Pesalome 15

₁Morena, ka Tempeleng ya gago go ka tsena mang?

Ke mang a ka rapelago Sione,

thabeng ya gago ye kgethwa?

₂Ke yo a phelago a se ne bosodi,

a dirago tše di lokilego,

a bolelago therešo ka pelo ya gagwe ka moka,

₃a sa senyego batho maina.

Ke yo a sa phošetšego bagwera ba gagwe,

le gona a sa tšamego a seba batho.

₄Ke yo a nyatšago bao ba lahlwago ke Modimo,

eupša bao ba boifago Morena bona a ba hlomphago,

yo ka mehla a phethago se a se tshephišitšego,

le ge e ka ba se sethata bjang le bjang.

₅Ke yo a sa adimišego tšhelete ka go e tswadiša,

yo a sa rekwego go phara yo a se nego molato.

Yo mobjalo a ka se tlalelwe.