Dikenywa tša Moya – Letšatši la 7

“Tšohle tše le ratago gore batho ba le direle tšona, le lena le ba direle tšona. Se se akaretša melao ya Moshe le dithuto tša baprofeta.” Mateu 7:12

Go fihla ka nako ya Jesu, Socrates le dihlalefi tše dingwe tše kgolo ba dirile kakaretšo ya ditekanyetšo tša boitshwaro ka setatemente se tee. Dira go ba bangwe seo o nyakago ba go dira sona. Go fošagetše, go tsepelela go se o sa swanelago go se dira. Ge o sa nyake gore motho a go kweše bohloko, ka gona se ba kweše bohloko. Ge o sa nyake gore motho a go botše maaka, se mmotše maaka. Go kwagala go le gabotse, ga go bjalo? Go na le bothata ka mohuta wo wa filosofi; e go dumelela go ikgogela morago. Ge e ba Mosamaria wa kgaugelo o be a latetše mokgwa wo wa go nagana, a ka ba a fetile ka thoko monna yo a bego a ela madi gomme a re, “Ga se boikarabelo bja ka. Ga se nna ke mo hutšego. Ga ke ya mo gobatša. Ga se bothata bja ka, ka gona ke gatela pele.”

Gomme, Jesu go Mateu 7:12 o bolela setatemente sa ditekanyetšo tsa boitshwaro sa phetogelo mabapi le ka fao re swanetšego go phela maphelo a rena letšatši le letšatši. Go na le sekgoba se segolo magareng ga setatemente se fošagetšeo, “Se dire ba bangwe se o sa nyakego ba go dira sona,” le setatemente se sebotse, “Dira go ba bangwe se o nyakago ba go dira sona.” Setatemente se sebotse ga se re dumelele gore re ikgogele morago. Se re bea boeong bja go dira. Ge o nagana ka tsela ye o nyakago gore motho a go sware ka yona, ka gona o ba swara ka yona tsela yeo.

Naa o ka akanya ka lefase le re phelago go lona, ge e ba batho ba be ba phela go ya le ka mantšu a Jesu? Boithati e be e tla ba selo sa nakong e fetilego. Motho yo mongwe le yo mongwe o be a tla ba mohlanka. Le ge go le bjalo, re phela lefaseng le le re rutago gore “sa ka ke sa ka gomme ke tla se boloka”. Pelo ya mohlanka e re ruta gore, “se e lego sa ka ke sa Modimo gomme ke tla se abela ba bangwe”.