Dira phapano – Letšatši la 1
O dira phapano bjalo ka mošele
(Di)temana ya Bibele
JOHANESE 1
Nna, Petrose, moapostola wa Jesu Kriste, ke ngwalela lena ba le kgethilwego ke Modimo, le phelago bjalo ka bašele ba ba gašaganego le selete sa Pontose, le sa Galatia, le sa Kapadokia, le sa Asia, le sa Bithinia. 1 Petrose 1:1
O a tseba gore go bjang go ba mošele? Ke a tseba. Ke ile nageng ye nngwe morago bjale, seo e bile boitemogelo bja go kgahliša kudu, eupša ka dinako tše dingwe ke hweditše ditsela tše šele di gakantšha le go se di tlwaele go hlohla kudu – le ge ke be ke kgona go bolela leleme!
Ge e le gore e sa le wa fetša nako o le kgole le toropo ya geno goba naga, mohlomongwe o tla kwešiša se. O tla thabela ka mo go lokilego ka gona ge motho a myemyela le go go hlalošetša moo o nyakago go ya gona, goba go go bontšha kamogelo ya baeng le go bebofatša morwalo wa gago ka tsela e itšego. O itemogela Modimo a go hlokomela gomme seo se dira phapano e kgolo go pheleng gabotse ga gago.
Jesu Kriste e be e le mošele lefaseng le. “Lentšu o be a le lefaseng, gomme le ge Modimo a hlodile lefase ka yena, batho ba lona ga se ba mo amogela” (Johanese 1:10). O tlile lefaseng ka go hloka boithati, a tseba gore ba bantši ba tla mo gana, le ge go le bjalo, o tlile go dira phapano. O tsebile gore lagae la gagwe le be le le legodimong le gore balatedi ba gagwe ba tla ba fao le yena letšatši le lengwe. O nyaka go dira phapano le go ba tsela ya go fihlelela go ba bangwe. Ge re mo latela ka nnete, re tla itemogela gape go se amogelwe, ka dinako tše dingwe, le go swarwa bjalo ka bašele – le ge re ka se tloge metseng ya gaborena. Ge re tšea mohlala wa rena go yena, re tla dira phapano.
Ge re kopana le bašele mafelong a fapafapanego, gantši re nagana ka fao ba ikwago ba hlaselega gabonolo. Petrose o nagana bjalo. O lemoga gore batho ba Modimo ga ba a phatlalala fela, bašele ba ba lego nyanyeng lefaseng, eupša ka dinako tše dingwe ba ka ikwa o ka re ga ba mafelong a ba a tlwaetšego, bjalo ka lefelong la mošomo goba ka gae. Bjalo ka morutiwa yo a bego a sa hwetše go le bonolo ka mehla le go ba morongwa go “bakgethwa ba Modimo”, o nyaka go ba hlohleletša, go ba thuša go dira phapano moo ba ka bago ba le gona, ka gona o ba ngwalela lengwalo.
Petrose o latela mohlala wa Jesu. O tla tsepelela go dithuto tša gagwe le go dira phapano go lefase le o lego go lona, go sa šetšwe gore ke le le nnyane gakaakang?
