Batamela kgauswi le Modimo – Letšatši la 5

Ka 5 Dibatsela 2003, Kgorokgolo ya United States, kua Seattle, e be e tletše wa go falala. Maloko a lapa le bagwera ba basadi ba 48 ba ba bolailwego ba be ba tlile go neela melaetša go Gary Leon Ridgway, wa mengwa ye 54 (yo gape a bego a tsebja ka Mmolai wa Noka ya Green), pele moahlodi a mo ahlolela bophelo ka moka kgolegong ka ntle le kgetho ya go hwetša parola.

Dipolao tša Ridgway di mo dirile mmolai wa batho ka bontši o mogolo historing ya Amerika. Go efoga theeletšo le kgonagalo ya go ahlolelwa lehu, o saenne kwano le mmušo go aba tshedimošo e oketšegilego mabapi le batšwasehlabelo go maphadisa.

Dipolelo ka phapošing ya kgorotsheko di be di tletše ka pefelo, lenyatšo le lehloyo go Ridgway. O be a dutše a theeleditše ka sefahlego sa go tia se se sa bontšhego boikwelo. E bile ge tate o mogolo wa o tee wa batšwasehlabelo, Richard Rule, ka maledu a gagwe a matelele, a ema ka lepokising moo se se bego se sa letelwa se direga. A thoma go bolela ka lentšu le lekoto: “Morena Ridgway, go na le batho ka mo phapošing bao ba go hloilego … ga ke o tee wa bona. O dirile gore go be boima go phela se ke se dumelago le se Modimo a se nyakago ka nna – go lebalela. Eupša lehono ke re go wena, ke a go lebalela …” Tiro ye ya mogau e bakile dikeledi gore di elele sefahlegong sa mmolai wa batho ka bontši. Gomme a lla. Go e na le pefelo le lehloyo, a itemogela nakwana ya kgaugelo – kgaugelo ye e bego e sa mo swanela.

O a lemoga gore rena, gape, re be re le lešing la lehu pele Jesu a re fa kgaugelo ye e bego e sa re swanela, mengwaga e, 2 000 ya go feta ge A e hlokafala sefapanong?

Ekaba go na le motho bophelong bja gago (a phela goba a hwile) yo a go kwešitšego bohloko kudu moo o hwetšago go le boima gaešita le go nagana gore o ka kgona go mo lebalela? Mohlomongwe, lebaka le legolo la gore o sa nyake go lebalela, ke gobane o nagana gore tebalelo ya gago e tla lokolla motho yoo, mola wena o swanetše go kgotlelela bohloko bja go kwešwa bohloko ke bona? Se ke se lenaba le nyakago gore re se dumele. O tla dira se sengwe le se sengwe go thibela tiro goba kgopolo ya tebalelo; o tseba gore pelo e e sa lebalelego e baka pefelo le lehloyo, a hlola lepheko tswalanong ya rena le Modimo.

Tebalelo e bohlokwa kudu go Modimo, eupša kudu go batho. Go Mateu 6:14-15 Jesu o re: “Ge le lebalela ba bangwe diphošo tše ba le šitelago ka tšona, Tatagolena wa legodimong le yena o tla le lebalela tša lena. Eupša ge le sa lebalele ba bangwe diphošo tša bona, gona le Tatagolena a ka se le lebalele tša lena.” Tebalelo ya rena go ba bangwe e bontšha, go Modimo, gore re fa Yena taolo ya maphelo a rena. Re swanetše go gopola gore ke Moahlodi wa go loka (Pesalome 7:11), yo ka nako ya Gagwe le tsela a tlišago kahlolo. Ge re lebalela, ga re itokolle fela, eupša gape re tsošološa tswalano ya rena le Modimo, ka ge lepheko la go se lebalele le tlošitšwe.

Gopola, Jesu o re neile mogau. Bjale, re ka ba le bophelo bjo bo sa felego. A re fe Modimo sebaka sa go matlafatša yo mongwe le yo mongwe wa rena, ka Moya wa Gagwe wo Mokgethwa, gore re kgone go lebalela. Re ka makatšwa ke tsošološo ye e e tlišago tswalanong ya rena le Yena. Modimo a go šegofatše.