LUKASE 24

₁E rile ka masa a letšatši la Sontaga basadi bale ba ya lebitleng ba swere dinoko tše ba bego ba di lokišitše. ₂Ba hwetša leswika la go tswalela lebitla le kgokološitšwe le tlošitšwe lebitleng, ₃ka gona ba tsena, fela ba se hwetše setopo sela sa Morena Jesu. ₄Ba re ba sa tlabegile, gateetee ba bona banna ba babedi ba eme kgauswi le bona ba apere diaparo tša mabaibai. ₅Ba rile ba sa tšhogile mme ba inametše fase ka difahlego, banna bao ba re go bona: “Yo a phelago le reng le mo nyaka go ba ba hwilego? ₆Mo ga a gona, o tsogile bahung. Gopolang tšela a le boditšego tšona mola a sa le Galilea a re: ₇‘Morwamotho o swanetše go gafelwa diatleng tša batho ba badiradibe, a bapolwe sefapanong, gomme ge go fetile matšatši a mararo a tsoge bahung.’ ”

₈Ke mo ba eletšwego tše Jesu a ilego a di bolela. ₉Ba tloga moo lebitleng, ba yo botša barutiwa ba Jesu ba lesome le o tee le balatedi ba bangwe bohle ditaba tšeo ka moka. ₁₀Basadi bao e be e le Maria Magadalena, le Johana, le Maria, mmagoJakobose, le ba bangwe basadi ba ba bego ba na le bona. Ke bona ba go botša baapostola ditaba tšeo. ₁₁Eupša baapostola ba gopola gore basadi bao ba bolela ditšiebadimo, gomme ba se ba kgolwe. ₁₂Petrose a nanoga a kitimela lebitleng; a fihla a okamela, a se bone selo ge e se mašela ale. Ke moka a boela gae a tlabilwe ke se se diregilego.

₁₃Ka lona tšatši leo balatedi ba Jesu ba babedi ba be ba le leetong la go ya Emause, motse wo o lego dikilometara tše e ka bago tše lesome le metšo ye mebedi go tloga Jerusalema, ₁₄gomme ba boledišana ka tšohle tše di diregilego. ₁₅Ge ba ntše ba bolela ba anegelana bjalo, yena Jesu ka nama a ba batamela, a sepela le bona. ₁₆Ba se mo tsebe ka gobane ba be ba širegile. ₁₇A ba botšiša a re: “Ke ditaba mang tše le tšamago le boledišana ka tšona tše?”

Ba ema, ba bonala ba nyamile. ₁₈Gwa fetola yo mongwe wa bona yo ba rego ke Kleopase a re: “Afa ga se wena mofaladi wa Jerusalema o nnoši yo a sa tsebego tše di diregilego kua ona matšatšing a?”

₁₉Jesu a ba botšiša a re: “Dife?”

Bona ba re: “Tša Jesu wa Nasaretha. Yena e be e le moprofeta yo Modimo le setšhaba ka moka ba bego ba mmona e le yo maatla go tše a di bolelago le tše a di dirago. ₂₀Baprista ba bagolo le a mangwe maloko a Kgorokgolo ya rena ba ile ba mo gafela go ahlolelwa lehu, ba ba ba dira gore a bapolwe sefapanong. ₂₁Rena re be re holofetše gore ke yena a tlago phološa setšhaba sa Israele. Lehono e bile ke tšatši la boraro ditaba tše di diregile. ₂₂Fela re tlabilwe kudu ke basadi ba bangwe ba gaborena; ba tsogile ba ile lebitleng e sa le ka meso, ₂₃gomme ba hwetša setopo sela sa gagwe se se gona. Ba boa ba re botša gore barongwa ba iponagaditše go bona ba ba botša gore o a phela. ₂₄Ba bangwe ba rena ba ile ba ya lebitleng, gomme ba hwetša go le ka mo basadi bale ba boletšego ka gona, fela yena ba se mmone.”

₂₅Ke mo Jesu a rilego go bona: “Aowii, lena! Ga se ka ge le hloka kelelo! Le diega bjang go dumela tšohle tše di boletšwego ke baprofeta! ₂₆Na kgane e be e se tshwanelo gore Mesia a tlaišwe ka dilo tše, a kgone a yo ba letagong la gagwe legodimong?” ₂₇A ba hlalošetša tše di boletšwego ka Mangwalong ohle a Makgethwa mabapi le yena go thoma dipukung tša Moshe le tša baprofeta ka moka.

₂₈Ya re ge ba batamela motsana wo ba bego ba eya go wona, Jesu a dira tše nkego o fetela pele; ₂₉eupša bona ba mo tutuetša ba re: “Lala le rena; tšatši le šetše le diketše, leswiswi le lona le šetše le swara.” Ka gona a tsena le bona gore a dule nabo. ₃₀Ya re ge a le dijong le bona, a tšea senkgwa, a tumiša Modimo, a mo leboga, a se ngwathaganya, a ba fa sona. ₃₁Ke mo ba bulegilego mahlo, ba napa ba mo tseba, eupša yena a timelela ba mo lebeletše. ₃₂Ba šala ba botšišana ba re: “Afa ga se sona se se dirilego gore re ikwe re kukega mola a bolela le rena kua tseleng a re phuthollela Mangwalo a Makgethwa?”

₃₃Ba emelela le semeetseng ba boela Jerusalema, ba hwetša barutiwa bale ba Jesu ba lesome le o tee ba kgobokane le balatedi ba gagwe ba bangwe ₃₄ba re: “Ka nnete Morena o tsogile bahung, o bonwe ke Simone!”

₃₅Ke moka bale ba babedi ba ba anegela tše di ba hlagetšego mo tseleng, le ka mo ba tsebilego Morena ge a ngwathaganya senkgwa.

₃₆Bale ba babedi ba rile ba sa ba anegela, Jesu a be a eme gare ga bona, a ba dumediša a re: “Khutšo a e be le lena!”

₃₇Bona ba tšhoga kudu ba boifa, ba gopola gore ba bona seriti. ₃₈Fela yena a ba botšiša a re: “Le reng le tšhogile le bile le belaela? ₃₉Bonang diatla tša ka le maoto – ke nna ka sebele. Mphopholeng, le tla iponela ka bolena, gobane seriti ga se na nama le marapo bjalo ka nna ge le mpona.”

₄₀Ge a realo a ba bontšha diatla tša gagwe le maoto. ₄₁Ba be ba thabile ba bile ba maketše mo ba ilego ba no se mo dumele; ka gona a ba botšiša a re: “Na ga le na sa go ja mo?” ₄₂Ke ge ba mo fa seripana sa hlapi ye e apeilwego, ₄₃gomme a se tšea a se ja ba mmona.

₄₄Ke moka a re go bona: “Tše ke ilego ka le botša tšona mola ke sa na le lena šedi; tšohle tše di ngwadilwego ka melaong ya Moshe le ka dipukung tša baprofeta le ka dipesalomeng mabapi le nna di swanetše go phethega.”

₄₅Ya ba gona a ba sedimošago ditlhaologanyo gore ba kwešiše Mangwalo a Makgethwa, ₄₆gomme a re go bona: “Go ngwadilwe gwa thwe: Mesia o swanetše go hlokofatšwa le go bolawa, gomme ka morago ga matšatši a mararo a tsoge bahung; ₄₇gwa ba gwa thwe ka taelo ya gagwe ditšhaba tšohle, go thoma Jerusalema, di swanetše go begelwa tshokologo le tshwarelo ya dibe. ₄₈Lena le dihlatse tša ditaba tše ka moka. ₄₉Gomme nna ka noši ke tla le romela se le se holofeditšwego ke Tate. Fela le letele gona mo motseng go fihlela le hlangwa ka maatla a go tšwa legodimong.”

₅₀A ba ntšhetša ka ntle ga motse ba ya Bethania, moo a fihlilego a emiša diatla a ba šegofatša. ₅₁Ya re a ntše a ba šegofatša bjalo, a tloga mo go bona a rotošetšwa legodimong. ₅₂Bona ba mo khunamela, ya ba ba boela Jerusalema ba thabile e le ruri, ₅₃gomme ba dula ba le Tempeleng ba tumiša Modimo.