GENESE 35

₁Modimo a re go Jakobo: “Itokiše o ye Bethele o yo dula fao. Moo o age aletare, o e agele Modimo yo a iponagaditšego go wena ge o be o tšhabela ngwaneno Esau.”

₂Ka gona Jakobo a re go ba lapa la gagwe le go bohle ba ba bego ba na le yena: “Lahlang medimo e šele ye le nago le yona; itlhwekišeng, gomme le apare diaparo tše di hlwekilego. ₃Re tlile go tloga mo ra ya Bethele, moo ke tlago aga aletare, ka e agela Modimo yo a nthušitšego ka nako ya matshwenyego a ka, a ba a ba le nna gohle mo ke ilego ka ya.” ₄Ka fao ba neela Jakobo medimo e šele ka moka ye ba bego ba na le yona, gotee le mangina a ba bego ba a rwele. A di epela ka fase ga mohlare wa moeike wo o bego o le kgauswi le Shekeme.

₅Ge Jakobo le barwa ba gagwe ba tloga, Modimo o ile a tšhoša batho ba metse ya kgauswi, mme ba se ke ba ba hlomara. ₆Jakobo a fihla le batho ba gagwe ka moka Luse, yeo bjale e tsebjago ka la Bethele, nageng ya Kanana. ₇A aga aletare gona, mme a reela felo fao leina la Modimo wa Bethele, ka gobane Modimo o iponaditše go yena fao ge a be a tšhabela mogolwagwe. ₈Mofepi wa Rebeka, Debora, a hwa gomme a bolokwa ka fase ga moeike ka tlase ga Bethele. Ka gona gwa rewa leina la “Moeike wa Sello”.

₉Ge Jakobo a boa Mesopotamia, Modimo o ile a iponatša go yena gape, gomme a mo šegofatša. ₁₀A re go yena: “Leina la gago o Jakobo, fela go tloga bjale o tla ba Israele.” Ka gona Modimo a mo rea leina la Israele. ₁₁A re go yena: “Ke nna Modimo Ramaatlaohle. O atelwe ke thari. Ditšhaba di tla tšwa go wena, mme o tla ba rakgolokhukhu wa magoši. ₁₂Ke tla go fa naga ye ke e filego Abrahama le Isaka, ke tla e neela le ditlogolo tša gago ge o seno hlokafala.” ₁₃Modimo a napa a tloga go yena. ₁₄Jakobo a hloma letlapa la segopotšo gona fao Modimo a boletšego naye, gomme a tšhela beine le makhura a mohlware godimo ga lona. ₁₅A rea felo fao leina la Bethele.

₁₆Jakobo le lapa la gagwe ba tloga Bethele, gomme ya re ba sa le kgojana le Efrata, mabaka a fihla a gore Ragele a belege, mme a swarwa ke lešoko le bohlokohloko. ₁₇Ge lešoko la gagwe le gaketše, mmelegiši a re go yena: “O se ke wa boifa; ke mošemanyana yo mongwe gape.” ₁₈Fela Ragele o be a ehwa, mme ge moya o etšwa nameng, a rea morwa wa gagwe leina la Benoni, eupša tatagomošemanyana a mo rea leina la Benjamene.

₁₉Ragele a hlokafala, mme a bolokwa ka thoko ga tsela ya go ya Efrata, motse wo bjale o tsebjago ka la Betlelehema. ₂₀Jakobo a hloma letlapa la segopotšo moo, gomme le lehono letlapa leo le sa šupa lebitla la Ragele. ₂₁Jakobo a fetela pele gomme a hloma mešaša ya gagwe ka thoko yela ya tora ya Edere.

₂₂Ge Jakobo a sa dula nageng yeo, Rubene o ile a robala le Bilha, yo mongwe wa metlabo ya tatagwe. Ge Jakobo a ekwa taba yeo a selekega kudu.

Jakobo o be a na le barwa ba lesome le metšo ye mebedi. ₂₃Barwa ba Lea e be e le Rubene, leitšibolo la Jakobo, Simeone, Lefi, Juda, Isakara le Sebulone. ₂₄Barwa ba Ragele e be e le Josefa le Benjamene. ₂₅Barwa ba Bilha, lekgoba la Ragele, e be e le Dane le Naftali. ₂₆Barwa ba Silpa, lekgoba la Lea, e be e le Gade le Asere. Barwa ba ba belegwe Mesopotamia.

₂₇Jakobo a tla go Isaka, tatagwe, kua Mamre, kgauswi le Kiriate-Arba, e lego Hebrone, moo Abrahama le Isaka ba bego ba falaletše gona. ₂₈Isaka o phetše a ba le mengwaga ye lekgolo le masome a seswai. ₂₉O hlokafetše a tšofetše kudu, gomme barwa ba gagwe, Esau le Jakobo, ba mmoloka.