JESAYA 42

“Bonang mohlanka wa ka yo ke mo tiišago,

mokgethiwa wa ka yo a nkgahlago.

Ke mo tladitše moya wa ka,

gomme o tla begela ditšhaba maikemišetšo a ka.

₂A ka se hlabe lešata goba a hlaboša lentšu,

a ka se bolelele godimo mekgotheng.

₃Lehlaka le le thokgegilego a ka se le robele sa ruri,

goba a tima lebone le le tukago gannyane.

O tla tliša toka ya go ya go ile.

₄A ka se lape goba a nolega moko,

go fihlela a hlomile toka lefaseng.

Dinaga tša kgole di letetše go rutwa ke yena.”

₅Modimo o hlodile magodimo mme a a phurolla;

o adile lefase le tšohle tše di metšego go lona;

o fa batho ba ba lego go lona bophelo,

o phediša badudi ba lona.

Bjale Morena yo a hlodilego dilo tše o re go mohlanka wa gagwe:

₆“Nna, Morena, ke go biditše go ya ka toka,

ka go fa maatla,

ka go šireletša.

Ka wena ke tla dira kgwerano le ditšhaba,

ka tlišetša batho seetša.

₇O tla budulla difofu mahlo,

wa lokolla dibofša dikgolegong tša leswiswi.

₈“Ke nna fela ke lego Morena Modimo wa gago.

Ga go modingwana yo mongwe yo nkago mo fa letago la ka;

le go tumišwa ga ka nka se go fe medimo ya diswantšho.

₉Tše ke boletšego pele gore di tla hlaga,

šedi di phethegile.

Bjale ke tla le botša tše difsa le pele di thoma go direga.”

₁₀Opelelang Morena kopelo ye mpsha;

mo tumišeng, lena bohle ba lefase!

Mo reteng, lena le sepelago ka maselawatle,

le lena dibopiwa tšohle tša lewatle.

Mo opeleleng, lena dinaga tša kgole,

le lena badudi ba tšona!

₁₁Leganata le metse ya lona a di goe;

batho ba metsana ya Kedara a ba mo rete!

Ba ba dulago motseng wa Sela a ba goe ka lethabo godimo ga dithaba!

₁₂Ba ba dulago nageng tša kgole a ba rete Morena ba mo tumiše!

₁₃Morena o yo lwa bjalo ka mohlabani;

o fišegela go lwa bjalo ka mogale.

O a goa,

o hlaba mokgoši wa ntwa;

o fadišetša manaba a gagwe maatla.

“Ke kgale ke ikhomoletše,

ke kgokile pelo,

ke rile tuu.

Eupša bjale ke tla goa,

ka šutša ka hemelana go swana le mosadi ge a belega.

₁₅Ke tla phušola dithaba le meboto,

ka omeletša dimela.

Ke tla gopiša dinoka,

ka pšheša megobe.

₁₆“Ke tla hlahla difofu tša ka ditseleng tše ba sa di tsebego,

ka ba sepediša mebileng ye ba sego ba ka ba sepela go yona.

Ke tla fetoša leswiswi le ba lego go lona seetša,

gomme ka ba lekaneletša naga ya makukuno.

Tšeo ke tše ke le holofetšago tšona,

gomme ke tla di phetha.

₁₇Ba ba botilego diswantšho tše di betlilwego,

ba rego diswantšho tše di bopilwego ke medimo ya bona,

ba tla lewa ke dihlong,

ba inamiša dihlogo.”

“Theeletšang,

lena le sa ratego go kwa.

Lebelelang gabotse,

lena le sa nyakego go bona.

₁₉Na go na le yo a foufetšego go feta mohlanka wa ka,

goba yo e lego setholo go feta motseta wa ka?

Ga go yo a foufetšego bjalo ka mogwera wa ka,

goba yo a sa bonego boka mohlanka wa ka.

₂₀Lena Baisraele le bone dilo tše ntši,

fela ga se la ithuta selo ka tšona.

Tsebe tša lena di bulegile, eupša ga le kwe.”

₂₁Ka ge Morena a lokile,

o fišegela gore setšhaba sa gagwe se hlomphe dithuto tša gagwe se di tšeele godimo.

₂₂Eupša bjale setšhaba sa gagwe se hutšwe,

se thopetšwe;

ba tlemilwe ka meleteng,

ba utilwe le ka dikgolegong.

Ba ile ba hlakolwa ba hulwa,

eupša ba hloka mohlakodiši.

₂₃Ke mang gare ga lena yo a tlago theeletša taba tše?

Ke mang yo a tlago theeletša gabotse go tloga lehono?

₂₄Ke mang yo a gafetšego Baisraele go bahlakodi,

ditlogolo tša Jakobo go bathopedi?

A ga se Morena ka boyena yo re mo senyeditšego?

Re be re sa rate go phela ka moo a bego a nyaka ka gona,

le gona re sa phethe ditaelo tša gagwe.

₂₅Ka gona o ile a re otla o šoro,

a re tlaiša ka ntwa.

Kgalefo ya gagwe e be e tuka bjalo ka mollo,

e aparetše setšhaba sa Israele ka moka,

eupša rena ra se tsebe se se diregago,

ra se ithute selo tabeng tšeo.