MATEU 14

₁Ka nako yeo Kgoši Heroda a kwa ka ga Jesu. ₂A botša bahlankedi ba gagwe a re: “Ruri, yo ke Johanese Mokolobetši, o tsogile bahung. Ke ka lebaka leo a nago le maatla a go dira mehlolo.”

₃Gape Heroda o be a ile a laela gore Johanese a swarwe, a tlengwe, a lahlelwe kgolegong. Taba yeo o be a e dirile ka lebaka la Herodiase, mosadi wa Filipi, morwarragwe, ₄ka ge Johanese a be a mo kgadile a re: “Ga se tshwanelo gore o tšee Herodiase!” ₅Le ge Heroda a be a rata go bolaya Johanese o be a boifa Bajuda, ka ge ba be ba re ke moprofeta.

₆Fela mohla go binwa monyanya wa matswalo a Heroda, morwedi wa Herodiase a bina pele ga baeng. A kgahla Heroda ₇moo Heroda a ilego a mo enela gore o tla mo fa se a ka mo kgopelago sona.

₈Ngwanenyana, ka ge a be a hlohleleditšwe ke mmagwe, a re: “Ntlišetše hlogo ya Johanese Mokolobetši ka sebjana gonabjale.”

₉Kgoši a nyama, eupša ka lebaka la ge a be a enne pele ga baeng, a laela gore go phethwe ka moo ngwanenyana a kgopelago ka gona. ₁₀Ka fao a roma motho a yo kgaola Johanese hlogo ka kgolegong. ₁₁Hlogo yeo ya gagwe ya tlišwa go ngwanenyana ka sebjana. Yena a e tšea a e iša go mmagwe. ₁₂Barutiwa ba Johanese ba tla ba tšea setopo sa gagwe, ba yo se boloka; ke moka ba tloga ba yo botša Jesu se se diregilego.

₁₃Ge Jesu a ekwa tše di hlagetšego Johanese, a tloga fao ka leselawatle a nnoši a ikela felo mo gongwenyana mo go se nago batho. Batho ba kwa gore o ile kae, mme ba tloga metseng ya bona ba mo latela ba sepela ka maoto. ₁₄Jesu ge a etšwa ka leselawatleng a bona lešaba le legolo, a le šokela, gomme a fodiša balwetši ba bona.

₁₅Mantšiboeng ao barutiwa ba gagwe ba tla go yena ba re: “Felo mo go kgole le metse, le gona nako e šetše e ile. Botša batho gore ba ye metseng ba ithekele dijo.”

₁₆Jesu a ba fetola a re: “Ga ba swanela go tloga. Lena ba feng tša go ja.”

₁₇Bona ba mo fetola ba re: “Rena mo re swere fela dinkgwa tše tlhano le dihlapi tše pedi.”

₁₈Jesu a re: “Di tlišeng mo.” ₁₉A laela batho gore ba dule fase bjanyeng; ke moka a tšea dinkgwa tšela tše tlhano le dihlapi tšela tše pedi, a lebelela legodimong, a reta Modimo, a mo leboga. A ngwathaganya dinkgwa tšela, a di neela barutiwa ba gagwe, gomme barutiwa ba di fa batho. ₂₀Bohle ba ja ba khora. Ba kgoboketša marathana a a šetšego, mme a tlala diroto tše lesome le metšo ye mebedi. ₂₁Ba ba llego e be e ka ba banna ba dikete tše tlhano, go sa balwe basadi le bana.

₂₂E sa le semeetseng Jesu a laela barutiwa ba gagwe gore ba namele leselawatle, ba mo ete pele ba tshelele ka mošola wa letsha, mola yena a sa botša batho gore ba boele magae. ₂₃Ge a seno ba phatlalatša, a namela thaba a nnoši gore a yo rapela. Ya ba ya ba mantšiboa a le moo a nnoši; ₂₄gomme ka nako yeo leselawatle le be le šetše le le garegare ka letsheng, le akgaakgwa ke maphoto ka gobane ba be ba lebane le phefo ye e tšubutlago.

₂₅Ya re letšatši le sešo la hlaba Jesu a tla go barutiwa ba gagwe a sepela godimo ga meetse a letsha. ₂₆Ge ba mmona a sepela godimo ga meetse ba tšhoga kudu ba re: “Ke seriti!” Gomme ba hlaba mokgoši.

₂₇Jesu a akgofa a bolela le bona a re: “Betang dipelo! Ke nna – le se ke la boifa!”

₂₈Petrose a re: “Morena, ge eba ke wena, ntaele gore ke tle go wena ke sepela godimo ga meetse.”

₂₉Jesu a mo fetola a re: “Tlaa!” Ka gona Petrose a tšwa ka leselawatleng a sepela godimo ga meetse a lebile Jesu. ₃₀Eupša ya re ge a bona gore phefo e tšubutla kudu, a boifa, gomme a thoma go sobela ka meetseng. A goa a re: “Morena, mphološe!”

₃₁Gateetee Jesu a obeletša letsogo, a mo swara, a re go yena: “Wena wa tumelo ye nnyane, o reng o belaela?”

₃₂Ya re ge ba tsene ka leselawatleng phefo ya homola. ₃₃Ke moka barutiwa bale ba ka leselawatleng ba khunamela Jesu ba re: “Ruri, ke wena Morwa wa Modimo!”

₃₄Ba tshela letsha ba fihla Genesarete ₃₅moo batho ba gona ba ilego ba lemoga gore ke Jesu. Ka gona ba roma batseta tikologong ka moka ya moo go yo botša batho gore ba tliše balwetši go Jesu. ₃₆Ba mo kgopela gore balwetši ba upše ba no kgwatha morumo wa seaparo sa gagwe, gomme bohle ba ba o kgwathago ba fola.