Ditswalano – Letšatši la 7

Adamo le Efa e be e le baemedi ba Gagwe bao be bego ba swanetše go thoma leeto lefaseng mmogo, ba phethagatša mošomo wo Modimo a ba filego wona. Le ge ka mehla A be a le gona, batho ba babedi ba be ba hlokana go leeto le.

Pukung ya gagwe, 11 Indispensable Relationships You Can’t Be Without (letl. 19), Leonard Sweet o hlaloša nnete ye ka tsela ye nngwe: “Lethabo ga le leetong; le go ditswalano; ke moo ke kopanago le wena, go Kriste. Ga se mabapi le ‘nna ke e ba rena’, eupša ke mabapi le rena re e ba Yena.”

Mmoledi 4:9 e tiišetša nnete ye: “Babedi ba phala o tee, gobane ge ba katana mmogo ba tla tšwelela.” Mongwadi o nea mabaka a polelo ya gagwe: Mongwe ge a wele o tla tsošwa ke mongwekayena; kganthe motee ge a wele, ke dibonwakeyena, gobane yena o tla hloka motsoši. Le marobalong, ge babedi ba robetše mmogo ba a ruthetšana; motee yena a ka ruthela bjang? Motee a ka fenywa ke mohlasedi, eupša babedi ba ka mo palela. Gomme o di kopanya ka moka go temana ya 12 ge a re: “Gape thapo ya melogo ye meraro ga e kgaoge fela.” Ke fela tsenelelo ya Modimo ditswalanong tša rena ye e matlafatšago thapo ya ditswalano.

Go oketša go dikholego tše di boletšwego ka godimo, nna le wena re hloka batho maphelong a rena go re hlohla go re re tšwe ka gare ga mafelo a rena a boiketlo. Dikeletšo tša bona di re kgontšha go phušola magora a dipono, ditšo, pono ya mokero le go itira moloki gore re kgone go nagana ka leswa le ka mo go fapanego. Gomme, go tshepetšo re tla ithuta go tseba Modimo go tšwa go mmono o o fapanego le go utolla seo se re bofollago le go re lokolla.

Modumedi yo mongwe le yo mongwe, ge e le gabotse motho yo mongwe le yo mongwe, o hloka ditlhahlo, baeletši le batho ba bohlale go mo thuša leetong la gagwe le go ba gona ge a fihla mo a yago gona.