JOBO 19

₂“Le tla lesa neng go nkweša bohloko le go ntlhaba ka mantšu?

₃Nako le nako le dula le nthoga,

ga le ne dihlong tša go bolela le nna gampe.

₄Le ge eba ka nnete ke dirile phošo,

seo ga se taba ya lena.

₅Etse le gopola gore le a mphala,

ebile le bona matshwenyego a ka e le bohlatse bja gore ke dirile sebe.

₆Bjale ge, tsebang gore ke Modimo yo a mphošeditšego,

ke yena a nkweditšego molabeng.

₇Le ge ke hlaba mokgoši,

ga ke thušwe ke motho;

le ge ke goelela ke llela toka,

ga go na yo a nkwago.

₈Modimo o nthibetše tsela ka morako gore ke se fete,

tsela tša ka di aparetšwe ke leswiswi.

₉O nkamogile lehumo lohle,

gomme a fediša setumo sa ka.

₁₀O nthobarobile gohle gore ke felelele.

O tumola kholofelo ya ka boka mohlare.

₁₁Modimo o ntukela bogale,

o mpala le manaba a gagwe.

₁₂O romela madira a gagwe go tlo ntlhasela,

ba bopa dintotoma gore ba ntlhasele,

ba hloma mešaša ba a ntikanetša.

₁₃“Modimo o dirile gore batho ba gešo ba ntahle;

ke nna mošele go ba ba bego ba ntseba;

₁₄meloko yešo e ntahlile,

bagwera ba ka ba ntebetše.

₁₅Bale ba bego ba falaletše go nna le badiredi ba ka ba basetsana ba mpona ke le mošele,

ba ntshema motšwantle.

₁₆Ge ke bitša mohlanka ga a arabe,

le ge ke mo rapela gore a ntlhankele.

₁₇Mosadi wa ka o nkgelwa ke moya wa ka,

le lefetla la ka le nkgela banabešo.

₁₈Bana ba banyenyane le bona ba a nnyatša,

gomme ge ke leka go emelela,

ba a nkwera.

₁₉Bagwera ba ka ba bagolo ba a ntšhišingwa;

bale ke bego ke ba rata ba mphuraletše.

₂₀Bolwetši bja ka bo nkotišitše kudu,

go phologa ga ka e bile ka mahlatse.

₂₁“Ntšhokeleng, ntšhokeleng hle, bagwera!

Modimo o nkotlile o šoro.

₂₂Le reng le ntlhomere bjalo ka Modimo?

Kgane ga se la ikgotsofatša ka go nkweša bohloko?

₂₃“Nke nkabe mantšu a ka a ngwalwa ka pukung,

₂₄goba a tlokwa letlapeng ka tshipi,

a tlatšwa ka morodi gore e be a go dulela sa ruri.

₂₅Fela ke a tseba gore mafelelong Modimo o tla nkemelela ge a ahlola lefase.

₂₆Le ka morago ga ge letlalo la ka le llwe ke bolwetši,

ke tla bona Modimo ke sa phela.

₂₇Ke tla iponela yena ka mahlo a ka, gomme yena e ka se be mošele.

Ke mo hlolosetše ka pelo ya ka ka moka.

₂₈“Ge le ka re: ‘A re mo hlomareng,

re mmoneng molato masetlapelong a a gagwe,’

gona le tsebeng gore tšhoša e le emetše.

₂₉Gobane ge Modimo a galefetše modiradibe,

o mmolaya ka tšhoša.

Ka fao tsebang gore moahlodi o gona.”