Pesalome 14

₁Mašilo ka pelong a re:

“Modimo ga a gona.”

Ba dira bokgopo le tše di šiišago –

ga go le o tee modiratoka.

₂Morena yena o lebeletše batho a le legodimong,

gore a bone ge eba go na le wa temogo,

yo a mo khunamelago.

₃Eupša bohle ba kgelogile, ka moka ba senyegile.

Ga go le o tee modiratoka,

ee, le o tee ga a gona.

₄Morena o a botšiša o re:

“A badirakgopo bohle ba ga ba tsebe selo?

Ba phela ka go radia setšhaba sa ka,

le gona ga ba nthapele, nna, Morena.”

₅Eupša ba tla thothomela ka letšhogo,

gobane Modimo o ema le baloki.

₆Badirakgopo ba leka go folodiša merero ya batlaišegi,

fela botšhabelo bja batlaišegi bao ke Morena.

₇A Sione go tšwe phološo ya Israele!

Mohla Morena a bušetšago setšhaba sa gagwe sekeng sa sona,

ditlogolo tšeo tša Jakobo di tla gobela megobo;

setšhaba sa Israele se tla hlalala.