JESAYA 41

“Homolang le theeletše,

lena dinaga tša kgole!

Itokišetšeng go bega taba ya lena kgorong ya tsheko;

batamelang, le tla fiwa sebaka sa go bolela.

A re yeng kgorong mmogo.

₂“Ke mang wa go hlohleletša mofenyi wa bohlabela

yo a fenyago gohle mo a yago gona?

Ke mang yo a gafelago ditšhaba go yena,

a dirago gore a gatakele magoši?

Ka tšhoša ya gagwe o ba fetoša lerole.

Mesebe ya gagwe e ba phatlalatša bjalo ka mooko ge o tšewa ke phefo.

₃O a ba hlomara a ba bolaya,

a fetela pele a se a gobatšwa,

a tšea ka ditsela tše a bego a sa di tsebe.

₄Ke mang yo a dirilego gore tše di hlage?

Ke mang yo a hlodilego ditšhaba kgale?

Ke nna, Morena –

ke nna Mathomo,

ebile ke nna Mafelelo.

₅“Batho ba dinaga tša kgole ba bone tše ke di dirilego;

ba a boifa mme ba a thothomela.

Ka gona ba a kgobokana,

ba a tla.

₆Ba tutuetšana seng sa bona ba re:

‘Tiang maatla!’

₇Morulatshipi o tiiša morulagauta maatla.

Yo a kgolokago modimo wa seswantšho ka noto o tutuetša yo a dirago dikokotela.

O re: ‘Se se lomagantšwego se ke se sebotse.’

Ke moka ba o kokotela madulong a wona gore o se ke wa wa.

₈“Eupša lena Baisraele, bahlanka ba ka,

bana ba Jakobo,

ke lena setšhaba se ke se kgethilego,

ditlogolo tša Abrahama, mogwera wa ka.

₉Ke le tšere magomong a lefase,

ke le biditše le le dikhutlong tša kgolekgole,

ka re go lena:

‘Le bahlanka ba ka.’

Ga se ka le nyatša,

eupša ke le kgethile.

₁₀Le se ke la boifa –

ke na le lena!

Le se ke la lealea –

ke nna Modimo wa lena!

Ke a le tiiša, ke a le thuša,

ke a le šireletša,

ke le hlakodiša ka maatla a ka.

₁₁“Ba ba le galefetšego ba tla gobošwa ba lewa ke dihlong,

ba fetoga lefeela.

Ba ba lwago le lena ba tla hwa.

₁₂Ge le ba nyaka le ka se ba bone,

ka gore ba tla be ba ile.

Manaba a lena a tla fela.

₁₃Gobane nna,

Morena Modimo wa lena,

ke a le tiiša,

ke le hlahla ka letsogo ke re:

‘Se boifeng, ke a le thuša.’ ”

“Le se ke la boifa,

lena setšhabana se se fokolago sa Israele,

ke a le thuša.

Nna, Modimo yo mokgethwa wa Israele,

ke Mohlakodiši wa lena.

₁₅Ke tla dira gore le be bjalo ka selei se sefsa sa bogale sa go fola.

Ka sona le tla fola dithaba

la di šilaganya,

meboto la e fetoša mooko.

₁₆Le tla di fefera,

tša tšewa ke phefo,

tša gašanywa ke ledimo.

Eupša lena le tla goa ka lethabo, ka gobane nna ke Modimo wa lena.

Le tla ikgantšha ka nna,

Modimo yo mokgethwa wa Israele.

₁₇“Setšhaba sa ka se a hlaka, se a diila,

se nyaka meetse eupša ga a gona;

ba omile megolo ka lenyora.

Nna, Morena, ke tla ba fa tše ba di kgopelago.

Nna, Modimo wa Israele,

nka se ba lahle.

₁₈Ke tla phula dinoka mebotong ye e sa melego selo,

le methopo melaleng.

Ke tla fetoša leganata megobe,

mme naga ye e omilego ya ba methopo ya meetse.

₁₉Ke tla mediša mesedere leganateng,

le megohlo le memirte le mehlware.

Ke tla bjala mehlare ye mentši nageng ye e omilego –

mephaene ya mehutahuta le mesaeprese.

₂₀Ke tla dira dilo tše gore batho ba di bone ba di tsebe mme ba gopodišiše gore di dirilwe ke nna, Morena.

Ba tla kwešiša gore Modimo yo mokgethwa wa Israele ke yena a dirilego dilo tše.”

“Lena medimo ya baditšhaba,

hlalošetšang kgoro taba ya lena;

e botšeng mabaka a lena!

₂₂Batamelang le re botše tše di sa tlago,

tše di tlago hlaga ka moso,

gore mola di direga re tle re di tsebe.

Hlalošetšang kgoro ditiragalo tše di fetilego,

le re botše gore di šupa eng.

₂₃Re botšeng gore ka moso go tla hlaga eng –

ke gona re tlago tseba gore ke lena medimo!

Dirang se sengwenyana se sebotse goba se sebe;

ke gona re tlago tšhoga ra taditetša mahlo!

₂₄Lena ga le selo,

tše le di dirago le tšona ke lefeela,

le barapedi ba lena ba a šišimiša!

₂₅“Ke biditše monna wa bohlabela ka leina;

ke mo hlohleleditše gore a hlasele a etšwa ka leboa.

O gatakela babuši a ba swantšha le leraga,

go swana le mmopi ge a duba letsopa.

₂₆Ke mang gare ga lena yo a kilego a bolela taba ye ra e tseba e se tla,

ra tla ra re o nepile?

Ga go le o tee wa lena yo a kilego a e bolela;

ga go motho le o tee yo a kilego a kwa le bolela taba ye!

₂₇Nna, Morena, ke bile wa mathomo

wa go e begela batho ba Sione;

ke romile motseta Jerusalema gore a re:

‘Bonang! Batho ba gabolena ba etla!’

₂₈Ge ke iša mahlo go medimo,

gwa se be le o tee wa go re selo;

gwa se be le o tee wa go nkaraba ge ke botšiša.

₂₉Medimo ye ka moka ga yona ke lefeela;

ga e kgone go dira selo le gatee –

medimo ye ya diswantšho ga se selo,

ga e ne maatla le gannyane.”