Batamela kgauswi le Modimo – Letšatši la 4

Babadi ba mmalwa ba rometše potšišo ya go swana ka emeile mengwaga ya go feta: “Nka dula ke nagana gabotse bjang nakong ya sehla sa ge ke letetše katlego bophelong bja ka? Ke thibela bjang go lahlegelwa ke tumelo?” Ke nyaka go bolela ka tshwantšho le lena ye ke holofelago gore e tla le hlohleletša nakong ya sehla sa ge o letetše, ka tsebo ya gore Modimo o kwa thapelo e nngwe le e nngwe ye o e rapelago.

Tshwantšho: Akanya, nakwana, o na le lepotlelo la plastiki gomme o na le meetse a ditšhila, a maso ka letsogong la gago. Se se emela maemo ao a kholofologo bophelong bja gago ao ka dinako tše dingwe a tšhošetšago go go gateletša.

Bjale, thibolla lepotlelo. Ka tsela e swanago, re hloka go tloša dithibelo tša rena go Modimo le go dumelela Yena go go makatša ka bokgoni bja Gagwe go fetola boemo bja gago.

Bjale, bea lepotlelo la meetse a maso a ditšhila, ntle le sethibo, ka tlase ga pompi gomme o bulele pompi gore meetse a go hlweka a tsene ka lepotlelong. Se ke se se diregago ge re thoma go rapela ka ditlhohlo tša rena. Re dumelela Modimo go “tsena” ka gare ga memo a rena a leswiswi go ka a fetola. Mathomong, meetse ka lepotlelong e ka ba a maso a ditšhila metsotso e mmalwa, le ge meetse a go hlweka a tsena ka lepotlelong. Go bjalo ka nako ya rena ge re letetše. Re rapela ka ditlhohlo eupša ge re sa bone phetogo le semeetseng, re belaela ge e ba Modimo o kwa dithapelo tša rena. Lega go le bjalo, ge re dumelela meetse a go hlweka go tšwela pele a tsena ka gare ga lepotlelo, re tlo itemogela nako moo meetse a go hlweka a tlago ntšha meetse ka moka a ditšhila, a re tlogela ka lepotlelo le le tletšego ka meetse a go hlweka. Ye ke nako ya rena ya katlego – nako ye Modimo a utollago maatla a Gagwe go rena.

Ke eng ditlhohlo tša gago lehono? Bothata bja ditšheletše, molekani yo a sa dumelego, tumo ya go ba le ngwana, tsošološo ya lenyalo, phodišo go temalelo? Gopola, barongwa ba kgoboketša dithapelo tša rena ka moka ba di iša setulong sa bogoši sa Modimo (Kutollo 8:4). Modimo o tseba se o se hlokago. Ka dinako tše dingwe, re swanetše go lesa go lwa ka maatla a rena re tshephe Modimo gore a šome. Go Pesalome 46:10 re bala gore: “Lesang go lwa, mme le tsebe gore ke nna Modimo. Ke nna Kokamaditšhaba, ke nna Kokamalefase.” Go Baefeso 3:20 re bala gore: “Yena a kgonago go dira tše di fetago kudu tše re kago di kgopela goba ra di nagana, ka maatla a gagwe a a šomago mo go rena …”

Nakong ya ge re letetše, re na le monyetla wa go tseba semelo sa Modimo ka tsela e mpsha, ka ge gantši go le sehla moo a lekago dimelo tša rena. A re fenyeng teko le go tšwela pele go rapela. Nako yeo meetse a hlwekago ka lepotlelong, mohlomongwe e kgauswi go feta ka mo o naganago. Modimo a go šegofatše.