JOBO 20

₂“Ke fišegela go go fetola;

ke ka lebaka le ke felago pelo.

₃Gape ge o realo o a nthoga,

fela go go fetola go ka se mpalele.

₄“Kgane ga o tsebe gore go tloga kgale,

mola motho a bewa lefaseng,

₅ga go yo kgopo yo a kilego a iketla go ya kae,

le gore lethabo la mohlokamodimo ke la lebakanyana fela?

₆Le ge a ka akalala go fihla leratadimeng,

a kgoma maru ka hlogo,

₇o tla ba a senyega bjalo ka mantle a gagwe.

Ba ba bego ba mo tseba ba tla botšiša gore na o nyameletše kae.

₈O tla timelela bjalo ka toro,

gomme a se sa bonwa ke motho.

O tla nyamelela bjalo ka pono ya bošego.

₉Ba ba bego ba mmona ba ka se sa mmona,

le ba lapa la gagwe ba ka se sa mmona.

₁₀Bana ba gagwe ba tla kgopela go badiidi,

gomme yena o tla lefa lehumo le a le hweditšego ka boradia.

₁₁Maatla ale a gagwe a bosogana a tla ya naye lebitleng.

₁₂“Bobe bo be bo mo tsefela ka ganong,

a bo latswa ka leleme;

₁₃a bile a bo khupa ka molomo,

a bo moma le ka legano.

₁₄Eupša ka mpeng bo a mo fetogela,

bja mo dira tša bohloko bja noga.

₁₅Yo kgopo o tla hlatša tša manoni tše a di meditšego;

ke Modimo yo a tlago mo hlatšiša tšona.

₁₆Se yo kgopo a se meditšego se swana le bohloko bja peetla,

se tla mmolaya bjalo ka ge nke o lomilwe ke noga.

₁₇A ka se sa ipshina ka makhura a mohlware,

goba ka todi le makgahla.

₁₈O tla swanela go bušetša tše a iphilego tšona,

gomme a ka se kgone go ikhola ka tšona,

a ka se ipshine ka lehumo le a le hweditšego ka kgwebo,

₁₉ka gobane o be a gatelela bahloki,

a se na taba le bona,

a bile a ipha dintlo tše di agilwego ke ba bangwe.

₂₀Ka ge e be e le ramegabaru,

mahumo a gagwe a ka se mo hlakodiše.

₂₁Ge a eja o be a sa šadiše,

ka lebaka leo katlego e tla mo felela.

₂₂E tla re a ntše a na le tšohle tše a di nyakago,

a hlagelwa ke mathata,

a welwa ke madimabe a mehutahuta.

₂₃E tla re a sa ja, Modimo a mo otla a mo galefetše.

Kgalefo yeo e tla ba nke ke dijo tše a mo soletšego tšona.

₂₄O tla re ke tšhabela sebetša sa tshipi,

a hlabja ka mosebe wa mphiri,

₂₅wa mo phuleletša santlhoko,

ntlhana ya wona ya go phadima ya tšwelela mokokotlong wa gagwe,

gomme a welwa ke poifo ye kgolo.

₂₆Leswiswi le leso ke se a se beetšwego;

o tla tšhungwa ke mollo wo o sego wa gotšwa ke motho,

wa feleletša tšohle tša ka mokutwaneng wa gagwe.

₂₇Legodimo le tla utolla bokgopo bja gagwe,

gomme lefase la hlatsela ka go mo tšwa.

₂₈Ntlo ya gagwe e tla gogolwa ke lefula ge tšatši la kgalefo ya Modimo le fihla.

₂₉“Se ke se Modimo a se abelago yo kgopo,

ke lona lefa le a mo fago lona.”