Pesalome 90

₁Wena Morena,

o bile setšhabelo sa rena go tloga melokong ya kgalekgale.

₂Pele o bopa dithaba,

o hlola le lefase,

o be o le Modimo wa neng le neng,

gomme o Modimo go ya go ile.

₃O laela motho gore a boele a be se a bego a le sona;

o mo fetoša lerole gape.

₄Mengwaga ye sekete go wena e swana le letšatši la maabane le le fetilego ka pela;

e bjalo ka seripana sa nako ya bošego.

₅O re gogola bjalo ka lefula;

re feta lefaseng bjalo ka toro.

Re bjalo ka mphoka wo o hlogago mosong,

₆wa gola wa thunya matšoba,

mantšiboa wa pona wa omelela.

₇O re fediša ka pefelo ya gago;

re tšhošwa ke ge o tuka bogale.

₈O bea makgopo a rena pele ga gago,

dibe tša rena tša sephiring

wa di anega mo o kgonago go di bona.

₉Bophelo bja rena bo kgaotšwa ke pefelo ya gago;

bo fela bjalo ka tshebelano.

₁₀Re phela mengwaga ye masome a a šupago,

ye masome a seswai ke ge re na le lerapo;

go le bjalo bontši bja yona ke ya tapišego le tlaišego;

bophelo bo fela ka pela,

ya ba gona ge re ile.

₁₁Ke mang yo a kilego a kwa bogale bja pefelo ya gago?

Ke mang yo a tsebago gore kgalefo ya gago e boifega bjang?

₁₂Re rute gore bophelo bja rena ke bjo bokopana bjang,

gore re tle re hlalefe.

₁₃A o tla re befelelwa go fihla neng, Morena?

Hle, šokela bahlanka ba gago!

₁₄Mosong wo mongwe le wo mongwe o re tlatše leratorato la gago,

gore re dule re opela mme re thabile bophelong bja rena ka moka.

₁₅Re fe lethabo le le lekanago le mathata ale o ilego wa re rweša ona mengwageng yela ya masetlapelo a rena.

₁₆Nke rena, bahlanka ba gago,

re bone ditiro tša gago,

le ditlogolo tša rena di bone letago la gago le legolo.

₁₇Morena, Modimo wa rena,

re lebelele ka botho;

re atle go tše re di dirago;

hle, go tše re di dirago re atle!