JESAYA 57

₁Moloki o ikhwela ka pela, gwa se be le yo a elago lehu la gagwe hloko. Batho ba go botegela Modimo ba ithobalela e se nako, gwa se be le yo a di kwešišago. Eupša lehu leo la bona le ba khutšiša masetlapelo a a ka tlago. ₂Bao ba dirago tše di lokilego lehu le ba tlišetša khutšo le boiketlo.

₃Etlang mo le ahlolwe, lena bana ba didupe, ditlogolo tša diotswa le tša difebe. ₄Le kwera mang, lena badiradibe tenang? Le petlela mang melomo le mo ntšhetša maleme, lena bafori tenang? ₅Le khunamela medimo ya tswala ka go robalana meriting ka fase ga mehlašana yeo ya lena le rego ke ye mekgethwa. Le dira dihlabelo ka bana ba lena ka dimphatšeng tša maswika maribeng a dinoka. ₆Le khunamela maswika a boreledi gona moo la re maswika ao ke yona medimo. Le a tšhelela beine la re ke kabelo ya seno, mme la a tlišetša le dikabelo tša bupi. Na le gopola gore tšeo di a nkgahla? ₇Le namelela godimo ga dithaba tše di phagamego go yo robalana le go yo dira dihlabelo. ₈Le bea medimo ya lena ya diswantšho ye e ponokago ka morago ga mabati. Le ala malao, la hlobola la tsena ka dikobong la robalana le bao le ba fago tšhelete gore ba le robale. Go robalana moo le go rata kudu. Ka go dira bjalo le a ntlogela. ₉Le tlola ka setlolo se sentši, la itšhela ka dinkgabose, la nama la yo khunamela Mologo, modimo wa seswantšho. Ge le nyaka medimo ye le kago e khunamela, le roma batseta kgole, ešita le gona bodulabahu. ₁₀Le ge le lapišwa ke go nyaka medimo ye mengwe, ga le lahle. Le re medimo yeo ya lena ye e ponokago e le fa maatla, ka gona le no kgotlelela.

₁₁Morena o re: “Medingwana yeo ke dilo mang mo le kago e šia la e boifa gore le be le mpotše maaka le ntebale? Na le lesitše go mpoifa ka lebaka la ge ke ile ka no ikhomolela nako ye telele? ₁₂Etse le gopola gore tše le di dirago di lokile, fela nna ke tla utolla gore dilo tšeo ke tše mpe, mme medingwana ya lena e ka se kgone go le thuša. ₁₃Ge le lla le nyaka thušo, a medingwana yeo ya lena ye mentši e le thuše! Phefo e tla e phamola, moya wa e tšea! Eupša bao ba botilego nna bona ba tla dula mo nageng ye gomme ba nkhunamela Sione, thabeng ya ka ye kgethwa.”

₁₄Morena o re: “Setšhaba sa ka a se boele go nna! Phulang tsela le e lokiše! Tlošang tše di kago ba šitiša go sepela tseleng!

₁₅“Ke nna Modimo yo mokgethwa yo a lego godimodimo, yo a phelago go ya go ile. Ke dula godimo felo mo gokgethwa, fela le go batho ba ba feletšwego ke kholofelo ba nolegile moko le gona ke a dula, gore ke tle ke ba tsošološe ke ba tiiše. ₁₆Nka se fele ke tšere kgang le setšhaba sa ka goba ka ba galefela sa ruri. Ge nka dira bjalo batho ba ke ba phedišitšego be ba tla hwa. ₁₇Ke be ke ba galefetše ka lebaka la dibe le megabaru ya bona; ka gona ka ba otla ka ba lahla. Eupša bona ba no fela ba kgelogile ba itirela tše ba di ratago.

₁₈“Ke bone tše ba di dirago, fela ke tla ba alafa. Ke tla ba etetša, gomme ba ba llago ka ba homotša. ₁₉Ke dira gore ba nteboge ka ge ke ba phološitše ka moka, ba be le khutšo – ba kgole le ba kgauswi. Ke tla alafa setšhaba sa ka. ₂₀Eupša batho ba babe bona ba swana le lewatle le le bilogago le sa okobale, leo maphoto a lona a kubugago a ntšha tšhila le malele. ₂₁Bakgopo le bona ga ba ne khutšo.” O realo, Morena.