LUKASE 23

₁Kgoro yela ka moka ya emelela ya iša Jesu go Pilato, ₂ba fihla ba mmega ba re: “Motho yo re mo hweditše a timetša setšhaba sa gaborena, a re ba se ke ba ntšhetša Kesare metšhelo, a bile a re ke yena Mesia, ke yena kgoši.”

₃Pilato a mmotšiša a re: “Kgane ke wena kgoši ya Bajuda?”

Jesu a mo fetola ka go re: “O a bolela.”

₄Pilato a botša baprista ba bagolo le lešaba la batho a re: “Nna motho yo ga ke mmone molato.”

₅Ya ba gona ba phegelelago le go feta ba re: “O ferekanya setšhaba nageng yohle ya Bajuda. O thomile kua Galilea gomme bjale o tlile mo.”

₆Pilato ge a ekwa ba bolela ka Galilea, a ba botšiša gore na kgane ke Mogalilea. ₇Ge a ekwa gore ke wa selete se se bušwago ke Heroda, a mo romela go Heroda yo le yena mehleng yeo a bego a le Jerusalema. ₈Heroda ge a bona Jesu a thaba kudu, ka gobane o be a šetše a kwele ka ga yena gomme e le kgale a nyaka go mmona. O be a holofetše gore o tla bona Jesu a dira mohlolo. ₉A mmotšiša ditaba tše dintši, fela Jesu a se fetole selo. ₁₀Baprista ba bagolo le boramangwalo ba ema ba mmega ba gaketše. ₁₁Heroda le bahlabani ba gagwe ba mo gegea ba mo kwera. Ba mo apeša kobo ya mabaibai, ba mmušetša go Pilato. ₁₂Go tloga ka lona tšatši leo Heroda le Pilato ya ba bagwera, etšwe pele ga moo ba be ba sa kwane.

₁₃Pilato a kgoboketša baprista ba bagolo le a mangwe maloko a Kgorokgolo ya Bajuda le lona lešaba, ₁₄a re go bona: “Le tlišitše motho yo mo go nna la re o timetša setšhaba. Ke mo sekišitše mo pele ga lena, gomme le e tee ya tše le mmegago ka tšona ka se e hwetše. ₁₅Heroda le yena ga se a mmona molato, ka gore o mmušeditše mo go rena. Ruri, ga go se motho yo a se dirilego se se mo dirago gore a lebanwe ke go bolawa. ₁₆Ka gona ke tla laela gore a re go bethwa ka tshelane a lokollwe.”

₁₈Lekoko lela la goa mmogo la re: “Mmolaye! O re lokollele Barabase!” ₁₉Gape Barabase yo o be a lahletšwe kgolegong ka ge a be a badilwe le bahlolampherefere motseng wa Jerusalema, e le mpherefere woo go wona go bego go bolailwe motho.

₂₀Pilato, ka ge a be a nyaka go lokolla Jesu, a hlaboša lentšu a ba kgopela gape. ₂₁Eupša bona ba fela ba goeletša ba re: “Mmapole sefapanong! Mmapole sefapanong!”

₂₂A ba botšiša la boraro a re: “E le gore o sentšeng? Gape nna ga se ka hwetša a dirile se go lebanego gore a ka se bolaelwa. Ka gona ke tla laela gore a re go bethwa ka tshelane a lokollwe.”

₂₃Bona ba fela ba goeletša ba re a bapolwe sefapanong ba ba ba tšwelela. ₂₄Pilato a ahlola Jesu ka mo ba kgopelago ka gona. ₂₅A lokolla motho yo ba mo nyakago, yena yola a bego a lahletšwe kgolegong ka lebaka la mpherefere le polao, gomme a ba gafela Jesu gore ba dire ka yena se ba se nyakago.

₂₆Ya re ge ba tloga le Jesu, ba swara monna yo mongwe wa Sirene yo leina la gagwe e bego e le Simone, a etšwa mašemong a eya motseng. Ba mo athiša sefapano sa Jesu, ba re a mo šale morago.

₂₇Jesu a ya a latetšwe ke lešaba le lentši la batho, leo gare ga lona go bego go na le basadi ba ba bego ba ithwele megono ba mo llela. ₂₈A retologela go bona, a re go bona: “Lena basadi ba Jerusalema, se lleleng nna; iteleleng, le llele le bana ba lena! ₂₉Gobane matšatši a etla ao ka ona batho ba tlago re: ‘Ba mahlatse ke basadi ba baopa, le ba ba sego ba ka ba belega, goba ba nyantšha!’ ₃₀Ke mohla batho ba tlago botša dithaba ba re: ‘Re weleng godimo!’ ba botša meboto ba re: ‘Re khupetšeng!’ ₃₁Gobane ge legong la moketla ba le dira tše, le le omilego lona ba tla le dirang?”

₃₂Le ba bangwe banna ba babedi ba dikebeka ba gapša gore ba yo bolawa le Jesu. ₃₃Ge go fihlwa felo mo go bitšwago “Legateng”, ba bapola Jesu sefapanong. Ba bapola le dikebeka tšela tše pedi, se sengwe sa ba ka letsogong la go ja, se sengwe ka go la nngele. ₃₄Jesu a re: “Tate, ba lebalele, gobane ga ba tsebe se ba se dirago!”

Ba abelana diaparo tša gagwe ka go tema. ₃₅Batho ba be ba eme moo ba lebeletše ge maloko a Kgorokgolo ya Bajuda le ona a mo kodutla a re: “O hlakodišitše ba bangwe; a a itlhakodiše ge, ge eba ke Mesia yo Modimo a mo kgethilego!”

₃₆Bahlabani le bona ba mo kwera ba mmatamela, ba mo fa beine ye bodila, ₃₇ba re: “Ge o le kgoši ya Bajuda, itlhakodiše!”

₃₈Ka godimo ga hlogo ya gagwe go be go ngwadilwe go re: “Yo ke Kgoši ya Bajuda.”

₃₉Yo mongwe wa dikebeka tšela di bego di bapotšwe moo a mo nyefola a re: “Ge o le Mesia, itlhakodiše, le rena o re hlakodiše!”

₄₀Yola yo mongwe a mo kgala a re: “Kganthe ga o tšhabe Modimo, le ge o otlwa bjalo ka yena? ₄₁Rena go re lebane, ka gobane re otlelwa se se swanelago tše re di dirilego, eupša yo yena ga go phošo ye a e dirilego.” ₄₂Ke moka a re go Jesu: “Morena, o nkgopole mohla o thoma go buša.”

₄₃Jesu a mo fetola a re: “Ruri, ke go botša gore lehono o tla ba le nna paradeising.”

_44-45E rile ka nako ya mosegare wo mogolo letšatši la fifala, naga ka moka ya aparelwa ke leswiswi go fihla ka nako ya boraro mathapama. Seširo sa ka Tempeleng sa gagoga ka bogare. ₄₆Jesu a goelela kudu a re: “Tate, ke gafela moya wa ka diatleng tša gago!” A re go realo a ikhwela.

₄₇Molaodi wa bahlabani ba lekgolo ge a bona tše di diregilego a re: “Ka nnete motho yo e be e le moloki!” Go realo ya ba gore o tumiša Modimo.

₄₈Batho ka moka ba ba bego ba kgobokane moo go tlo bogela, ba rile go di bona ba boela magae ba hlomogile pelo. ₄₉Bohle ba ba bego ba tsebana le Jesu, gotee le basadi bale ba go tla le yena ge a etšwa Galilea, ba be ba eme kgojana ba lebeletše.

_50-51Go be go na le monna yo mongwe yo leina la gagwe e bego e le Josefa wa go tšwa Arimathea, e lego motse wo mongwe wa Bajuda. Yena e be e le monna wa go loka, wa morapedi, yo a bego a letetše go bona mmušo wa Modimo o hlongwa. Le ge e be e le wa Kgorokgolo ya Bajuda, o be a se a kwana le bona morerong woo wa bona le go tšeo ba bego ba di dirile. ₅₂O ile a ya go Pilato, a fihla a mo kgopela setopo sa Jesu. ₅₃A se fološa, a se phuthela ka lešela, a se bea ka lebitleng le le bego le gwailwe leswikeng, lebitla leo ka go lona go bego go se gwa ka gwa bolokwa motho. ₅₄E be e le Labohlano, gomme Sabatha e šetše e le kgauswi.

₅₅Basadi bale ba go tla le Jesu ge a etšwa Galilea ba ile ba latela Josefa, gomme ba bona lebitla la gona, le ka mo setopo sa Jesu se beilwego ka go lona ka gona. ₅₆Ke moka ba boela gae ba yo lokiša dinoko le dinkgabose tša go tlotša setopo.

Ka tšatši la Sabatha ba se šome, e le gona go phetha molao wa Moshe.