Dithuto tša bophelo go tšwa Bibeleng – letšatši la 11
Bileamo le pokolo ya gagwe ya go bolela
(Di)temana ya Bibele
BAROMA 8
Modimo o re rata kudu ka Kriste Jesu
Bileamo e be e le ramaselamose wa go hlomphega yo a bego a na le maatla a go tliša ditšhegofatšo le dithogako. Ge Baisraele ba fihla Moaba, leetong la bona go ya Nageng ye e Holofeditšwego, Balaka, kgoši ya Moaba, o ile a tšhoga kudu. A tšhoga gore madira a Israele ba tla bolaya batho ba gagwe gomme ba tšea naga ya gagwe.
Ka go tlalela, o romela baromiwa go yo thwala Bileamo gore a tle a rogake Baisraele gore ba kgone go rakwa nageng ya gagwe.
Eupša Modimo a re go Bileamo, “O se ke wa sepela le banna ba, le gona o se ke wa rogaka setšhaba sa Israele, ka gobane ke ba šegofaditše” (Numeri 22:12). Ka gona Bileamo a gana gomme a romela baromiwa morago go Balaka.
Lega go le bjalo, kgoši a phegelela gomme a romela baromiwa ba bobedi. A tshepiša go putsa Bileamo kudu ge a ka sepela le bona. Mafelelong, morago ga go nagana ka yona, Bileamo a dumela go sepela.
Tseleng, pokolo ya Bileamo ya bona morongwa a thibile tsela ya bona, gomme ya phamoga tsela. Bileamo a betha pokolo. Gomme tseleng ye e pitlaganego, pokolo ya bona morongwa gape gomme ya ipatagantšha le morako, ya kgobola leoto la Bileamo. Bileamo a betha pokolo gape. Lekga la boraro ge pokolo e bona morongwa ya robala fase gomme Bileamo a e betha gape.
Gomme pokolo ya re: “Ke go dirile eng ge o mphethile gararo bjale?” (Numeri 22:28)
E bile fela ge Morena a bula mahlo a Bileamo gomme a bona morongwa wa Morena ka boyena, moo a lemogilego gore ke ka lebaka la eng a be a thibelwa. Ka go tseba gore o dirile sebe, Bileamo a re o tla gomela morago. Lega go le bjalo, morongwa a mo laela gore a tšwele pele eupša go bolela fela mantšu a Modimo a mmotšago wona.
Ge a kopana le Kgoši Balaka, Bileamo a gana go rogaka Baisraele, go e na le moo a ba šegofatša ka mantšu a: “Yo a šegofatšago Baisraele o tla šegofatšwa, yo a ba rogakago le yena o tla rogakwa (Numeri 24:9).
Kanegelo ya Bileamo e utolla netefatšo ye botse ya gore Modimo ka dinako ka moka o šireletša ba gagwe. Lerato la gagwe le re bea tlhokomelong ya gagwe go fihlela letšatši leo la letago, ge a re amogela gae.
