Dikholofetšo tše botse tša Modimo – Letšatši la 16

Sekhipa se se ngwetšwego mantšu “Iketle gomme o tšwele pele” se tsebega kudu lefaseng ka moka dinageng tše go bolelwago lelelme la Seisimane. Ke selo se ka moka ga rena re kago se kwešiša. Ka gobane ga go selo se boima kudu go e na le go iketla ge re le ka tlase ga kgatelelo ka lebaka la maemo a re palelago ke go a laola.

Ke ka nako ye re hlokago go gopola mantšu a sereti, Alfred (Lord) Tennyson: “O kgauswi kudu go e na le go hema, le kgauswi kudu go feta matsogo le maoto.”

Modimo ka mehla o kgauswi go kwa dithapelo tša rena. Gaešita le ge re belaela le go tšhoga kudu mo re palelago ke go hlaloša se se lego menaganong ya rena, Moya wo Mokgethwa o tla tšea taolo legatong la rena gomme o fihliše dithapelo tša rena go Modimo Tate wa rena (Baroma 8:26).

Re hloka, lega go le bjalo, go ba le poledišano ye e tšwelago pele le Tate wa rena wa magodimong e se fela ge re le mathateng gomme re sa tsebe gore re ye kae. Morena wa rena Jesu Kriste o fediše nako ye ntši ya boruti bja gagwe lefaseng a rapela le ga bjale legodimong, o sa rapela legatong la rena.

Jesu o re rutile gore Modimo ke Tate wa rena legodimong. O ikemešeditše ka mehla go theeletša le go araba dithapelo tša rena.

Morena wa rena o re hlohleletša go kgopela gore re kgone go amogela, go nyaka gomme re tla hwetša, go opaopa gomme re tla bulelwa lebati: “Ge ešita le lena le lego ba babe le tseba go fa bana ba lena tše botse, na Tatagolena wa legodimong yena a ka napa a se le phale ka go fa bao ba mo kgopelago dilo tše dibotse?” (Mateu 7:11).

Modimo wa rena o re nyakela tše botse. Ke Tate yo a hlokomelago yo go yena re ka beago tshepho ya rena ka moka.

Temana ya rena ya letšatši e holofetša gore ge re ka ya go Modimo ka thapelo, dipelaelo tša rena di tla tologa gomme re tla itemogela lethabo la khutšo ya gagwe.