DIEMA 6

₁Ngwanaka,

ge o itlemile go lefela motho molato wa gagwe

ge yena a palelwa,

ge o ikanne go lefela motho yo a jetšego molato mpeng,

₂ge o tantšwe ka tše o di boletšego,

ge mantšu a gago e bile moreo go wena,

₃gona o wetše ka diatleng tša motho yoo.

Go intšha bothateng, ngwanaka,

o dire ka mokgwa wo:

O akgofe o ye go yena,

o mo rapele.

₄O se robale, o dule o phafogile.

₅O itlhakodiše bjalo ka tshephe go motsomi,

goba bjalo ka nonyana sefung sa morei.

₆Wena sebodu, eya makekeng,

o bone ka mo a phelago ka gona,

gomme o ithute ka ona.

₇Le ge a se ne moetapele,

goba molaodi, goba mmuši,

₈a ipolokela dijo selemo;

a ikgobokeletša mefago ge go bunwa.

₉Sebodu towe, o tla robala go fihlela neng?

O tla tsoga neng?

₁₀Sona se fetola ka go re:

“Ke sa nyaka go robala gannyane, ke bo re šwaa,

ke phuthe matsogo, ke bo fokotše gosenene.”

₁₁Ge o ka no pompala,

bodiidi bo tla go phuthuma

bjalo ka mohlakodi,

mohlako wa go tsetsela bjalo ka mokgopedi.

₁₂Motho wa senokwane, wa sehwirihwiri,

ke yo a tšamago a bolela maaka,

₁₃yo a kobonyago bangwe ka leihlo,

a ngwalangwala fase ka leoto,

a šupašupa batho ka monwana;

₁₄ke yo a dulago a loga maanomabe ka pelo ya bomenetša,

a lweša batho.

₁₅Ke ka lebaka leo a tlago khukhunetšwa ke madimabe,

gateetee a hwa la pitšana.

₁₆Go na le dilo tše tshelelago

tše Morena a di hloilego,

gabotsebotse ke tše di šupago tše di mo šišimišago:

₁₇ke boikgogomošo,

le go bolela maaka,

le go bolaya ba ba se nago molato;

₁₈ke go loga maanomabe,

le lephakuphaku la go dira tše mpe;

₁₉ke hlatse ya maaka, seaketšabatho,

le twešameloko.

₂₀Ngwanaka, o phethe taelo tša tatago,

le tše o di rutwago ke mmago o se di hlokomologe.

₂₁O dule o di bolokile ka pelong ya gago,

o ikgabiše ka tšona bjalo ka pheta molaleng.

₂₂Di tla go hlahla ge o sepela,

tša go leta ge o robetše,

tša bolela nago ge o tsoga.

₂₃Ditaelo tša tatago ke lebone,

tše o di rutwago ke mmago ke seetša;

go solwa ke bona ke tsela ya bophelo.

₂₄Ke tša go go phemiša seotswa,

mosadi wa leleme le boreledi wa monna yo mongwe.

₂₅O se goketšwe ke botse bja mosadi yoo,

wa tanywa ke melebelelo ya gagwe.

₂₆Segwebakathobalo le ka senkgwa motho a ka se reka,

kganthe seotswa sona se inyakela lehumo la motho.

₂₇Kgane motho a ka gogolela mollo difarong

a se tšhume diaparo tša gagwe?

₂₈Na motho a ka gata magala a se swe dinao?

₂₉Di bjalo tša yo a robalago le mosadi wa monna yo mongwe.

Yo a mo kgomago a ka se re phankga.

₃₀Lehodu la go utswa dijo go ntšha tlala maleng

batho ga ba le sole;

₃₁eupša ge le ka swarwa le lefišwa gašupa,

le ge e ka ba ka thoto yohle ya lapa la lona.

₃₂Ge e le monna yo a otswago,

yena o itlhokiša tlhaologanyo.

Taba ya mohuta wo e dirwa fela ke moipolai.

₃₃O tla papatlwa, a hlomphollwa;

o tla gobošetšwa sa ruri;

₃₄gobane lehufa le galefiša monna;

ge a itefeletša ga a na lešoko.

₃₅Ga a amogele phophotho, ga a fepeletšege,

ešita le ge e ka ba ka mpho ye kaakang.