Bileditšwe go hlokomela – Letšatši 14

₂₇Lena Baisraele,

bjale ke ka lebaka lang le ngongorega?

Le reng le balabala,

lena ditlogolo tša Jakobo,

le re Morena ga a tsebe matshwenyego a lena,

le re Morena ga a ne taba

ge le hlokišwa toka?

₂₈Kgane ga le tsebe?

Ga se la kwa?

Morena ke Modimo wa go ya go ile,

Mohlodi wa lefase lohle.

Ga a lape,

ga a felelwe ke maatla.

Tlhaologanyo ya gagwe ga e fihlelwe.

₂₉O lapološa bao ba lapilego,

bao ba fokolago a ba fa maatla.

₃₀Bafsa le bona ba a lapa ba fele maatla.

Masogana le ona a a thetšwa a we.

₃₁Eupša bao ba tshephilego Morena ba tla lapologa,

ba se sa felelwa ke maatla,

ba swana le dintšhu tše di akalalago.

Ba tla kitima ba se lape,

ba sepela ba sa fele maatla.