JESAYA 56

₁Morena o re go setšhaba sa gagwe: “Le phethe ditaelo tša ka, le dire tše di lokilego, ka gobane ga ke sa le kgole le go le phološa; kgauswinyana le tla bona gore ke a le hlakodiša. ₂Yo lehlogonolo ke yo ka mehla a hlomphago Sabatha, yo a sa šomego ka letšatši le, le gona a sa kego a dira tše mpe.”

₃Motho o šele yo e bago wa setšhaba sa Morena a se ke a re: “Gape nna Morena a ka se ntumelele gore ke rapele le setšhaba sa gagwe.”

Moamogwabonna a se ke a gopola gore ka ge a sa kgone go ba le bana, a ka se tsoge e bile yo mongwe wa setšhaba sa Modimo. ₄Monna yo mobjalo Morena o re go yena: “Ge o ka hlompha Sabatha, le gona wa dira tše di nkgahlago, wa botega ka go boloka kgwerano ya ka, ₅gona o tla gopolwa nako ye telele ka Tempeleng ya ka le setšhabeng sa ka go feta ge o ka be o bile le barwa le barwedi. O ka se tsoge o lebetšwe.”

₆Le gona Morena o re go batho ba šele bao e bago ba setšhaba sa Modimo, bao ba mo ratago mme ba mo hlankelago, bao ba hlomphago Sabatha mme ba botegago ka go boloka kgwerano ya gagwe: ₇“Ke tla le iša Sione, thabeng ya ka ye kgethwa, ka le thakga ka ntlong ya ka ya thapelo, gomme ka amogela dihlabelo tše le di dirago aletareng ya ka. Tempele ya ka e tla bitšwa ntlo ya thapelo ya batho ba ditšhaba ka moka.”

₈Morena, Mong wa bohle, yo a bušeditšego setšhaba sa gagwe sa Israele gae se etšwa bothopša, o holofeditše gore o tla tliša batho ba ditšhaba tše dingwe ya ba ba sona.

₉Morena o botša manaba a setšhaba sa Israele gore a tle bjalo ka dibata mme a se metše. ₁₀O re: “Baetapele bohle ba ba swanetšego go botša setšhaba sa ka gore kotsi e etla, ba foufetše, ga ba bone kotsi yeo. Ba swana le dimpša tše e lego dimumu tše di sa kgonego go goba – di nogo patlama tša lora. Ga se ka go rata boroko! ₁₁Ba swana le dimpša tše di sa kego di khora. Baetapele ba ba hloka kwešišo. Yo mongwe le yo mongwe wa bona o dira se a se ratago, gomme o nyaka fela go ikhola. ₁₂Ditagwa tše di re: ‘A re yeng re yo tšea beine, re tle re nweng le bjala bjo bogale ka moo re ratago ka gona. La gosasa e tla ba letšatši le legolo kudu go swana le la lehono.’ ”