E100 Letšatši 79 – Maeto a Mangwe a Sedumedi

₁Paulose a fetela Derbe le Listra, mo go bego go dula modumedi yo mongwe yo ba rego ke Timotheose. Mmagwe, yo le yena e bego e le modumedi, e be e le Mojuda, tatagwe yena e le Mogerike. ₂Badumedi ba Listra le ba Ikoniomo ba be ba bolela gabotse ka Timotheose. ₃Paulose o be a nyaka go tloga le Timotheose, ka gona a mmolotša. Seo a se dira ka lebaka la Bajuda bao ba bego ba dula mafelong ao, ka ge bohle ba be ba tseba gore tatagoTimotheose ke Mogerike. ₄Ge ba thetha le metse ba be ba efa badumedi melao ye e beilwego ke baapostola le bagolo ba phuthego kua Jerusalema, gomme ba ba laya gore ba e phethe. ₅Ka mokgwa woo diphuthego tša fela di tia tumelong di bile di oketšega ka mehla.

₆Ba ile ba putla naga ya Frigia le ya Galatia ka gobane Moya wo Mokgethwa o be o se wa ba dumelela go bega lentšu la Modimo nageng ya Asia. ₇Ge ba fihla mollwaneng wa Misia ba leka go selela ka nageng ya Bithinia, fela Moya wa Jesu wa se ba dumelele. ₈Ka gona ba putla Misia ba fetela Troase. ₉Bošegong bjoo Paulose a lala a bone pono. A bona monna wa go tšwa Matsedonia a eme a mo rapela a re: “Selela ka mono Matsedonia o re thuše!” ₁₀Paulose o rile go bona pono yeo ra itokišetša go ya Matsedonia, ka gobane re be re kgolwa gore re bitšwa ke Modimo gore re yo begela batho ba gona Taba ye Botse ya gagwe.

₁₁Re tlogile Troase ka leselawatle ra ya Samotrake, gomme ka le le latelago ra ya Neapolise. ₁₂Go tloga moo ra fetela Filipi, e lego wona motse wa selete sa mathomo sa Matsedonia; ebile ke koloni ya Baroma. Ra tšea matšatši re le moo. ₁₃Ka tšatši la Sabatha ra tšwa motseng ra ya nokeng moo re bego re gopola gore ke felo mo Bajuda ba tlwaetšego go rapela gona. Ra dula fase ra bolela le basadi ba ba bego ba kgobokane moo. ₁₄Yo mongwe wa ba ba bego ba re theeleditše e be e le Lidia, e le mmapatši wa lešela la bohwibidu bja moretele, wa go tšwa Tiatira. Yena o be a khunamela Modimo, gomme Morena a mo fa gore a ele tše Paulose a di bolelago hloko. ₁₅Ge yena le ba lapa la gagwe ba seno kolobetšwa, o ile a re mema a re: “Ge eba le mpona ke le modumedi wa Morena, a re yeng le yo dula ka ga ka.” A phegelela go re mema.

₁₆Ka tšatši le lengwe ge re eya felong ga thapelo ra gahlana le ngwanenyana yo mongwe wa lekgoba yo a bego a tsenwe ke moya wa bodupe. O be a tlišetša beng ba gagwe tšhelete ye ntši ka bodupe. ₁₇A fela a šetše Paulose le rena morago, a goelela a re: “Banna ba ke bahlanka ba Modimo Yogodimodimo! Ba le begela ka mo le kago phološwa ka gona!” ₁₈O ile a fela a dira bjalo matšatši a mantši, Paulose a ba a tenega mo a ilego a retologa a re go moya woo: “Ke go laela ka maatla a Jesu Kriste gore o tšwe mo go yena!” Moya woo wa tšwa go yena le semeetseng.

₁₉Beng ba gagwe ge ba bona gore ba lobile mokgwa woo wa go ikgobokeletša tšhelete, ba swara Paulose le Silase ba ba gogela go baetapele ba motse kua kgorong. ₂₀Ba ba iša go mantona a Baroma ba re: “Banna ba ke Bajuda, gomme ba hlola mmudubudu mo motseng wa gaborena. ₂₁Ba ruta batho mekgwa ye rena, re le Baroma, re ka se kego ra e amogela goba ra phela ka yona.” ₂₂Batho ba motse le bona ba ba tsogela maatla.

Mantona a laela gore ba kgeilelwe diaparo, ba be ba bethwe ka thupa. ₂₃Ba re go ba betha gasehlogo ba ba lahlela kgolegong, gomme ba laela rakgolego gore a ba diše gabotse. ₂₄Yena o rile go laiwa bjalo, a ba lahlela ka phapošing ya ka garegare, a ba pataganya maoto ka dikota.

₂₅E rile mo gare ga bošego Paulose le Silase ba rapela ba opelela Modimo difela, gomme bagolegwa ba bangwe ba be ba theeleditše. ₂₆Gatee gwa ba le tšhikinyego ye kgolo ya lefase ya go šikinya le metheo ya kgolego. Mejako yohle ya bulega le semeetseng; ditlemo tša bohle ba ba tlemilwego tša tlemologa. ₂₇Rakgolego a phafoga, gomme ge a bona mejako ya kgolego e bulegile a gopola gore bagolegwa ba tšhabile. Ka gona a gwanyolla tšhoša ya gagwe a re o a ipolaya. ₂₈Fela Paulose a mo goelela a re: “O se ke wa ikgobatša! Ka moka ga rena re sa le gona!”

₂₉Rakgolego a re go tlišwe lebone; a tla a itlhaganetše, a itahlela pele ga Paulose le Silase a thothomela. ₃₀A ba ntšhetša ka ntle, a ba botšiša a re: “Barena, na nka dirang gore ke phološwe?”

₃₁Bona ba mo fetola ka go re: “Dumela go Morena Jesu, gomme o tla phološwa – wena le ba lapa la gago.” ₃₂Ke ge ba mmegela lentšu la Morena, yena le bohle ba ba bego ba le ka lapeng la gagwe. ₃₃Ka yona nako yeo ya bošego a ba tšea a yo a ba hlapiša dintho; gomme yena le bohle ba lapa la gagwe ba kolobetšwa le semeetseng. ₃₄Ke mo a ba išitšego ka ntlong ya gagwe, a fihla a ba fa tša go ja. Yena le ba lapa la gagwe ba be ba thabile kudu ka gobane bjale ba be ba dumetše go Modimo.

₃₅Ge go sele mantona a Baroma a roma maphodisa a re: “Lokolla banna bao.”

₃₆Ke ge rakgolego a tsebiša Paulose a re: “Mantona a rometše molaetša wa gore le lokollwe. Ka gona etšwang le itshepelele gabotse.”

₃₇Paulose a fetola maphodisa ao a re: “Ba re bethile pepeneneng re se ra sekišwa, mokagona ebile re le ba go bušwa Roma. Morago ga moo ba re lahlela ka kgolegong. Gomme bjale ba nyaka go re ntšha ka sephiring. O gane! A go tle bona beng ba re ntšhe.”

₃₈Maphodisa ao a ya go begela mantona taba ye; gomme bona ge ba ekwa gore Paulose le Silase ke badudi ba go bušwa Roma, ba tšhoga. ₃₉Ba ya ba kgopela tshwarelo go bona; ba ba ntšha ka kgolegong mme ba ba kgopela gore ba tloge moo motseng. ₄₀Paulose le Silase ge ba tloga moo kgolegong ba ya ga Lidia. Ba hwetša badumedikabona; ba ba kgothatša ya ba ba a tloga.

₁Paulose le Silase ba phatša Amfipolise le Apolonia ba fetela Thesalonika moo go bego go na le sinagoge ya Bajuda. ₂Go ya ka setlwaedi sa gagwe Paulose a ya sinagogeng. Ya re mo Disabatheng tše tharo tša go latelana a tšea kgang le bona, a boledišana nabo ka tša Mangwalo a Makgethwa, ₃a bile a ba hlalošetša ditemana tša ona, a ba bontšha ka tšona gore Mesia o be a swanetše go tlaišwa le go tsoga bahung. A re: “Yena Jesu yo ke le begelago yena yo ke yena Mesia.” ₄Ba bangwe ba bona ba ile ba kgolwa mme ba sepela le Paulose le Silase, le sehlopha se segolo sa Bagerike ba e bego e le barapedi ba Modimo, le basadi ba bantši ba maemo.

₅Fela Bajuda ba ba tsebafela gomme ba rapa difelele tša metlapa ba kgoboketša lekoko. Ba tsoša mmudubudu motseng, ba hlasela lapa la monna yo ba rego ke Jasone, ba nyaka Paulose le Silase gore ba ba ntšhetše ntle bathong. ₆E rile ge ba sa ba hwetše, ba gogela Jasone le badumedi ba bangwe go baetapele ba motse, ba goelela ba re: “Batho ba ba go tsoša mpherefere lefaseng lohle bjale ba tlile mono, ₇gomme Jasone o ba beile ka ga gagwe. Ka moka ga bona ba tshela melao ya Kesare, ba re kgoši ke yo mongwe, leina la gagwe ke Jesu.” ₈Go realo ya ba ge ba ferekantše lešaba le baetapele ba motse. ₉Baetapele bao ba rile go phethiša Jasone le ba ba bangwe tše di nyakegago gore ba lokollwe, ba ba lesa ba sepela.

₁₀Ge leswiswi le seno swara badumedi ba romela Paulose le Silase Berea. Bona ge ba fihla ba ya sinagogeng ya Bajuda. ₁₁Batho ba gona ba be ba phala ba Thesalonika ka go amogela tše di begwago ke Paulose. Ba be ba theeletša molaetša wa Modimo ka ditsebe tše pedi, gomme ka mehla ba be ba ithuta Mangwalo a Makgethwa go bona ge eba tše di bolelwago ke Paulose ke tšona. ₁₂Ba bantši ba bona ba ile ba dumela; le basadi ba bantši ba maemo ba Bagerike le banna ba bantši ba Bagerike le bona ba ile ba dumela. ₁₃Fela e rile ge Bajuda ba Thesalonika ba ekwa gore Paulose o bega molaetša wa Modimo le kua Berea, ba tla gona ba fihla ba ferehla batho ba ba ferekanya. ₁₄Badumedi ba akgofa ba tloša Paulose ba mo iša lebopong la lewatle, fela Silase le Timotheose ba šala Berea. ₁₅Banna ba ba bego ba felesetša Paulose ba ile ba mo fihliša Athene, ya ba gona ba boelago Berea, Paulose a ba laetše gore Silase le Timotheose ba mo latele ka pelapela.

₁₆E rile ge Paulose a sa letetše Silase le Timotheose kua Athene, a ferekana kudu ge a bona motse o tletše medingwana. ₁₇Ka gona a tšea kgang le Bajuda ka sinagogeng le batho ba e lego bakhunamedi ba Modimo. Le kua lepatlelong la motse ka mehla a tšea kgang le ba a kopanago le bona. ₁₈Le dihlalefi tše dingwe tša Baepikure le tša Bastoike di be di tšea kgang le yena. Ba bangwe ba botšiša ba re: “Etse mmalabadi yo o leka go re botšang?”

Ba bangwe ba fetola ba re: “O ka re o bolela ka medimo e šele.” Ba be ba realo ka gobane Paulose o be a bega tša Jesu le tsogo ya bahu. ₁₉Ba tšea Paulose ba mo iša kgorong ya motse, e lego Areopagose, ba re: “Re nyaka go tseba gore na thuto ye mpsha ye o bolelago ka yona ye ke thutomang. ₂₀Tše dingwe ditaba tše o di bolelago ke tše difsa ka ditsebeng tša rena, gomme re nyaka go tseba gore na di iša kae.” ₂₁Gape badudi bohle ba Athene le bafaladi ba gona ba be ba hlwa ba duletše go anega le go kwa tše difsa.

₂₂Paulose a ema kgorong a re: “Lena banna ba Athene, ke a bona gore dilong tšohle ke lena barapedi ba mmakgonthe. ₂₃Gobane ge ke ntše ke sepelasepela ke lebeletše mafelo a le khunamelago medimo ya lena go ona, ke bone le aletare ye nngwe ye e ngwadilwego go re: ‘Go modimo yo a sa tsebjego.’ Bjale ge, se le se khunamelago etšwe le sa se tsebe ke sona se bjale nna ke le begelago sona. ₂₄Modimo yo a hlodilego lefase le tšohle tše di lego mo go lona, yo e lego yena Morena wa legodimo le lefase, ga a dule ka ditempeleng tše di agilwego ke batho. ₂₅Le gona ga a nyake selo se batho ba kago mo fa sona ka go mo direla, ka ge e le yena ka noši yo a phedišago bohle le gona a fago bohle tšohle. ₂₆O hlodile ditšhaba tšohle ka motho o tee, gore di phele gohle lefaseng. Ke yena a di beetšego dinako le mafelo ao di tlago dula go ona. ₂₇Seo o be a se direla gore ba mo nyake, mohlomongwe ba mo hwetše ge ba mo phophola. Gape ga a kgole le yo mongwe le yo mongwe wa rena; ₂₈gobane mo go yena re a phela, re a ithokgonya, ebile re gona. Go bjalo ka ge direti tše dingwe tša gabolena di boletše tša re: ‘Le rena re bana ba gagwe.’ ₂₉Ka ge re le bana ba Modimo, re se ke ra gopola gore yena a ka swana le seswantšho sa gauta goba sa silibera goba sa leswika se se betlilwego ka bothakga le bokgoni bja motho. ₃₀Modimo o ile a hlokomologa mehla yela go yona batho ba bego ba sa mo tsebe, eupša bjale o ba laela bohle mo gohle gore ba sokologe. ₃₁Gobane o beile letšatši la ge a tlilo ahlola batho ba lefase ka toka ka monna yo a mo kgethilego. O tiišeditše taba ye ka go tsoša monna yoo bahung.”

₃₂E rile ge ba ekwa Paulose a bolela ka tša go tsošwa bahung, ba bangwe ba bona ba mo gegea, fela ba bangwe ba re: “Re nyaka gore o tle o re botše gape ka taba ye.” ₃₃Ke moka Paulose a tloga moo go bona. ₃₄Banna ba bangwe ba thoma go sepela naye mme ya ba badumedi; yo mongwe wa bona e be e le Dionisiose, wa lekgotla la motse, le mosadi yo mongwe yo ba rego ke Damarise, le ba bangwe.

₁Ka morago ga moo Paulose a tloga Athene a ya Korinte. ₂Moo a kopana le Mojuda yo mongwe yo ba rego ke Akhwila, yo a tswaletšwego Pontose. Yena o be a sa tšo tla a etšwa Italia gotee le Prisila, mosadi wa gagwe, gobane Kesare Klaudiose o be a laetše gore Bajuda ka moka ba tloge Roma. Paulose a ya go ba bona, ₃a dula le bona, a šoma le bona ka ge a be a phela ka go dira ditente bjalo ka bona. ₄Ka Disabatha o be a tšea kgang le batho ka sinagogeng, a leka go kgodiša Bajuda le Bagerike.

₅Ge Silase le Timotheose ba fihla ba etšwa Matsedonia, Paulose a ikgafela go begela Bajuda molaetša wa Modimo, a ba hlatselela gore Jesu ke Mesia. ₆E rile ge ba mo ganetša ebile ba mo roga, a hlohlora marole diaparong tša gagwe, a re go bona: “Ge le timetše, molato ke wa lena, nnaena ke hlapile diatla! Go tloga bjale ke napile ke ya go baditšhaba.” ₇Ke moka a tloga a ya ka ga monna yo ba rego ke Titose Justose, yo e bego e le mokhunamedi wa Modimo. Lapa la gagwe le be le kgauswi le sinagoge. ₈Krispose, yo e bego e le mookamedi wa sinagoge, o be a dumetše go Morena, yena le bohle ba lapa la gagwe. Le batho ba bangwe ba bantši kua Korinte ba rile go kwa molaetša wa Modimo ba dumela, gomme ba kolobetšwa.

₉E rile bošegong bjo bongwe Morena a botša Paulose ka pono a re: “O se ke wa šia, o fele o bolela, o se ke wa homola, ₁₀gobane ke na le wena. Ga go yo a tlago go dira selo, gobane ba bantši mo motseng wo ke ba ka.” ₁₁Paulose a dula moo ngwaga le dikgwedi tše di selelago, a ruta batho lentšu la Modimo.

₁₂E rile ge Galio e le mmušiši wa Agaya, Bajuda ba kgobokana, ba swara Paulose ba mo iša kgorong. ₁₃Ba re: “Monna yo o hlohleletša batho go khunamela Modimo ka mokgwa wo o ganwago ke molao.”

₁₄Paulose o rile a sa re o a bolela, Galio a botša Bajuda a re: “Ge taba ye e ka be e le ya bokebeka goba bosenyi bjo bogolo, lena Bajuda, nkabe ke tlemegile go le theeletša ke sa le felele pelo. ₁₅Eupša ka ge e le kgang ya mantšu le maina le molao wa lena, ke taba ye lena beng le swanetšego go iponela yona. Nna ga ke nyake go ba moahlodi wa taba tša mohuta wo.” ₁₆Ke moka a ba raka kgorong. ₁₇Bona ka moka ba swara Sostenese, mookamedi wa sinagoge, ba mmetha gona moo kgorong. Fela Galio yena a se re selo mo tabeng yeo.

₁₈Paulose a tšea lebakanyana a na le badumedi Korinte, a kgona a laelana nabo mme a eya Siria ka leselawatle, a na le Prisila le Akhwila. Pele ga ge a tloga Kenegrea, o ile a boolwa hlogo ka lebaka la ge a be a ikanne. ₁₉Ba rile go fihla Efeso a tlogela Prisila le Akhwila. A ya ka sinagogeng a fihla a tšea kgang le Bajuda. ₂₀Batho ba mo kgopela gore a dule nabo sebakanyana, fela yena a se dumele. ₂₁Gomme ge a sepela a ba botša a re: “Ge eba e le thato ya Modimo, ke tla boa ka tla mo go lena.” Ke moka a tloga Efeso ka leselawatle.

₂₂E rile ge a fihla Kesarea a rotogela Jerusalema a yo dumediša phuthego, ya ba o fetela Antiokia. ₂₃A re go fetša labaka gona, a feta a phatša naga ya Galatia le ya Frigia a tiiša badumedi bohle.

₂₄Kua Efeso go kile gwa tla Mojuda yo mongwe yo ba rego ke Apolose, yo a bego a tswaletšwe Aleksandria. Yena e be e le seboledi se segolo, a tseba Mangwalo a Makgethwa gabotse. ₂₅O be a rutilwe thuto ya Morena, gomme a begela batho a bile a ba ruta ka go nepa ditaba tša Jesu ka mafolofolo. Ge e le kolobetšo o be a tseba fela ya Johanese. ₂₆A thoma go bolela a sa boife ka sinagogeng. Prisila le Akhwila ba rile go mo kwa ba ya le yena ga gabobona, ba mo hlalošetša gabotse thuto ya Modimo. ₂₇E rile ge a nyaka go ya Agaya badumedi ba Efeso ba mo thuša ka go ngwalela badumedi ba gona gore ba mo amogele. Ge a fihla gona a thuša kudu bao e bego e le badumedi ka kgaugelo ya Modimo. ₂₈Gobane ge Bajuda ba tšea kgang le yena phatlalatša o be a ba phala ka dipolelo tša gagwe tše maatla, a bontšha ka Mangwalo a Makgethwa gore Jesu ke yena Mesia.

₁Mola Apolose a le Korinte, Paulose o ile a phatša dilete tša ka gare ga naga, a ba a yo fihla motseng wa Efeso. Moo a fihla a hwetša badumedi ba bangwe, ₂gomme a ba botšiša a re: “Na mola le eba badumedi le ile la amogela Moya wo Mokgethwa?”

Bona ba mo fetola ba re: “Aowa, le go kwa gore go na le Moya wo Mokgethwa ga se ra ka ra kwa.”

₃Paulose a ba botšiša a re: “Bjale le kolobeditšwe ka kolobetšo efe?”

Bona ba mo fetola ka go re: “Ka kolobetšo ya Johanese.”

₄Paulose a re: “Kolobetšo ya Johanese e be e le ya bao ba sokologago dibeng tša bona; yena o be a fela a botša Baisraele gore ba dumele go yo a tlilego go mo hlatlama, a era Jesu.”

₅Batho bao ge ba ekwa a realo, ba kolobetšwa ya ba balatedi ba Morena Jesu. ₆Paulose a ba bea diatla, gomme Moya wo Mokgethwa wa theogela godimo ga bona; ba bolela mantšu a a sa kwešišwego ba bile ba bega molaetša wa Modimo. ₇Ka moka ga bona e be e ka ba banna ba lesome le ba babedi.

₈Paulose a fela a eya ka sinagogeng ya Bajuda, gomme a tšea dikgwedi tše tharo a bolela ka go se boife le batho, a tšea kgang le bona mme a leka go ba kgodiša tša mmušo wa Modimo. ₉Eupša ba bangwe ba bona e be e le dinganga ba sa rate go dumela, ba bolela thuto ya Morena gampe mo phuthegong. Ka gona Paulose a ba tlogela, a tloga le badumedi, gomme ka mehla a fela a boledišana le batho ka ntlong ya borutelo ya Tiranose. ₁₀Gwa dirwa bjalo mengwaga ye mebedi, mo bohle ba ba dulago nageng ya Asia, Bajuda le baditšhaba, ba ilego ba kwa lentšu la Morena.

₁₁Modimo o be a dira mehlolo ye megolo ka Paulose. ₁₂Batho ba bile ba tšea le mašelana a go phumola dikudumela, le dithetho tša go šoma, ba re go mo kgoma ka tšona ba di bea balwetši, mme bona ba fola malwetši a bona, le meoya ye mebe e ba tlogela. ₁₃Bajuda ba bangwe ba go šika le naga ba raka meoya ye mebe le bona ba leka go bolela leina la Morena Jesu ge ba raka meoya ye mebe. Ba e botša ba re: “Re le laela ka Jesu yo a begwago ke Paulose gore le tšwe mo mothong yo.” ₁₄Ba ba bego ba dira bjalo e be e le barwa ba ba šupago ba moprista yo mogolo wa Mojuda yo ba rego ke Skefa.

₁₅Moya woo wo mobe wa re go bona: “Ge e le Jesu ke a mo tseba, Paulose le yena ke wa ka. Bjale lena – ke lena bomang?”

₁₆Monna yoo wa moya wo mobe a ba hlasela, a ba keketa, a ba fenya ka moka, ba ba ba tšwa ba tšhaba ka lapeng la gagwe ba kgeigetšwe ba bile ba gobetše. ₁₇Taba ye ya kwagala go Bajuda le go baditšhaba bohle ba ba agilego Efeso. Bohle ba welwa ke poifo, gomme Jesu a tuma kudu. ₁₈Badumedi ba bantši ba tla ba ipobola phatlalatša gore kgale ba be ba dira tša boloi. ₁₉Ba bantši ba ba bego ba kile ba dira tša boloi ba kgoboketša dipuku tša bona ba di fiša pepeneneng. Ge ba bala theko ya tšona ba hwetša e le ya dipapetlana tše dikete tše masome a mahlano tša silibera. ₂₀Ka maatla a Morena molaetša wa Modimo wa fela o phatlalala o bile o tia ka tsela yeo.

₂₁E rile ge taba tše di seno hlaga Paulose a ikemišetša go phatša naga ya Matsedonia le ya Agaya le go fetela Jerusalema. A re: “Ge ke seno boa kua ke swanetše go etela le Roma.” ₂₂A roma ba babedi ba bathuši ba gagwe, Timotheose le Erastose, Matsedonia ge yena a sa šala lebaka kua Asia.

₂₃E bile tšona nako tše ge motseng wa Efeso go tsoga mmudubudu wo mogolo mabapi le thuto ya Morena. ₂₄Mathulatshipi yo mongwe yo ba rego ke Demetriose o be a bopa diswantšhobopša tša tempele ya modimo wo motshadi Artemise ka silibera, gomme a tlišetša bomathulatshipi ba gagwe poelo ye ntši. ₂₅A ba rapa gotee le bohle ba ba dirago mediro ye e amanago le yeo ya bona, a re go bona: “Banna, le a tseba gore re humišwa ke modiro wo. ₂₆Bjale le a iponela ebile le a ikwela tše di dirwago ke mothaka yo, Paulose. O re medimo ya go dirwa ke batho ga se medimo, gomme o kgodišitšwe batho ba bantši a ba aroša, e sego mo Efeso fela, eupša e nyakile go ba le nageng yohle ya Asia. ₂₇Gomme ga se modiro wo wa rena fela wo o kago goboga, eupša le yona tempele ya modimo wo motshadi wo mogolo, Artemise, e ka bonwa e se selo, mme setumo sa yena modimo woo wo motshadi wo o khunamelwago ke bohle nageng ya Asia le lefaseng ka moka, se tla fela.”

₂₈Ge lešaba le mo kwa a realo, la galefa, la goa la re: “Ke yo mogolo, Artemise wa Efeso!” ₂₉Mmudubudu woo wa phatlalala le motse wohle. Lešaba la phuthuma Gayose le Aristargose ba Matsedonia ba ba bego ba felesetša Paulose, la itlhaganela go ya kgorong la ba kgareetša. ₃₀Paulose o be a rata go yo bolela le lešaba leo, fela badumedi ba se mo dumelele. ₃₁Le ba bangwe baetapele ba naga ya Asia ba e bego e le bagwera ba gagwe ba roma batho go mo kgopela gore a se ye kgorong. ₃₂Kgabagareng yeo go be go šetše go tsoga tlhatlhariane: bangwe ba bolela se, bangwe ba bolela sela, gape bontši bja bona bo be bo sa tsebe gore ba kgobokanetšeng. ₃₃Bajuda ba bangwe moo lešabeng ba bulela Aleksandere tsela. Ba bangwe batho ba mmotša gore a reng. Ke moka Aleksandere a emiša seatla go homotša batho gore a hlaloše se e lego taba. ₃₄Fela e rile ge ba lemoga gore ke Mojuda, ba goa mmogo diiri tše e ka bago tše pedi ba re: “Ke yo mogolo Artemise wa Efeso!”

₃₅Mafelelong lešaba leo la homotšwa ke mongwaledi wa motse a re: “Lena Baefeso, ke mang motho yo a sa tsebego gore motse wa Efeso ke modiša wa tempele ya Artemise yo mogolo le wa leswika lela la go wa legodimong? ₃₆Ga go yo a ka latolago taba ye. Ka gona le swanetše le itshware, le se dire selo ka lephakuphaku. ₃₇Le tlišitše banna ba mo le ge ba se ba hlakola tempele goba ba nyefola modimogadi wa rena. ₃₈Ge Demetriose le bašomikayena ba na le taba le yo mongwe, dikgoro tša tsheko di gona, le baahlodi, a ba tle kgorong! ₃₉Fela ge eba go sa na le se sengwe se le se nyakago, se tla rerwa pitšong ye e rapilwego go ya ka molao. ₄₀Ka lebaka la se se diregilego lehono, re ka bonwa molato wa go hlola mpherefere. Gape ga go lebaka le le kwagalago le re ka ikarabelago ka lona, ge go ka thwe re hlotše mmudubudu.” ₄₁A re go realo a phatlalatša pitšo.

₁Tlhahlariane yela e rile go homola Paulose a rapa badumedi a ba kgothatša ya ba o a ba laela. Ke moka a tloga a ya Matsedonia. ₂A phatša dilete tša gona a tšama a kgothatša batho ka tše a di bolelago, a ba a fihla nageng ya Bagerike; ₃a dula gona dikgwedi tše tharo. E rile ge a re o ya Siria ka leselawatle a lemošwa gore Bajuda ba mo lakane, gomme a bona a loketšwe ke go boa ka tsela ya Matsedonia. ₄Ba go mo felesetša e be e le Sopatere wa Berea, morwa wa Pirose, le Aristargose le Sekundose ba Thesalonika, le Gayose wa Derbe, le Timotheose, le Tigikose le Trofimose ba naga ya Asia. ₅Ba re thaka pele ba fihla ba re letela Troase. ₆Rena ra tloga Filipi ka leselawatle ka morago ga Monyanya wa Dinkgwa tše di se nago komelo, ya re ge go fetile matšatši a mahlano ra ba hwetša Troase gomme ra dula gona matšatši a a šupago.

₇E rile bošegong bja Mokibelo ge re phuthegetše go ngwathišana bogobe, Paulose a bolela le phuthego a gopotše go tsoga a sepela; a dika a bolela, ya ba ya ba bošegogare. ₈Go be go thumašitšwe mabone a mantši ka phapošing ya ka godimo ka mo re bego re phuthegetše ka gona. ₉Lesogana le lengwe le leina la lona ba rego ke Yutigose le be le dutše lefasetereng, gomme ya re ge Paulose a ntše a bolela, yena a potuma, a ba a re uwee ka boroko, a fegologa moo lebatong la boraro a wela fase, gomme ge ba mo kuka ke ge a hwile. ₁₀Paulose a theogela fase a fihla a itahlela mo godimo ga gagwe, a mo gokarela. A re: “Le se ferekane, o sa phela!” ₁₁Ke moka a boela lebatong la ka godimo, a fihla a ngwatha bogobe, a ja. A dika a bolela le bona nako ye telele, gwa ba gwa sa, a kgona a sepela. ₁₂Lesogana lela ba ya le lona gae le phedile mme ba homotšegile kudu.

₁₃Rena re ile ra sepela pele ka leselawatle ra ya Asose, moo re bego re yo feta re tšea Paulose. O be a re laetše gore re dire bjalo, ka ge a be a ratile go šala a eya gona ka maoto. ₁₄E rile ge a gahlana le rena Asose ra mo nametša leselawatle ra ya Mitilene. ₁₅Ra tloga gona ka leselawatle ra fihla go lebana le Giose ka le le latelago. Gosasa ga gona ra tsoga re fihla Samose, gomme ka le le latelago ra fihla Miletose. ₁₆Paulose o be a gopotše go tla motse wa Efeso ka ntle, gore a se ditelege kwa nageng ya Asia. O be a ilthaganeletše gore ge go kgonega a be a fihlile Jerusalema ka letšatši la Pentekoste.

₁₇Paulose ge a le Miletose a roma batho Efeso go yo bitša bagolo ba phuthego. ₁₈Ge ba fihla a re go bona: “Tša bophelo bja ka nakong yohle ya ge ke be ke na le lena go tloga tšatšing la mathomo la go fihla ga ka mo nageng ya Asia le a di tseba. ₁₉Le tseba ka mo ke bego ke direla Morena ka boikokobetšo bjohle le meokgo ye mentši mathateng a a nkwetšego ge ke be ke lakanwe ke Bajuda. ₂₀Le a tseba gore ga se ka ka ka le fihlela selo se se kago le hola mola ke le begela molaetša wa Modimo ke bile ke le ruta phatlalatša le ka malapeng a lena. ₂₁Ke be ke fela ke kgala Bajuda le baditšhaba gore ba sokologele go Modimo mme ba dumele go Morena wa rena Jesu. ₂₂Gomme bjale ke ya Jerusalema ke gapeletšwa ke Moya wo Mokgethwa, ke sa tsebe se se tlago ntlhagela gona. ₂₃Se ke se tsebago ke gore motseng wo mongwe le wo mongwe Moya wo Mokgethwa o ntemošitše gore ke letetšwe ke kgolego le mathata. ₂₄Fela nna bophelo bja ka ga ke bo seme selo; se ke se nyakago ke go feleletša se ke romilwego go se dira, le go phetha modiro wo ke o filwego ke Morena Jesu, e lego go bega Taba ye Botse ya kgaugelo ya Modimo.

₂₅“Gomme bjale ke a tseba gore lena ka moka ke bego ke sepela mo gare ga lena ke le begela tša mmušo wa Modimo, le ka se sa mpona. ₂₆Ka gona, lehono ke le botša ke tiišitše ke re: Ge motho wa lena a ka timela, molato e ka se be wa ka. ₂₇Gobane ga se ka le tima selo sa thato ya Modimo. ₂₈Ka gona, le itote, le lote le mohlape ka moka wo le o neilwego ke Moya wo Mokgethwa gore le o diše. Le be badiša ba phuthego ya Modimo, ye a e ikhweleditšego yona ka lehu la Morwagwe. ₂₉Ke a tseba gore ge ke seno sepela, le tla tlelwa ke diphiri tše bogale tše di ka se kego tša babalela mohlape. ₃₀Nako e etla mohlang le mo gare ga lena go tlago tsupologa boramaaka ba go aroša badumedi gore ba ba latele. ₃₁Ka gona, le itote, gomme le gopole gore ke tšere mengwaga ye meraro ke le ruta bohle ke sa khutše, bošego le mosegare ke fela ke lla.

₃₂“Gomme bjale ke le bea go Modimo le kgaugelo ya gagwe ye e kgonago go le aga le go le fa bohwa bjo Modimo a di beetšego bohle ba a ba kgethilego. ₃₃Ga se ka ka ka duma silibera ya motho goba gauta goba seaparo. ₃₄Lena beng le a tseba gore tše nna le bangwekanna re bego re phela ka tšona ke di šometše ka diatla tše tša ka. ₃₅Dilong tšohle ke le bontšhitše gore bafokodi re swanetše go ba thuša ka go šoma gaboima ka yona tsela ye, re ntše re gopola mantšu ale a go bolelwa ke Morena Jesu ka boyena a re: ‘Lehlogonolo la mofi le feta la mofiwa.’ ”

₃₆Paulose ge a feditše go bolela, a khunama le bona ka moka, a rapela. ₃₇Bohle ba lla, ba mo gokarela ba mo atla ba mo laela. ₃₈Gagolo ba be ba nyamišitšwe ke ge a rile ba ka se sa mmona. Ke moka ba mo felesetša leselawatleng.