Pesalome 64

₁Hle, Modimo,

nkwe ge ke go llela;

ke tšhaba lenaba,

ntšhireletše ke se bolawe.

₂Ntšhireletše ge bakgopo ba ntakane,

ge badiratšempe ba tsoša mašata.

₃Ke bona ba go lootša maleme boka ditšhoša,

ba hlaba ka mantšu a bohloko a nkego mesebe.

₄Ba thuntšha mohlokabosodi ba mo laletše;

ba mo thuntšha ka potlako ba sa boife.

₅Ge ba loga maanomabe ba a hlohleletšana;

ba lakana go thea difu ba sa bonwe, ba re:

“Re tla bonwa ke mang?”

₆Ba a lakana ba re:

“Re logile maanomaano.”

Ruri, tša ka monaganong le tša ka pelong ya motho ga di tsebje.

₇Fela Modimo o ba thuntšha ka mesebe,

mme ba ikhwetša ba gobetše.

₈Ba itahla ka tše ba di bolelago,

mme bohle ba ba ba bonago ba šikinya dihlogo ba kgotsa.

₉Batho bohle ba tla gakgamala,

ba bega ditiro tša Modimo,

mme ba kwešiša gore o di diretšeng.

₁₀Baloki ba tla thabela tše di dirilwego ke Morena mme ba tšhabela go yena;

bohle ba dipelo tše di lokilego ba tla mo reta.