Dithuto tša bophelo go tšwa Bibeleng – letšatši la 7

Ge Dafida a lahlegelwa ke ngwana ka lebaka le lehu, kgoši ya ya mogale wa ntwa o ile a kgona go tšwela pele, eupša e se Ritsepa. Ritsepa e be e le motlabo wa Kgoši Saulo gomme a mmelegela barwa ba babedi, Armoni le Mefiboshete.

Nakong ya pušo ya Dafida, go bile le tlala ya mengwaga e meraro nageng. E be e le kotlo ya Modimo ya molato wo o dirilego ke Saulo, yo a bolailego batho ba Gibeone bao Israele e enilego gore e tla ba šireletša (2 Samuele 21:1-2).

Batho ba Gibeone ba be ba nyaka go itefeletša. Ba nyakile gore Dafida a lefele dibe tša Saulo ka go ba gafela bana ba šupa ba Saulo. Dafida a dumela kgopelo ya bona. A ba neela Armoni le Mefiboshete le ditlogolo tše hlano tša Saulo. Batho ba Gibeone ka bjako ba lekeletša ka moka ga bona ba šupa gomme ba tlogela ditopo tša bona di le molaleng godimo ga thaba
Nagana ka maikutlo a mmago bona a bilego le wona ka lebaka la pheletšo ya barwa ba gagwe ba go hloka molato. “Ke moo motlabo wa Saulo, Ritsepa, morwedi wa Aya, a tšerego masaka a a ala letlapeng lela ditopo di bego di le go lona, gomme a dula fao go tloga mathomong a ge go bunwa go fihlela ge dipula di ena. Mosegare o be a raka manong moo ditopong, gomme bošego a raka dibata” (2 Samuele 21:10).

Ge a ekwa ka moletelo wa Ritsepa, Dafida a laela gore ditopo di tlošwe gomme di tsenywe lebitleng la lapa la tatago Saulo, Kishe.

Go na le batswadi lehono bao ka pefelo ba hlanogetšego Modimo ka manyami a go lahlegelwa ke motho yo ba mo ratago. Ba nyaka diphetolo tše di kwagalago moo di sego gona. Selo se tee se re se tsebago ke gore lerato la Modimo go rena ke le legolo kudu moo e lego gore yena ka boyena o dumeletše Morwa wa gagwe a le noši go ka hwa gore, ka yena, re fete lehu go ya bophelong bjo bo sa felego.