GENESE 34

₁Ka letšatši le lengwe Dina, morwedi wa Jakobo le Lea, o ile a etela basadi ba Bakanana. ₂Ge Shekeme, morwa wa Hamore, Mohibe, yo e bego e le kgoši ya selete seo, a mmona, a mo tšea a yo mo kata. ₃Fela mosetsana o be a kgahla Shekeme, gomme Shekeme a mo rata mme a leka go thopa pelo ya gagwe. ₄A botša tatagwe a re: “Nnyalele mosetsana yo.”

₅Jakobo a kwa gore morwedi wa gagwe o gobošitšwe, fela ka gore barwa ba gagwe ba be ba le nageng le dikgomo tša gagwe, a se ke a dira selo go fihlela ba boa. ₆Hamore, tatagoShekeme, a tloga a yo bolela le Jakobo ₇ka nako ye barwa ba Jakobo ba goroga ba etšwa nageng. Ge ba ekwa taba yeo ba selekega ba befelwa kudu, ka ge Shekeme a dirile taba ya dihlong setšhabeng sa Israele ka go robala le morwedi wa Jakobo, a dirile taba ye e sa dirwego. ₈Hamore a re go bona: “Morwa wa ka, Shekeme, o rata morwedi wa lena; hle, ke a le kgopela, a a mo nyale. ₉Nke re nyalelaneng – le re neele barwedi ba lena, le rena re le neele barwedi ba rena. ₁₀Ke gona le tlago dula le rena mo nageng ya rena; le ka dula mo gongwe le mo gongwe moo le go ratago, la sepela le lokologile la ikhweletša ya lena naga.”

₁₁Ke moo Shekeme a itšego go tatagoDina le dikgaetšedi tša Dina: “Ntumeleleng ke mo nyale, gomme ke tla le fa se sengwe le se sengwe se le se nyakago. ₁₂Le ka rotoša magadi ka moo le ratago ka gona, ke tla le fa se le se nyakago ge eba le tla mpha yena ya ba mosadi wa ka.”

₁₃Barwa ba Jakobo ba fetola Shekeme le Hamore, tatagwe, ka go ba radia, ka gobane Shekeme a be a gobošitše kgaetšedi ya bona, Dina. ₁₄Ba re go yena: “Re ka se dumelele gore kgaetšedi ya rena e nyalwe ke monna yo a sego a bolla; seo e ka ba kgobogo go rena. ₁₅Re ka dumela taba yeo ge fela lena le ka swana le rena ka go bolotša banna ba lena ka moka. ₁₆Ke mo re kago kwana, ra nyalelana. Re tla dula gare ga lena, ra ba setšhaba se tee le lena. ₁₇Eupša ge le sa kwane le se re se nyakago la bolotšwa, re tla tšea Dina ra tloga.”

₁₈Hamore le Shekeme, morwa wa gagwe, ba kgahlwa ke polelo ya banna bao, ₁₉gomme lesogana leo la se hlwe le diega go dira seo se kgopelwago, ka gore o be a rata morwedi wa Jakobo. E be e le yena yo mogolo ka lapeng labo.

₂₀Hamore le Shekeme, morwa wa gagwe, ba ya kgorong ya motse, ba bolela le banna ba gabobona ba re: ₂₁“Batho ba ga ba tshwenye; a re ba leseng ba dule mo nageng ye le rena, ba sepele ba lokologile. Naga ye ke ye kgolo mme le bona ba ka dula mo. A re nyaleng barwedi ba bona, gomme le bona ba nyale ba rena. ₂₂Batho ba ba dumela go dula gare ga rena le go ba setšhaba se tee le rena, ge fela re ka phetha lebaka la gore re bolotše banna ba rena ka moka, bjalo ka ge bona ba bolotše. ₂₃A ke re diruiwa tša bona ka moka le tšohle tše e lego tša bona e tla ba tša rena? Ka gona a re dumeleng gore ba dule le rena.” ₂₄Badudi ka moka ba motse ba kwana le seo Hamore le Shekeme ba se bolelago, gomme banna ka moka ba bolotšwa.

₂₅Ka morago ga matšatši a mararo ge banna ba sa babelwa ke dintho, barwa ba Jakobo ba babedi, Simeone le Lefi, dikgaetšedi tša Dina, ba tšea ditšhoša tša bona, ba tsena motseng ba sa gopolelwe selo, ba bolaya banna ka moka. ₂₆Ba bolaya le Hamore le Shekeme, morwa wa gagwe, ba tšea Dina ngwakong wa Shekeme, mme ba tloga. ₂₇Ka morago ga polao yeo barwa ba bangwe ba Jakobo ba thopela motse go lefeletša kgobošo ya kgaetšedi ya bona. ₂₈Ba tšea dihuswane, dikgomo, dipokolo le se sengwe le se sengwe motseng le mašemong. ₂₉Ba tšea dithoto tša bona ka moka, ba thopa basadi le bana ka moka, ba tšea le tšohle ka mengwakong.

₃₀Jakobo a re go Simeone le Lefi: “Le ntsentše bothateng; bjale Bakanana le Baperise le yo mongwe le yo mongwe mo nageng o tlilo ntlhoya. Ga ke ne banna ba bantši; ge ba ka ntirela seboka mme ba ntlhasela, nna le lapa la ka re tla fedišwa.”

₃₁Bona ba mo fetola ba re: “O ra gore re ka lesa kgaetšedi ya rena e swarwa bjalo ka sefebe?”