; ₁₉ka la go latela leo ba lahlela ka diatla ditlabakelo tša go sepetša leselawatle lewatleng. ₂₀Ra tšea matšatši a mantši re sa bone letšatši goba dinaledi, ledimo lona le le gare le gaketše, ra ba ra itlhoboga.

₂₁Ya re ge go fetile nako ye telele go sa lewe, Paulose a ema mo gare ga bona a re: “Banna, ge le ka be le ile la ntheeletša la se tloge kua Kreta, re ka be re se ra senyegelwa goba ra loba ka mokgwa wo. ₂₂Fela bjale ke a le kgopela, ke re tiang maatla. Ga go le o tee wa rena yo a tlago hwa, ke leselawatle fela le re tlago le loba. ₂₃Gobane bošego ke letše ke tletšwe ke morongwa wa Modimo, yena Modimo yo ke lego wa gagwe, yo ke mo rapelago, ₂₄mme a re go nna: ‘Paulose, o se ke wa boifa. O swanetše go yo ema pele ga Kesare. Gomme Modimo ka botho bja gagwe mo go wena o tla phološa bohle ba ba sepelago le wena ka leselawatle le.’ ₂₅Ka gona, banna, tiang maatla. Gape nna ke tshepile Modimo gore go tla ba bjalo ka ge ke boditšwe. ₂₆Fela re tla fefeutlelwa sehlakahlakeng se sengwenyana.”

₂₇E rile bošegong bja lesome le metšo ye mene re ntše re fefeutlwa ke ledimo ka Lewatleng la Adria nakong ye e ka bago bošegogare, basepetšaleselawatle ba bona nke re batametše naga. ₂₈Ka gona ba ela go iša ga bodiba gomme ba hwetša e le dimetara tše masome a mane. Ge re fihla pejana, ba ela gape gomme ba hwetša e le dimetara tše masome a mararo. ₂₉Ka ge ba be ba boifa gore leselawatle le le ka no gohlomela ka gare ga maswika, ba le emiša ka go theoša dikgwega tša lona tše nne tša ka morago, mme ba dula ba fela pelo ya gore bo sa neng. ₃₀Basepetšaleselawatle ba leka go tšhaba; ba theošetša leselawatlana ka meetseng ba itira tše nkego ba yo theoša dikgwega tša ka pele ga leselawatle. ₃₁Paulose a botša ralekgolo le bahlabani a re: “Ge basepetšaleselawatle bao ba sa dule ka mo leselawatleng le ka se phologe.” ₃₂Ka gona bahlabani ba ripa dithapo tša leselawatlana, ba le lesa la tšewa ke meetse.

₃₃E rile ge go esa Paulose a kgothaletša bohle gore ba je a re go bona: “Lehono e šetše e le letšatši la lesome le metšo ye mene le ehlwa ka tlala le lakaletše – le sa je selo. ₃₄Hle, ke a le kgothatša, ejang gore le phologe. Ga go le o tee wa lena yo a tlago loba ešita le ntshana ya moriri.” ₃₅Ge a seno realo, a tšea senkgwa, a leboga Modimo a lebeletšwe ke bohle, a se ngwathaganya, a thoma go ja. ₃₆Bohle ba tia maatla gomme le bona ba ja. ₃₇Ka moka ga rena ka moo leselawatleng re be re le batho ba makgolo a mabedi le masome a a šupago le ba ba selelago. ₃₈Ge ba lle ba khoše, ba imolla leselawatle ka go tšhollela mabele a bona ka lewatleng.

₃₉Ge go sele ba se tsebe gore naga yela ba lebanego nayo yela ke efe, fela sekhutlo sa lewatle se se nago le leši sona ba se bona, gomme ba ipotša gore ke mo ba tlago iša leselawatle gona, ge ba ka kgona. ₄₀Ba ripa dikgwega tša leselawatle dithapo, gomme ba di lesa tša sobelela ka lewatleng, ba bofolla le dithapo tše di swerego dilaodi. Ba phurolla seila ya ka pele gore leselawatle le kgoromeletšwe pele ke phefo mme ra leba lešing. ₄₁Eupša leselawatle la thula ntotoma ya lešabašaba la itsemelela. La tanywa ka hlogo mme la palelwa ke go šutha, marago a lona ona a phatlologanywa ke maatla a maphoto.

₄₂Bahlabani ba lakana go bolaya bagolegwa ka moka, gore ba se kgone go rutha ba tšhaba. ₄₃Fela ralekgolo, ka ge a be a rata go hlakodiša Paulose, a ba ganetša. A laela gore ba ba kgonago go rutha ba itahlele pele ka meetseng, ba ruthele lešing; ₄₄ba bangwe ba latele ba itshwareletše ka dikota le ka dilo tše dingwe tše di robegilego leselawatleng. Ke ka mo bohle ba ilego ba phologa, ra fihla lešing.

₁Ge re seno phologela kua lebopong, ra kwa gore sehlakahlaka seo ba re ke Maltha. ₂Batho ba gona ba re swara gabotse kudu. Ka ge pula e be e ena le gona go tonya, ba re goletša mollo bohle re amogetšwe. ₃Paulose ge a topeletše ngatana ya mathokgwa a re ke bešetša mollo, gwa tšwa noga e ekwa phišo ya mo loma seatla ya mo momela. ₄Batho ba gona ge ba e bona e lekeletše seatleng sa Paulose ba botšana ba re: “Ruri, motho yo ke mmolai. Fela le ge lewatleng a phologile, medimo yona e ka se mo lese a phela.” ₅Eupša Paulose a hlohlorela noga yeo mollong a se a gobala le ganyenyane. ₆Bona ba be ba lebeletše gore o tla ruruga goba a akgofa a wela fase a hwa. Eupša e rile ge e eba nako ye telele ba lebeletše mme ba sa bone se sebe se mo hlagela, ba hlanama ba re: “Ke modimo!”

₇Kgauswi le felo fao go be go na le mašemo a mookamedi wa sehlakahlaka seo yo leina la gagwe e bego e le Publiose. Yena a re amogela ka ga gagwe gomme a re thota matšatši a mararo re le baeng ba gagwe. ₈Tatagwe o be a le diphateng a swerwe ke letadi le tengkhwibidu. Paulose a ya ka phapošing ya gagwe, a fihla a mo rapelela, a mmea diatla, a mo fodiša. ₉O rile go mo fodiša bjalo, balwetši bohle ba sehlakahlaka seo ba tla, gomme Paulose a ba fodiša. ₁₀Ba re hlompha ka mekgwa ye mentši, gomme le mohla re tlogago ba re fa tše re tlago di nyaka leetong la rena.

₁₁Ge go seno feta dikgwedi tše tharo, ra tloga ka leselawatle la go tšwa Aleksandria le ba rego ke “Medimomafahla” le le bego le dikile marega moo sehlakahlakeng. ₁₂Ra re go fihla motseng wa Sirakuse ra dula gona matšatši a mararo. ₁₃Go tloga moo ra tšwela pele le leeto mme ra fihla motseng wa Regiomo. Ka le le latelago gwa tsoga phefo ya borwa, gomme ka morago ga matšatši a mabedi ra fihla motseng wa Puteoli. ₁₄Moo ra hwetša go na le badumedi, gomme ba re kgopela gore re dule nabo matšatši a a šupago, ya ba gona re yago Roma. ₁₅Badumedi ba kua Roma ba rile go kwa ka rena, ba tla ba re gahlanetša re sa le motseng wa Lebala la Apiose, bangwe ba tla ba re gahlanetša motseng wa Ntlotharo ya Baeti. Paulose ge a ba bona a leboga Modimo, a tia maatla.

₁₆Ge re seno fihla Roma Paulose o ile a dumelelwa go dula a nnoši a letilwe ke mohlabani.

₁₇Ka morago ga matšatši a mararo Paulose a rapa pitšo ya baetapele ba Bajuda ba felo fao. Ya re ge ba kgobokane a re go bona: “Banna ba gešo, le ge ke se ka dira selo se se senyeditšego setšhaba sa gaborena goba mekgwa ya borakgolokhukhu ba rena, ke golegilwe ke le kua Jerusalema gomme ka gafelwa Baroma. ₁₈Bona ge ba seno ntshekiša, ba rata go ntokolla, ka ge ba be ba sa hwetše se se dirago gore ke swanelwe ke go bolawa. ₁₉E rile ge Bajuda ba gana gore ke lokollwe, ka gapeletšega gore ke re ke nyaka go sekišwa ke Kesare, e se gore ke re ke na le taba ye ke nyakago go latofatša setšhaba sa gešo ka yona. ₂₀Taba ke yona yeo ye ke kgopetšego go bonana le lena le go bolela le lena ka yona. Gabotse ge ke kgokilwe ka diketane bjalo, ke ka lebaka la yena yo Baisraele ba mo holofetšego.”

₂₁Bona ba re go yena: “Ga se ra ka ra amogela mangwalo a go tšwa Judea a go re botša tša gago; le gona ga se gwa ka gwa tla motho wa ba gaborena a etšwe kua wa go re botša taba ka wena goba se sebe ka wena. ₂₂Fela re be re ka nyaka go kwa gore na wena o gopolang, gobane ge e le mokgatlo wo wa gago wa bakgelogi, wona re tseba ge batho mo gohle ba o bolela gampe.”

₂₃Ba mmeela letšatši, gomme mohlang woo batho ba bantši ba tla mo a bego a dula gona. Yena a ba hlalošetša molaetša wa gagwe mabapi le mmušo wa Modimo, a leka go ba kgodiša ditabeng tša Jesu ka go ba gopotša ka melao ya Moshe le mangwalo a baprofeta. ₂₄Ba bangwe ba bona ba dumela tše a di bolelago, fela ba bangwe ba se dumele. ₂₅Gomme ba phatlalala ba sa dumelelane, e le ge Paulose a ba boditše a re: “Kganthe Moya wo Mokgethwa o boditše borakgolokhukhu ba lena gabotse ka moprofeta Jesaya ₂₆mola a re:

₂₈Paulose a feleletša ka go re: “Bjale ge, tsebang gore molaetša wa Modimo wa phološo o rometšwe baditšhaba. Bona ba tla o theeletša.”

₃₀Paulose a fetša mengwaga ye mebedi ya go tlala a dula ka ntlong ye a e adimilego, moo a bego a amogela bohle ba ba tlago go yena. ₃₁A ba begela tša mmušo wa Modimo, a ba ruta tša Morena Jesu Kriste, a bolela ka go se boife a sa iletšwe.