Dikenywa tša Moya – Letšatši la 22

Dikenywa tša Moya tšona ke lerato, le lethabo, le khutšo, le bopelotelele, le botho, le go loka, le potego, le boleta, le boitshwaro. Bagalata 5:22-23a

Fela Kriste yena le mo hlomphe ka dipelo tša lena ka ge e le Morena. Le dule le itokišeditše go iphetolela go yo a le hlohlago ka tša kholofelo ye le nago le yona, eupša seo le se dire ka boleta le tlhompho. 1 Petrose 3:15-16

Coco Chanel o tsopotšwe a bolela gore “Boleta ga bo dire mošomo ge fela o le kgogo ye e beelago mae.” Lefaseng le le ketakago maatla, go bonolo go nagana gore boleta ke bofokodi, selo se re sa se hlokego. Go bonala go makatša gore Petrose o kgetha lentšu boleta go hlaloša bohatse bja rena go ba bangwe. A ka ba a šomišitše mantšu bjalo ka sebete, therešo, potego goba bohlale. Eupša boleta?

Coco Chanel a ka ba a bile le taolo go setaele, eupša o be a fošitše ka boleta. Boleta ga bo hlaloše go fokola goba go boifa, gape ga bo hlaloše gore o ka se tsoge o fihleletše se sengwe. Boleta bjo bo tšwago go Moya wo Mokgethwa bo mabapi le ka fa re swarago batho ba bangwe. Go se swane le bofokodi, boleta ke maatla a a laolwago ao a go dumelelago go kgotlelela le go ba pelotelele go ba bangwe. Go ba boleta ke go go kgona go laola pefelo le go ba le tekatekano moyeng. Motho yo boleta ga a sole le go ahlola, eupša o a lebalela le go tliša khutšo.

Petrose o re re swanetše go ba le mohuta wo wa boitshwaro ge re ahlaahla tumelo ya rena le ba bangwe. Ga re baemedi ba lokilego ba Kriste ge re na le manganga le go nyatša dipono tša ba bangwe. Boleta ga bo hlaloše go se dumelelane goba go se emele se o dumelago go sona, bo ra gore go kwešiša le go kgona go laola pefelo ya rena dingangišanong tša rena, ka boleta re bontšha ba bangwe moo re sa dumelelanego. Dingangišano tša rena ga di fetoše batho, Jesu o fetoša batho. O ka phela ka lerato le mollo, eupša wa ba yo boleta, o fihlelela dilo tše kgolo tša Modimo.