Pesalome 68

₁Ge Modimo a emelela,

manaba a gagwe a a phatlalala.

₂O ba nyametša boka muši ge o nyamela;

bjalo ka motu ge o tološwa ke mollo,

bakgopo le bona ba hwa bjalo pele ga Modimo.

₃Baloki bona ba a thaba,

ba hlalala pele ga gagwe,

ba gobela megobo ba thakgetše.

₄Opelelang Modimo,

le mo opeleleng direto,

monamelamaru le mo kgoreleng tsela.

Leina la gagwe ke Morena;

gobang mogobo mo pele ga gagwe!

₅Ke yena raditšhiwana,

molotabahlologadi;

o madulong a gagwe a makgethwa.

₆Balahlegi o ba dudiša ka magaeng,

bagolegwa o a ba lokolla a ba atla,

mola dinganga tšona di dula lesehleng.

₇Modimo,

mola o etšwa o etile setšhaba sa gago pele,

mola o phatša lešoka, Sela

₈lefase le ile la šikinyega,

legodimo la tloromiša pula ge Modimo a etla,

yena wa Sinai, Modimo wa Baisraele.

₉O ile wa tloromiša pula ya medupi,

wa lapološa naga ya gago ye e omilego.

₁₀Setšhaba sa gago sa dula go yona;

ka botho bja gago, wena Modimo,

wa babalela bahlaki.

₁₁Mong wa rena a bega taba,

ya phatlalatšwa ke basadi ka bontši e re:

₁₂“Magoši le madira a bona ba a tšhaba,

ba a tšhaba!”

Basadi kua gae ba abaganya dithebola tše

₁₃bjalo ka diswantšhobopša tša maeba tše di manegilwego diphego ka silibera,

le mafofa ka gauta ya motswako,

ge banna bona ba ipatlametše kua mašakeng.

₁₄Mohla wola Ramaatlaohle a phatlalatša magoši nageng,

thabeng ya Tsalmone go ile gwa wa lehlwa.

₁₅Na e kaakang thaba ya Bashane!

Ruri, ke thaba ya dintlhoratlhora!

₁₆Hee, wena thaba, radintlhoratlhora,

o reng o gerula thaba ye Modimo

a ikgethetšego go dula go yona?

Morena o tla dula gona go ya go ile.

₁₇Ge Modimo,

Mong wa bohle, a etla ka sekgethwakgethweng sa gagwe a etšwa Sinai,

dikoloi tša gagwe tša ntwa di be di sa balwe,

e le diketekete.

₁₈Wena, Morena Modimo,

o rotogetše thabeng ye e phagamego gore o tle o be le bodulo;

wa tloga le mathopša a mantši,

wa amogela dimpho,

ešita le tša batho ba dinganga.

₁₉A go tumišwe Mong wa bohle,

yo a re pepago letšatši ka letšatši,

yena Modimo, Morephološi.

₂₀Modimo wa rena ke wa go re phološa;

Morena, Mong wa rena,

o re hlakodiša lehung.

₂₁Modimo o tla pšhatla manaba a gagwe dihlogo,

e lego banna ba ditšhitšhi bao ba ganelelago tseleng tša bona tše mpe.

₂₂Mong wa bohle o rile:

“Ke tla ba gomiša Bashane;

ke tla ba gomiša ka bodibeng bja lewatle,

₂₃gore o ine maoto mading a bona,

le dimpša tša gago di a latswe ka mo di ratago.”

₂₄Modimo, batho ba hlalela melokoloko ya gago,

melokoloko ya Modimo wa ka, Kgoši ya ka,

ge a eya Felong ga gagwe mo Gokgethwa.

₂₅Baopedi ba etile pele,

baletši ba ka morago,

mo gare ke banenyana ba go letša meropa.

₂₆Tumišang Modimo le na le phuthego yohle ya gagwe!

Retang Morena,

lena ditlogolo tša Jakobo.

₂₇Šebaowe ba kgorwana ya Benjamene,

ba eteletše pele;

ba latelwa ke baetapele ba Juda ba ba hlabilego legoa,

gwa latela baetapele ba Sebulone le ba Naftali.

₂₈Bontšha maatla a gago, Modimo,

ona maatla ale o a šomišeditšego go re thuša

₂₉o le Tempeleng ya gago Jerusalema,

moo magoši a go tlišetšago diloba.

₃₀Kgalema sebata sela sa lehlakanoka;

kgalema ditšhaba,

e lego mohlape wa dipoo le manamane,

tša ba ba go khunamelago ba swere dibego tša silibera.

Phatlalatša ditšhaba tša bontwadumela!

₃₁Go tla tla batseta ba go tšwa Egepeta;

Baetopia ba tla lotšha Modimo.

₃₂Opelelang Modimo,

lena mebušo ya lefase;

le opeleleng Mong wa bohle direto,

₃₃yena monamelaratadima,

ratadima la kgale.

Theeletšang ge a kwatša lentšu le maatla.

₃₄Begang maatla a Modimo;

bogoši bja gagwe bo okametše Baisraele,

gomme maatla a gagwe a kua leratadimeng.

₃₅Modimo o a boifiša ge a ikutolla sekgethweng sa gagwe,

yena Modimo wa Baisraele!

Ke yena a fago setšhaba sa gagwe maatla le bonatla.

A go tumišwe Modimo!