Batamela kgauswi le Modimo – Letšatši la 15

Ekaba e sa le wa ikhwetša ka gare ga maemo a a boifišago mo Modimo fela a kago go thuša? Mo ke bopaki ka mongwadi, Carina Stander, bja boitemogelo bjo ba bilego le bjong mengwaga e mmalwa ya go feta:

Carina: “Ka pejana morago ga ge monna wa ka, Gerrit, le nna re nyalane, re tsošitše ke lešata mesong e mengwe ka bo-03:00 mojakong wa ka pele wa kotase ya rena, kua Hout Bay. Gerrit a tsoga go yo bona gore ke eng. Ge ke ekwa ntwa kua mojako, ke tsebile le semeetseng gore ke mahodu. Ka tšwa ka kamoreng ya rena ya go robala ka lefestere gomme ka yo nyaka thušo ntlong ya mong wa lefelo la madulo, kgauswinyana.

“Ge ke le gare ke opaopa lemating la mong wa lefelo la madulo, gateetee ka lemoga kotsi ye e bego e le kgauswi le go direga. Ke be ke sa tsebe gore mahodu a hlabile Gerrit gomme a mo tlogela kotaseng ya rena, pele a nkitimiša. Ka potologa go hwetša yo mongwe wa mahodu yo a bego a le metara o tee kgauswi le nna. O be a swere tšhipi, a ikemišeditše go mpetha. Mengwaga pele ga tiragalo ye, ke itlwaeditše go tšea taolo ka leina la Jesu Kriste, ge selo sa go swana le se se be se ka direga.

“Nakong yeo, ke itemogetše maatla le bogona bja Modimo, gomme ke šupile lehodu ka monwana ka re: ‘Ka leina la Jesu Kriste, o ka se nkgome!’ A makala kudu sefahlegong sa gagwe, a lahlela sebetša sa gagwe fase. Mahodu a mangwe a mabedi a kitimela ka pejana kgauswi le monna yoo gomme, gape, ka goelela mantšu a go swana go bona. Le bona ba gagarela ka tlhagišo ya go makala difahlegong tša bona, o ka re ba bone selo se nna ke sa se bonago. Ka metsoswana e mmalwa, banna ba bararo ba sokologa gomme ba tšhaba.

“Re išitše Gerrit bookelong, ka mahlatse, go be go se le e tee ya dintho ye e bego e le šoro. Morago letšatšing leo, re maketše ge mogwera go tšwa Tshwane, yo a sa tsebego se se re hlagetšego, a founa go tseba ge e ba re gabotse. A re botša gore o bile le toro e mpe bošegong bja go feta. Torong yeo, nna le Gerrit re be re sepela molaleng ge dikolobe tše tharo tša nageng di tšwelela di re hlasela. Di be di le kgauswi le go re bolaya ge a tsoga. Gomme a thoma go rapelela polokego ya rena a tiišitše. E be e le iri ya 03:00 mesong yeo – nako ya tlhaselo. Maphodisa morago a golegile bahlasedi gomme ba hwetša gore tlhaselo e be e tswalanywa le dihlopha tša bosenyi. Maikemišetšo a tlhaselo e be e le go nkata. Modimo o ntšhireleditše. Ga go tumišwe Yena!”

Carina o nepile. Ge Jesu a fenya bobe sefapanong, o ri file maatla a go dira ka mo go swanago. Go Lukase 10:19 re bala gore: “Theeletšang! Ke le fa maatla a gore le gate dinoga le diphepheng, le a gore le fenyetše Sathane sa ruri; gomme ga go se se tla tsogago se le dirile selo.” Ge re laela lenaba go tšhaba “ka leina la Jesu Kriste”, ke ge e ba Jesu ka boYena o fa taelo yeo. Gape, go Pesalome 91:11 re bala gore: “Modimo o tla laela barongwa ba gagwe gore ba go hlokomele, ba go šireletše gohle mo o yago gona.” Go 2 Dikgoši 6:16-17, moprofeta Elisha le mohlanka wa gagwe ba be ba feta ke lenaba ka palo leo le bego le le kgauswi le go ba hlasela. Mohlanka a boifa, eupša theeletša mantšu a Elisha ge a bolela le mohlanka: “O se ke wa boifa. Re na le batho ba bantši ba ba emego le rena go feta ba ba emego le bona.” Gomme, Elisha a rapela gore Modimo a bule mahlo a mohlanka go bona thaba e tletše dipere le makoloi a ntwa a mollo go ba dikologa go laetša gore Modimo o be a ba šereleditše. O sa dira ka mo go swanago go rena lehono.

Nka se makale ge bahlasedi ba bararo ba bone barongwa kgauswi le Carina bošegong bjoo – mohlomongwe seo se fetotše maphelo a bona go ya go ile. A re batameleng kgauswi le Modimo maemong a a boifišago, ka tsebo ya gore le rena re na le taolo go bobe, ka lebaka la se Jesu a se dirilego sefapanong. Modimo o re šireletša ka lebotho la dipere le makoloi a mollo, gomme barongwa ba Gagwe ka nnete ba re dikologile. Modimo a go šegofatše.