Dithuto tša bophelo go tšwa Bibeleng – letšatši la 13
Abigaile yo mobotse, wa go hlalefa
(Di)temana ya Bibele
DIEMA 11
Go na le dikanegelo tša go kgahliša tša batho ba ka Bibeleng tšeo di kago ba difilimi tša go kgahliša. Kanegelo ya Abigaile, yo e bego e le yo mobotse, wa go hlalefa gape yo botho, ke toro ya mongwadi wa dingwalwa tša difilimi. Monna wa Abigaile, Nabale, o be a humile le dinala, a le sehlogo, gape a na le mekgwa e mebe.
Dafida le banna ba gagwe ba ile ba hloma mešaša ge ba tšhabela Saule kua Mahone. Moo, Dafida a kopana le badiši ba Nabale gomme a ba swara ka botho le go ba šireletša.
Ge sehla sa go kota dinku se thoma, Dafida a romela banna ba lesome go Nabale a kgopela thušo. Nabale ka go nyatša a rogaka le go nyenyefatša mong wa bona. A gana go thuša. Banna ba botša Dafida seo Nabale a se boletšego. Dafida a befela gomme a ena gore o tla itefeletša.
Abigaile a makala ge a ekwa se Nabale a se dirilego. A laela bahlanka go laiša dijo godimo ga dipokolo a di iša go Dafida. Ka go itlhaganela, a ba šala morago ntle le go botša monna wa gagwe.
Ba kopana le Dafida a le tseleng ya go yo bolaya Nabale. Abigaile a obama pele ga Dafida gomme a kgopela tebalelo, a ithweša molato go ka phološa monna wa gagwe. A kgopela tebalelo ya Dafida.
Abigaile a fa Dafida dijo gomme Dafida a re go yena, “Boela gae mme o se ke wa tshwenyega. Ke kwele se o se bolelago mme ke tla dira se o se kgopelago” (1 Samuele 25:35).
Ge Abigaile a fihla gae, Nabale o be a ithabiša, o be a tagilwe kudu; ga sanka a bolela le yena. Letšatši le le latelago ge a mmotša se a se dirilego, o ile a ba le strouku. Nabale a hlokafala morago ga matšatši a lesome.
Ge a ekwa ka lehu la gagwe, Dafida a kgopela Abigaile go ba mosadi wa gagwe. A amogela kgopelo ya gagwe. Ba phela bophelo bja bohlagahlaga bja go ralala le naga ba tšhaba Dafida. Lebakeng le lengwe, Abigaile o ile a thopša ke Baamaleke gomme fela morago ga ntwa e šoro, Dafida a kgona go mo hlakodiša. Morago ga ge Saule a hlokafetše, ba dutše Hebrone. Moo, Dafida, o ile a tlotšwa go ba Kgoši ya Juda gomme Abigaile a mmelegela morwa, Kileabe (2 Samuele 3:2).
Bophelo bja Abigaile ke bopaki bja mosadi wa go botega, wa go ikokobetša, gape wa go boifa Modimo yo a bego a ikemišeditše go bea monna wa gagwe pele ka dinako ka moka.
