Pesalome 18

₁mme a re: Ke go rata bjang, Morena, wena maatla a ka!

₂Morena ke setšhabelo sa ka;

ke sebo sa ka le mophološi wa ka.

Ke Modimo wa ka le botšhabelo bjo ke tšhabelago go bjona.

Ke kotse ya ka,

ebile ke montlhabanedi,

ke bokhuto bja ka.

₃Ke bitša Morena yo a lebanwego ke go tumišwa,

a mphološa manabeng a ka.

₄Ke be ke rarilwe ke ditlemo tša lehu;

ke tšhošwa ke tahlego ye nkego mafula.

₅Ke be ke tateditšwe ke dithapo tša bodulabahu,

mme ke theilwe ka melaba ya lona lehu.

₆Tlalelong yeo ya ka ka bitša Morena,

ka bitša Modimo wa ka gore a nthuše.

A kwa lentšu la ka a le Tempeleng ya gagwe,

a theetša ge ke mo llela.

₇Lefase la šišinyega, la roromela,

metheo ya dithaba ya reremela,

ya tekateka,

ka gobane Modimo o be a befetšwe.

₈A thuntšha muši ka dinko;

molomong wa gagwe gwa lauma kgabo;

magalamahubedu a tšhologa go yena.

₉A sekamiša legodimo a theogela fase,

maru a masomaso a le ka fase ga maoto a gagwe.

₁₀O fofile a rwelwe ke mokerubi,

a akaletše ka diphego tša phefo;

₁₁a ipipeditše ka leswiswi;

a dikaneditšwe ke marumaso a a tletšego meetse.

₁₂Mo letagong la gagwe gwa tšwa sefako le magadima go putla maru.

₁₃Morena a kidimetša legodimong,

gwa kwala lentšu la Ramadulagodimodimo.

₁₄A betša mesebe ya gagwe,

a šwalalanya manaba a gagwe;

a bekentšha magadima a ba tšhoša ba tšhaba.

₁₅Lebato la lewatle la šala molaleng,

metheo ya lefase ya apoga ge wena, Morena,

o kgala manaba a gago mme o ba tšubotla ka ledimo.

₁₆Nna a nkobelela ka letsogo a le godimo a ntshwara;

a nkinola bodibeng.

₁₇A mphološa manabeng a ka a maatla le go bantlhoi bohle –

ba be ba mpheta kudu ka maatla.

₁₈Mola ba ntlhasela ke ile ka ba bothateng,

eupša Morena ya ba lehlotlo la ka.

₁₉O ile a nntšha kotsing;

a mphološa ka gobane ke be ke mo kgahla.

₂₀Morena o mputsa go ya ka go loka ga ka;

o a ntšhegofatša ka gobane ga ke na molato.

₂₁Ke obametše melao ya Morena;

ga se ka hlanamela Modimo wa ka.

₂₂Ke phethile melao ya gagwe ka moka;

ga se ka nyatša ditaelo tša gagwe.

₂₃O tseba gore ga ke na phošo,

le gore ke ithibetše go dira tše mpe.

₂₄Morena o mputsetša go loka ga ka,

ka ge a bona go se phošo ye ke e dirilego.

₂₅Wena, Morena,

o botegela bagoboti,

ebile o lokela bao ba lokilego.

₂₆O hlweketše bao ba hlwekilego,

mme go baikaketši o itira moikaketši.

₂₇O phološa baikokobetši,

o kokobetša baikgantšhi.

₂₈Wena, Morena,

o mphediša ka boiketlo;

wena, Modimo wa ka,

o ntlošetša mathata a ka ka moka.

₂₉O mpha maatla a go hlasela manaba a ka,

le a go tshela morako wa motse wa bona.

₃₀Ditiro tša Modimo yo di lokile kudu,

mantšu a gagwe a hlwekile.

O bjalo ka kotse go bohle bao ba nyakago a ba šireletša.

₃₁Morena a le noši ke Modimo;

Modimo a nnoši ke setšhabelo sa rena.

₃₂Modimo yo o a ntiiša,

o nthuša go phela ke se na bosodi.

₃₃O nkgontšha go kitima bjalo ka tshephe;

o nkemiša ke fentše kua mebotong.

₃₄O nthuta go lwa

gore ke tle ke šomiše mosebe wo maatlamaatla.

₃₅Wena, Morena,

o a ntšhireletša wa mpoloka;

o nthekga ka maatla a gago;

ka thušo ya gago ke na le seriti.

₃₆O nkgontšhitše go tšhabela manaba a ka,

gomme ga se ka thetšwa.

₃₇Ke lelekiša manaba a ka ka a swara;

ga ke gome ke sešo ka a feleletša.

₃₈Ke a ba kgitla mme ba se kgone go tsoga;

ba rapalala pele ga ka.

₃₉O mpha maatla a ntwa,

wa nkgontšha go fenya manaba a ka.

₄₀O dira gore manaba a ka a hlanole direthe,

le gore bantlhoi ke ba feleletše.

₄₁Ba hlaba mokgoši,

eupša ba hloka molamoledi;

ba llela Morena,

eupša ga a ba fetole.

₄₂Ke a ba šilaganya ba fetoga lerole la go tšewa ke phefo;

ke ba gataka bjalo ka leraga mekgotheng.

₄₃O mphološitše diphapanong tša setšhaba sa ka,

wa ntira mmuši wa ditšhaba;

setšhaba se ke bego ke sa se tsebe bjale ke sa ka.

₄₄Bašele ba ithapeletša go nna;

ge ba ekwa ke bolela,

ba a ntheetša.

₄₅Ba nolega moko gomme ba tšwa dibong tša bona ba thothomela.

₄₆Morena o a phela!

Tumišang mošireletši wa ka!

Godišang Modimo yo a mphološitšego!

₄₇O ntefeletša manabeng a ka;

o mphenyetša ditšhaba,

₄₈gomme o mphološa manabeng a ka.

Wena Morena,

o gafela manaba a ka diatleng tša ka,

wa mphološa banneng ba dintwa.

₄₉Ka gona ke go reta gare ga ditšhaba;

ke go opelela ditumišo.

₅₀Modimo o kgontšha kgoši ya gagwe go fenyetša manaba a gagwe sa ruri;

o rata Dafida, motlotšwa wa gagwe,

le ditlogolo tša gagwe go ya go ile.