Batamela kgauswi le Modimo – Letšatši la 8
Batamela kgauswi le Modimo ka go theeletša lentšu la Gagwe
(Di)temana ya Bibele
JEREMIA 33
JOBO 33
NUMERI 23
[Mmadi e sa le a nngwalela emeile ka mantšu a: “Benescke, ke duma go kwa lentšu la Modimo, eupša go bonala eke ga A bolele le nna. Nka kwa bjang lentšu la gagwe gabotse bophelong bja ka?”]
Eliya o be a tšhogile. A tšhogile kudu! O be a se na le nnete mabapi le bokamoso. Go 1 Dikgoši 19, re bala gore o utamile ka lweng bošego. Israele e furaletše Modimo. Dialetare tša Modimo di kgerešitšwe gomme baprofeta ba Modimo ba bolawa. Eliya e bile yena fela moprofeta yo a bego a šetše gomme a boifa gore o tla bolawa.
Modimo a laela Eliya go tšwa leweng: “Etšwa gomme o eme thabeng pela ga Morena, gobane Morena o kgauswi le go feta.” Eliya a obamela taelo ya Morena. A ipotšiša gore Modimo o tla reng le gore Modimo o tla lebega bjang?
Ledimo le legolo le le bego le pharola dithaba, le pšhatlaganya marako, eupša Morena o be a se moo phefong yeo. Ka morago ga tšhišinyego gwa ba le mollo, eupša Morena o be a se moo mollong woo. Gomme ka morago ga mollo gwa kwagala lentšu le bolelela fase. Ge Eliya a ekwa lentšu leo, a ipipa sefahlego ka seaparo sa gagwe gomme a tšwa a ema mojakong wa lewa. A tseba gore Modimo o boletše le yena.
Sehleng sa leswiswi sa Eliya, Modimo o nyakile go mo gopotša gore ke Yena mang. Seo se matlafaditše tumelo ya Eliya. Le rena gape, ka dinako tše dingwe, re itemogetše dihla tša leswiswi maphelong a rena. Bjalo ka Eliya, re utama ka maweng, re ipeele thoko le gaešita go gonona ge e ba Modimo o kwa dithapelo tša rena. Ke ka nako ya sehla se mo Modimo a re bitšago go tšwa ka leweng, gore a kgone go re gopotša gore ke Yena mang le gore A ka dira eng maphelong a rena.
Go Jeremia 33:3 Modimo o re: “Ntlhaeletše, mme ke tla go araba.” Ke kholofetšo. Ge o hlaeletša go Modimo, O tla araba. O swanetše o phuthuloge go kwa lentšu la Gagwe. Go Jobo 33:13-16 re bala gore: “Modimo o bolela ka mekgwa ye mentši, le ge batho ba sa lemoge. O bolela ka ditoro le ka dipono bošego, mola batho ba ile ka boroko malaong a bona. O ba kweša se a se bolelago, a ba tšhošetše ka go ba kgala …”
Ka gobane batho ba bantši ba letetše go kwa lentšu la Modimo ka mo go kwagalago (gomme ee, Modimo a ka bolela le rena bjalo, eupša ga a dire bjalo), re feta ke dinako ge A bolela le rena. O bolela le rena ka ditsela tša go fapanafapana. Ka nako e nngwe ka Lentšu la Gagwe, ka tše dingwe ka batho, ka tše dingwe ka dikgopolo tša go itlela fela goba maikutlo goba dikgopolo dipelong tša rena, ka dinako tše dingwe ka ditoro, ka tše dingwe nakong ya tirelo ya kereke, ka tše dingwe ka tlhago, ka tše dingwe ka sebopego sa khutšo goba ka go tshwenyega ga go se fele. Ekaba o ikemišeditše go kwa lentšu la Modimo le go le fetola?
O tseba bjang gore ke Modimo a bolelago le wena gomme ga se boikgopolelo bja gago? Ye nngwe ya ditsela tše botse go ka tseba ge e ba se re se kwago se tšwa go Modimo goba aowa, ke go se ela kgahlanong le Lentšu la Modimo. A ka se dire gore re dire selo sefe goba sefe se se fapanego le Lentšu la Gagwe. Go Numeri 23:19 re bala gore: “Modimo ga se motho a kago bolela maaka; ga se motho, yo a kago itshola.”
O nyaka go kwa lentšu la Modimo gabotse lehono? Dira nako o homole, bula pelo ya gago go Moya wo Mokgethwa go bolela le wena, tsepelela go Modimo gomme o ngwale fase se o se kwago. Gape, etšwa ka gare ga lepokisi la ditekanyetšo ka go bula mahlo le ditsebe go itemogela Modimo letšatši ka moka. E e ka ba kgato ya pele ya bohlagahlaga bo boswa le Yena! Modimo a go šegofatše.
