MARKOSE 13

₁E rile ge Jesu a tloga Tempeleng, yo mongwe wa barutiwa ba gagwe a re go yena: “Moruti, nke o bone gore maswika a a botse bjang le meago ye!”

₂Jesu a mo fetola a re: “Ga ke re meago ye megolo ye o a e bona? Ga go leswika le le tlago šala le hlatlagane le le lengwe mme la se kgerešwe.”

₃Ya re ge a dutše Thabeng ya Mehlware a lebane le Tempele, Petrose le Jakobose le Johanese le Andrease ba tla ba mmotšiša thopeng ba re: ₄“Re botše gore dilo tšeo di tla direga neng, le gore re tla bona ka eng gore nako ya gore tše ka moka di phethege e fihlile.”

₅Jesu a ba fetola a re: “Le hlokomele gore le se forwe ke motho. ₆Gobane ba bantši ba tla tla ba re ba bolelela nna, motho a re: ‘Ke nna Mesia!’ gomme ba fora ba bantši. ₇Ge le ekwa mekgoši ya ntwa le dipego tša ntwa le se ke la tshwenyega, gobane tšeo di swanetše go no hlaga, eupša e tla be e sešo ya ba mafelelo. ₈Ditšhaba di tla hlaselana, le mebušo e tla tsogelana maatla, le go šikinyega ga lefase kua le kua go tla ba gona, le ditlala. Ditlaišo tšeo e tla be e sa le dinyane, dikgolo di sa le morago.

₉“Ge e le lena, le itote, gobane ba tla le iša dikgorong tša tsheko; le tla itiwa le ka disinagogeng. Ka ge le le barutiwa ba ka le tla sekišwa ke babuši le magoši, ya ba gona ge le hweditše sebaka sa go ba begela gore le dumela go nna. ₁₀Taba ye Botse ye e swanetše go begelwa ditšhaba ka moka pele mafelelo a fihla. ₁₁Mohla le swarwa le eya go sekišwa, le se ke la tshwenyega la re re yo bolelang. Ge nako yeo e fihla, le bolele seo le tla bego le se botšwa yona nakong yeo; gobane go tla be go sa bolele lena, go tla be go bolela Moya wo Mokgethwa. ₁₂Motho o tla swariša ngwanabo a mmolaiša, le tatagongwana o tla dira ngwana wa gagwe bjalo. Bana ba tla hlanamela batswadi ba bona, ba ba bolaiša. ₁₃Batho ka moka ba tla le hloya ka lebaka la ka, eupša yo a ka kgotlelelago go fihla mafelelong o tla phologa.

₁₄“Le tla bona ‘Bohlola bjo bo tlontlollago Tempele’ bo eme felo mo bo sego bja swanela.” (Mmadi a a kwešiše gore bohlola bjoo ke eng.) “Ke moka bao ba tlago be ba le nageng ya Judea ba tšhabele dithabeng. ₁₅Yo a tlago be a le godimo ga ngwako, a se ke a ititela ka go fologela ka ngwakong go yo tšea selo. ₁₆Yo a tlago be a le mašemong a se ke a boela go yo tšea seaparo sa gagwe gae. ₁₇Ba madimabe mehleng yeo ke bao e tlago be e le baimana le batswetši. ₁₈Le rapele Modimo gore go tšhaba moo ga lena go se ke gwa ba marega. ₁₉Gobane masetlapelo a matšatši ao e tla ba a a šiišago ao a se a kago a bonwa go tloga mola Modimo a hlolago lefase go fihlela gonabjale, gape a ka se tsogego a bile gona. ₂₀Eupša Modimo o šetše a ikemišeditše go fokotša matšatši ao; ge a ka be a ka se a fokotše, go ka be go ka se phologe motho. Eupša ka lebaka la ba a ba kgethilego o ikemišeditše go a fokotša.

₂₁“Mehleng yeo ge motho a ka re go lena: ‘Bonang Mesia šo!’ goba a re: ‘Bonang, šole!’ le se ke la mo kgolwa. ₂₂BoMesia ba maaka le baprofeta ba maaka ba tla tšwelela; ba tla dira matete le dimakatšo gore, ge go kgonega, ba fore le batho bao Modimo a ba kgethilego. ₂₃Gomme lena le itote; le tsebe gore ke le boditše tšohle pele di direga.

₂₄“Mehleng ya ge masetlapelo ao a fetile, letšatši le tla fifala, ngwedi wa se sa taga, ₂₅dinaledi tše dingwe tša wela fase di etšwa godimo, dingwe tša arošwa tseleng ya tšona. ₂₆Ya ba gona batho ba tlago bona Morwamotho a etla ka maru, a na le maatla a magolo le letago le legolo. ₂₇O tla roma barongwa ba gagwe ka mathokong ka mane a lefase go yo kgobokanya ba a ba kgethilego, ba tlišwa ba etšwa gohle lefaseng.”

₂₈“Swantšhang ka mogo: Ge makala a wona a eba a boleta, a hloga matlakala, le tseba gore selemo se kgauswi. ₂₉Le lena ge le bona tšeo di direga, le tsebe gore nako ya go tla ga Morwamotho e batametše, e kgauswikgauswi. ₃₀Ruri, ke le botša gore dilo tše ka moka di tla hlaga batho ba ba phelago gonabjale ba sešo ba hwa ka moka. ₃₁Legodimo le lefase di tla fela, eupša tše ke di boletšego tšona e tla no fela e le nnete.

₃₂“Ge e le letšatši leo le nako ya gona ga go yo a di tsebago – le barongwa ba legodimong le yena Morwa ga ba di tsebe, di tsebja ke Tatagwe fela. ₃₃Dulang le phafogile, le tsarogile phoka, gobane ga le tsebe gore nako ya gona ke efe. ₃₄Gape go tla ba bjalo ka motho yo e rego ge a eta, a tlogele legae la gagwe le hlokometšwe ke bahlanka ba gagwe, mme a file yo mongwe le yo mongwe modiro wa gagwe, a bile a laetše moletakgoro gore a lete. ₃₅Ka gona, dulang le letile, ka ge le sa tsebe gore monglapa o tla boa neng – e ka ba mantšiboa, goba bošegogare, goba ka masa, goba ge letšatši le hlaba. ₃₆Ge a ka boa ka tšhoganetše, a se ke a le hwetša le robetše. ₃₇Se ke le botšago sona ke se ke se botšago bohle ke re: Dulang le phafogile.”