Pesalome 73

₁Ruri, Modimo o loketše Baisraele,

o loketše ba pelo tše di hlwekilego.

₂Nna ke nyakile ke feletšwe ke tshepo ya gore Modimo o lokile,

ka ba ka thoma go belaela,

₃gobane ke be ke hufegela baikgantšhi,

ke bona ka mo bakgopo ba atlegago ka gona.

₄Ga ba na sa go ba kweša bohloko,

ba a letlega, ba ja gabotse.

₅Ga ba na mathata bjalo ka batho ba bangwe,

ebile ga ba tlaišwe ke selo go etša bangwe.

₆Ba apara boikgantšho boka pheta,

le kgaphamadi go etša kobo.

₇Ba khutlogile mahlo ka go nona,

ba dula ba bolela ka dipelo.

₈Sa bona ke go gegea batho le go ba senya maina;

ba bolela ka boikgantšho le tšhošetšo.

₉Ba bolela bobe ka Modimo wa legodimong,

le motho yo mongwe le yo mongwe ba mmolela gampe.

₁₀Ke ka lebaka leo badumedi ba kgelogelago go bona,

ba inyorollago ka tšohle tše ba di bolelago.

₁₁Ba re:

“Modimo a ka di tseba bjang?

Ragodimodimo a ka lemošwa ke eng?”

₁₂Ke ka mo bakgopo ba lego ka gona;

ke bomohlokamathata ba go ikgobelela mahumo.

₁₃Bjale go nthušang go itlhwekiša pelo

le go ipea kgole le sebe?

₁₄Ke hlwela go bethwa letšatši ka moka;

ka mehla ke tsoga ke solwa.

₁₅Ge nkabe nkile ka re:

“Ke tla bolela bjalo ka bona,”

ke be ke tla be ke hlanametše batho ba gago.

₁₆Ke lekile go nagana ka taba ye gore ke e kwešiše,

fela ya ntšhita,

₁₇ka ba ka ya Felong mo Gokgethwa ga Modimo,

ya ba gona ke lemogago se se tlago ba hlagela.

₁₈Ruri, wena o ba beile matheleding,

wa ba thedimoša ba wa, ba hwa.

₁₉Ba swieletšwe ka go ponya ga leihlo,

ba fedišwa taa ka dikotsi tša bjako.

₂₀Morena, ba etša toro ge motho a phafogile;

wena ge o phafoga o phaela toro yeo thoko.

₂₁Mola ka pelo ke tsota,

mola ke kgopišegile kudu,

₂₂ke be ke šilofetše,

ke sa kwešiše selo,

mme ke go dira tša bophoofolo.

₂₃Fela ke dula ke na le wena,

mme wena o dula o ntshwere ka seatla sa la go ja.

₂₄O ntlhahla ka keletšo ya gago;

ka morago o tla nkamogela wa nkgodiša.

₂₅Ke eng se ke nago naso legodimong ntle le wena?

Gomme ge wena o le wa ka,

lefaseng ga go sa na se ke se nyakago.

₂₆Le ge nka palelwa mmeleng le moyeng,

Modimo yena ke maatla a ka;

ke wa ka go ya go ile.

₂₇Ba ba lego kgole le wena ba tla tlošwa tšatšing;

bohle ba ba sa go botegelego o tla ba fediša.

₂₈Nnaena ke loketšwe ke go ba kgauswi le Modimo.

Mong wa ka, Morena,

ke yena setšhabelo sa ka,

gomme ke tla anega ditiro tšohle tša gagwe.