Batamela kgauswi le Modimo – Letšatši la 16

Ke mang motho wa pele yo o mmotšago ditaba tše botse? Mogwera? Batswadi ba gago? Molekani wa gago? Goba o di keteka le Modimo? Mohlomongwe, ke botšiše: Ekaba o a gopola go leboga Modimo ge o amogela ditaba tše botse?

Dinakong tša pelaelo, manyami goba mathata, go bonolo go rapela Modimo – le ba go se dumele ba bitša Modimo go ba thuša dinakong tša tlalelo. Lega go le bjalo, re swanetše go gopola gore Modimo o duma go lebogwa dinakong tše botse, bjalo ka ge A nyaka go thuša dinakong tše boima. Go Baefeso 5:20 re bala gore: “Ka ge le le ba Morena wa rena, Jesu Kriste, ka mehla le leboge Modimo, Tatagorena, ka lebaka la tšohle.”

Go leboga go thoma ka maitshwaro a rena. Motho yo mongwe le yo mongwe lefaseng o na le se a ka se lebogago. Bothata ke gore, re swarega kudu dikatanong tša rena mo e bago selo se le noši se re se naganago goba go bolela ka sona, gomme re fetwa ke tšohle.

Gaešita le nakong ya bothata bjo bogolo maphelong a rena, re ka gomme re swanetše re leboge Modimo. Paulose o re gopotša gore ge re dira se, re laetša tumelo ya rena go Modimo, re tseba gore O šoma re sa mmone go re tlišetša katlego ye re e hlokago. Go Bafilipi 4:6-7 re bala gore: “Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.”

O leboga eng lehono? Go phela gabotse ga gago mmeleng? Lapa la gago? Mošomo wa gago? Bokgoni bja gago bja go kwa le go bona? Ekaba o lebogile Modimo ka dilo tše?

Ge re thoma go leboga Modimo letšatši le letšatši ka selo se tee, e se kgale re tla hwetša dilo tše dingwe tše ntši tše re kago leboga ka tšona. Gomme mohlomongwe, nako e e tlago ge re amogela ditaba tše botse goba katlego, re tla gopola gore ke mpho go tšwa go Modimo le go leboga Yena pele. Modimo a go šegofatše.