DOITERONOMIO 18

₁“Kgoro ya boprista ya Lefi e se ke ya fiwa karolo ya naga bjalo ka Baisraele ba bangwe. Ba swanetše go phela ka dikabelo le dihlabelo tše dingwe tše di fiwago Morena. ₂Ba se ke ba ba le naga bjalo ka dikgoro tše dingwe; sa bona ke go ba baprista ba Morena, ka moo Morena a ba tshephišitšego ka gona.

₃“Ge motho a dira sehlabelo ka poo, goba ka kwanyana, goba ka putšane, baprista ba fiwe legetla, le mehlagare ya ka fase, le mogodu. ₄Ba fiwe karolo ya mathomo ya mabele, ya beine, ya makhura a mohlware, le ya boya bja nku. ₅Dikgorong tša lena ka moka Morena o kgethile kgoro ya Lefi gore yona le ditlogolo tša yona di mo hlankele e le baprista go ya go ile.

₆“Molefi yo mongwe le yo mongwe ge a rata a ka tloga motseng wa gabo mo nageng ya Israele a tla felo ga tirelo, ₇gomme a direla moo e le moprista wa Morena Modimo wa gagwe, go swana le Balefi ba ba direlago moo. ₈O swanetše go fiwa dijo tše di lekanago le tša bapristakayena, go sa lebelelwe bontši bja bohwa bja gagwe.”

₉“Ge le gorogile nageng ye Morena Modimo wa lena a le fago yona, le se ke la latela mekgwa ya bohlola ya ditšhaba tše di lego fao. ₁₀Go se be le yo a dirago sehlabelo ka morwagwe goba morwediagwe mollong, goba yo a dirišago ditaola, goba bodupe, goba bonoge, goba boloi, ₁₁goba meupo, goba malopo, goba wa badimo. ₁₂Morena Modimo wa lena o hloile batho ba ba dirago dilo tše tša bohlola, mme ke ka lebaka leo a lelekago ditšhaba tšeo nageng yeo ge le goroga. ₁₃Le botegeleng Morena Modimo wa lena ka dipelo tša lena ka moka.”

₁₄“Ditšhaba tše le tlago di raka nageng ya tšona di latela dikeletšo tša didupe le bao ba dirišago ditaola, eupša lena Morena Modimo wa lena ga a le dumelele go dira tše bjalo. ₁₅Lena, o tla le romela moprofeta yo a swanago le nna a etšwa setšhabeng sa gabolena, mme yena le swanetše go mo theeletša.

₁₆“Mohlang wola le bokane thabeng ya Sinai le ile la kgopela gore ga le sa nyaka go kwa Morena a bolela, goba go hlwa go sa bona mollo wo mogolo woo, ka gobane le be le boifa gore le tla hwa. ₁₇Ka gona Morena a re go nna: ‘Se ba se kgopetšego ke se sebotse. ₁₈Ke tla ba romela moprofeta yo a swanago le wena a etšwa setšhabeng sa gabobona. Ke tla mmotša se a swanetšego go se bolela, mme o tla ba botša tšohle tše ke ba laelago tšona. ₁₉O tla bolela ka leina la ka, mme ke tla otla yo mongwe le yo mongwe yo a ganago go mo theetša. ₂₀Eupša ge moprofeta yo mongwe a ka ba le sebete sa go bolela se sengwe ka leina la ka mola ke se ka mo laela go se bolela, a bolaelwe taba yeo, mme ka wona mokgwa woo moprofeta yo mongwe le yo mongwe yo a bolelago se sengwe ka leina la medimo ye mengwe, le yena a bolawe.’

₂₁“Le ka ipotšiša gore le tla tseba bjang ge eba molaetša wa moprofeta ga o tšwe go Morena. ₂₂Ge moprofeta a bolela se sengwe ka leina la Morena mme se a se bolelago sa se ke sa direga, gona ga se molaetša wa Morena. Moprofeta yoo o boletše ka boyena, gomme ga le a swanela go mo tšhaba.”