LUKASE 21

₁Jesu ge a lebelediša, a bona bahumi ba lokela ditšhelete tša bona ka polokelong ya Tempele; ₂a bona le mohlologadi yo mongwe wa modiitšana a lokela dipapetlana tše pedi tše dinyenyane tša mphiri. ₃A re: “Ruri, ke le botša gore mohlologadi yo wa modiitšana o tšhetše tšhelete ye ntši go feta bohle. ₄Gobane ba bangwe ka moka ba tsopotše fela mahumong a bona ba lokela ka polokelong ya Tempele; eupša mosadi yo wa modiidi yena, o tšhetše tšohle tše a bego a tla phela ka tšona.”

₅Ba bangwe ba barutiwa ba Jesu ba rile ba sa bolela ka Tempele gore e thakgilwe bjang ka maswika a mabotse le dikgabišo tšeo di neelwago Modimo, Jesu a re: ₆“Tšohle tše le di bonago tše – nako e etla mohlang go ka se sa šalago leswika le le sa hlatlaganego le le lengwe la se kgerešwe.”

₇Bona ba mmotšiša ba re: “Moruti, dilo tše di tla direga neng? Gomme re tla bona ka eng gore di tlilo direga?”

₈Jesu a ba fetola a re: “Le hlokomele gore le se forwe ke motho, gobane batho ba bantši ba tla tla ba re ba bolelela nna, motho a re: ‘Ke nna Mesia!’ mongwe a re: ‘Nako e fihlile!’ Le se ke la ba šala morago. ₉Le se tšhošwe ke ge le ekwa go bolelwa ka dintwa le meferefere; gobane pelepele go swanetše go hlaga tšona, fela e tla be e se go re mafelelo a batametše.”

₁₀A iša pele a re: “Ditšhaba di tla hlaselana, le mebušo e tla tsogelana maatla. ₁₁Go tla ba le ditšhikinyego tše dikgolo tša lefase, le ditlala, le mauba kua le kua, le dimaka tše di šiišago, le dipšhešamare tše dikgolo leratadimeng. ₁₂Fela pele ga ge tšohle tšeo di hlaga, lena le tla hlomarwa la swarwa; le tla gafelwa baetapele ba disinagoge, la ba la išwa kgolegong. Le tla gafelwa le magoši le babušiši e le ka lebaka la ka. ₁₃Ya ba gona ge le hweditše sebaka sa go ba begela gore le dumela go nna. ₁₄Le fetše le pelo gore le ka se lakalele gore na le tla iphetolela bjang, ₁₅ka gobane ke nna ke tlago le kgontšha go bolela ka bohlale mo manaba ohle a lena a ka se kgonego go le phala ka dipolelo le go le phegiša. ₁₆Le tla ekwa le ke batswadi ba lena, le bana ba bolena, le meloko ya bolena, le bagwera ba lena, gomme ba bangwe ba lena ba tla bolawa. ₁₇Le tla hloiwa ke batho ka moka ka lebaka la ka. ₁₈Eupša bohle le tla bolokega, ešita le meriri yohle ya lena. ₁₉Le kgotlelele, gomme le tla phelela ruri.”

₂₀“Mohla le bona motse wa Jerusalema o dikanetšwa ke madira, le nape le tsebe gore o kgauswi le go pšhatlwa. ₂₁Ke moka bao ba tlago be ba le nageng ya Judea ba tšhabele dithabeng; bao ba tlago be ba le motseng ba tloge, gomme bao ba tlago be ba le nageng ba se ke ba ya motseng. ₂₂Gobane matšatši ao e tla be e le a Modimo a go otla, gore go phethege tšohle tše di bolelwago ke Mangwalo a Makgethwa. ₂₃Ba madimabe mehleng yeo ke bao e tlago be e le baimana le batswetši, gobane naga ye e tla welwa ke masetlapelo a a šiišago, gomme Modimo o tla otla setšhaba se. ₂₄Ba bangwe ba tla bolawa ka tšhoša, bangwe ba thopelwa ditšhabeng di šele, gomme motse wa Jerusalema o tla gatakelwa ke baditšhaba go fihlela pušo ya bona e fela.”

₂₅“Go tla ba le dimaka letšatšing le ngweding le dinaleding. Lefaseng gona ditšhaba di tla tlalelwa tša tšhošwa ke modumo wa lewatle le maphoto a lona. ₂₆Batho ba tla idibatšwa ke go boifa ba lakaleletše tše di tlago hlaga lefaseng, gobane dinaledi tše di lego kua leratadimeng di tla arošwa tseleng ya tšona. ₂₇Ya ba gona batho ba bonago Morwamotho a etla ka leru a na le maatla a magolo le letago le legolo. ₂₈Ge dilo tše di thoma go hlaga, le emelele le inamologe, gobane le tla be le le kgauswi le go phološwa.”

₂₉Jesu a ba anegela seswantšho a re: “Bonang mogo le dihlare tše dingwe ka moka. ₃₀Ge le bona di hloga, le a tseba le lena gore selemo se šetše se le kgauswi. ₃₁Le dilo tšeo ge le bona di direga, le tsebe gore mmušo wa Modimo o kgauswi.

₃₂“Ruri, ke le botša gore tšohle di tla hlaga batho ba ba phelago gonabjale ba sešo ba hwa ka moka. ₃₃Legodimo le lefase di tla fela, eupša tše ke di boletšego tšona e tla no fela e le nnete.”

₃₄“Le itlhokomele! Le se lakwe ke menyakalalo le botagwa le ge e le go balabala ka tša bophelo, gore le se tlo welwa ke Letšatši la Kahlolo, ₃₅go etša sefu. La khukhunetša bohle ba ba phelago lefaseng ka moka. ₃₆Dulang le phakgame le rapela ka mehla gore le tle le kgone go kgotlelela mathata ka moka a a tlago hlaga, le go ema pele ga Morwamotho gore a le sekiše.”

₃₇Jesu o be a hlwa a ruta Tempeleng mosegare, gomme bošego a tšwe motseng a ye go lala Thabeng ya Mehlware. ₃₈Mosong batho ka moka ba be ba tsogela Tempeleng go yo mo kwa.