A ka kgona … – letšatši la 13

Ka go arabela sengwala sa go feta, mmadi o botšišitše potšišo ye e latelago: “Ke kwešiša bohlokwa bja go bala Bibele, eupša ke katana le go rapela? Go bonala eke go na le lepheko. O ka nthuša?”

Nagana nakwana ka noka. Le ge meetse mathomong a elela ka lebelo, go ka direga gore makale, mahlare le mobu le gaešita matlapa a gogolwa le yona. Ge e fihla tsejaneng e tshese lebatong la noka, mogogolwa o baka lepheko leo le dirago gore meetse a sepele ka go nanya le gaešita go emiša meetse.

Maphelong a rena, moela wa Moya wo Mokgethwa o ka bapetšwa le meetse lebatong la noka. Ka dinako tše dingwe lentšu la Modimo le hlakile. Dinakong tše dingwe, re katana le go le kwa ka lebaka la “mogogolwa” wo o bakago mapheko maphelong a rena. Mapheko a direga ka sebopego sa pefelo, pelo ye e sa lebalelego, boikgogomošo, dibe tše di dirwago ka boomo tšeo re sa di bolelego, go se obamele taelo ya go tšwa go Modimo goba gaešita le borabele kgahlanong le Modimo. Di re tšeela tokologo ya rena ya go bolela le Modimo – le gaešita bokgoni bja rena bja go kwa lentšu la Moya wo Mokgethwa.

Lega go le bjalo, go na le mogau le tebalelo ge re kgona go bona mapheko ao, re fetoga gape re fapoga go wona. Go 2 Dikronika 7:14-15, Modimo o re, “Ge ba ka nthapela ba ikokobetša ba tla go nna gomme ba tlogela ditsela tša bona tše mpe, gona ke tla ba kwa ke le legodimong, ka ba lebalela dibe, gomme ka boetša naga ya bona sekeng sa yona. Bjale ke tla diša Tempele ye gomme ka theetša dithapelo tša batho ba ba rapelago mo.” Go Jeremia 33:3, Modimo o re, “Ntlhaeletše, mme ke tla go araba.” Gomme go 2 Dikronika 16:9 re bala gore: “Morena o phela a lebeledišitše lefase ka moka go maatlafatša bao ba mo tshephilego ka dipelo tša bona ka moka.”

Modimo o nyaka go bolela le rena. A re inameleng lebatong la noka gomme re tloše “makala, matlakala, mobu le maswika” maphelong a rena ao a bakago ditšhitišo tswalanong ya rena le Modimo. Re ka makatšwa ke ka fao Lentšu la Gagwe le kago kwagala le go hlaka ka gona. Modimo a go šegofatše.

Mošomo wa letšatši. Tšea pene le pampiri gomme o dule ka pelo ye e bulegilego go Modimo. Kgopela Yena gore a go laetše ge e ba go na le selo se se bakago lepheko magareng ga gago le Yena. Se ngwale fase. Se bolele gomme o kgethe go fapoga go sona.