Dikholofetšo tše botse tša Modimo – Letšatši la 8

Ditiragalo tše bohlokwa magareng ga Modimo le motho gantši di diragetše dithabeng le mebotong.

Moshe o amogetše Melao ye Lesome Thabeng ya Sinai.

Go be go le thabeng ye telele moo Jesu a fetogilego sebopego gomme Petrose, Jakobose le Johanese ba mmona a tagafatšwa. Moo ba kwa Modimo a re: “Yo ke yena Morwa wa ka yo ke mo ratago, o nkgahla kudu; le mo theeletšeng!” (Mateu 17:5).

Go be go le Thabeng ya Mehlware ge Jesu a botša barutiwa ba gagwe gore ba tla mo tlogela bošego bjoo. Moo ka fase ga dihlare tša mehlware kua Getsemane, a rapela kudu, a ekwa gomme a swarwa.

E be e le mmotong wa Golgotha, “Felo ga Legata”, moo Morena wa rena, a le noši gape a tlogetšwe ke bao ba bego ba le kgauswi le yena, a neela ka bophelo bja gagwe ka lebaka la ka le wena. A dira bjalo ka boithaopo le ka lerato a bonegeditše letšatši le leso historing ya lefase go rena, ka kholofetšo – kholofetšo ya Moya wo Mokgethwa yo e lego temana ya rena lehono.

Kholofetšo e tlile le peelo: “Ge le nthata, le tla phetha melao ya ka. Ke tla kgopela Tate …” E gatelela taelo ye Modimo a e filego Petrose, Jakobose le Johanese Thabeng ya go Fetoga Sebopego: “Le mo theeletšeng.”

Dikereke le mafelo a borapedi a agilwe dithabeng le mebotong moo motho a bilego le boitemogelo le Modimo. Mafelo a bjalo a tšwewa go ba a kgethwa, eupša ga se mafelo ao a lego a makgethwa eupša rena, batho ba Modimo.

Jesu o holofetša bao ba mo latelago gore Moya wo Mokgethwa o tla phela le rena le ka gare go rena go ya go ile – ke seo se re kgethwafatšago.

Re tempele ya Modimo ye kgethwa mahlong a gagwe. Go sa šetšwe se se kago re hlagela, Modimo o tla ba le rena ka go sa felego.