Dikenywa tša Moya – Letšatši la 15
Diphišego tša boikokobetšo
(Di)temana ya Bibele
BAFILIPI 2
Motho a se dire selo ka bojato goba ka go nyaka boikgantšho bja lefeela, eupša ka boikokobetšo a ipone a phalwa ke ba bangwe. A se šetše fela tša go ikhola, eupša a šetše tša go hola ba bangwe. Bafilipi 2:3-4
Ge o lebelela lentšu “boikokobetšo” ka gare go thesaurase, o tla hwetša “go se fišagele” bjalo ka lehlalošetšagotee. Naa seo se ra go reng? Naa se ra gore ge o katanela boikokobetšo bja bomodimo bophelong bja gago, o hloka go lahla diphišego tša gago ka moka, ditoro tša gago ka moka, ditebanyo tša gago ka moka?
Ga go bjalo! Paulose o hlaloša gabotse gore ke tlhohleletšo morago ga se o nyakago go se fihlelela ye e lego bohlokwa. O ngwetše lengwalo go ya go kereke ya Filipi, ka gobane batho fao ba be ba baka dikarogano le go se kwane ka maitswaro a bona le ditiro. Ba be ba nyaka go lemogwa ka se ba bego ba se dira gomme ba be ba, ka gona, palela ke šoma le ba bangwe ka kerekeng ka kgopolo ye e swanago le lerato. Phišego ya bona ya boithati le maiteko a bona a go hloka kholofelo a go kgahliša batho a be a fediša botee bja kereke. Ke boitshwaro bja go swana bjo bo fedišago khutšo lefelong la mošomo le ka malapeng.
Re swanetše go kwešiša gabotse gore re nyaka letago la mang. Go sa šetšwe gore mošomo ke ofe, go bohlokwa go ba le ditebanyo tša phišego go diprotšeke tše o di dirago le go ikgafa go di fihlelela. Le ge go le bjalo, ipotšiše, naa o šomela letago la Modimo ka thata goba go hwetša temogo go molaodi wa gago? Modimo o swanela ke tše kaonekaone tše o kago di neela gomme o nyaka gore o šomiše dimpho tša gago ka mo go feletšego.
Ema nakwana lehono gomme o lekodišiši diphišego tša gago bophelong bja gago. Ge e ba o fihleletše ditebanyo tša gago ka moka tša bjale, ke mang yo a tlago hwetša letago? Naa o katanela wena goba Modimo. Tšea motsotswana go bona ge e ba go na le diphetogo le ge e le dife tše o hlokago go di dira go ditebanyo tše o di beilego, gomme o kgopele Modimo, ka thapelo, go go thuša go beakanya leswa diphišego tša gago, gore o se kganyoge selo eupša thato ya gagwe bophelong bja gago.
