DOITERONOMIO 17

₁“Le se ke la direla Morena Modimo wa lena sehlabelo ka poo goba ka kwanyana goba ka putšane ye e nago le bosodi bjo bongwenyana; seo e ka ba makgapha go Morena.

₂“Ge le ka kwa gore motseng wo mongwe wa lena monna yo mongwe goba mosadi o dirile sebe pele ga Morena ka go tshela kgwerano ya gagwe ₃ka go khunamela medimo ye mengwe, goba letšatši, goba ngwedi, goba dinaledi, a di direla, a fapana le taelo ya Morena, ₄ge le ka kwa taba ya mohuta woo, le e nyakišišeng gabotsebotse. Ge eba ke therešo gore makgapha a mohuta woo a dirilwe mo nageng ya Israele, ₅gona le tšee motho yoo le mo ntšhetše ka ntle ga motse mme le mmolaye ka maswika. ₆Eupša motho a bolawe fela ka bohlatse bja dihlatse tše pedi goba tše tharo; a se ke a bolawa ka bohlatse bja hlatse e tee fela. ₇Go thome dihlatse go mo kgatla, mme setšhaba ka moka se latele se mo kgatle. Ka tsela ye le ikhutše bobe bjoo.

₈“Ge go ka direga gore melato ye mengwe e be ya go palela baahlodi ba motse, bjalo ka melato ye e fapafapanego ya polao, goba ya ditokelo tša motho, goba ya kgobatšo, le yeng felo ga tirelo, ₉le fihle le botše baprista ba Balefi le moahlodi yo a lego modirong molato wa lena, mme bona ba ahlole molato woo. ₁₀Ba tla ahlola ka mo ba bonago ka gona, mme le dire ka moo ba le botšago ka gona. ₁₁Le amogeleng kahlolo ya bona mme le phetheng ditaelo tša bona gabotsebotse. ₁₂Yo a ka ngangabalago a se theeletše moahlodi goba moprista yo a lego modirong, a bolawe. E be go fediša bobe bjo mo go Baisraele. ₁₃Ke mo yo mongwe le yo mongwe a tlago kwa ka taba yeo mme a boifa, gwa se be le be le yo a ngangabalelago go dira taba ya mohuta woo.”

₁₄“Ge le tšere naga ye Morena Modimo wa lena a tlago le fa yona gomme le dutše go yona, le ka nyaka go ba le kgoši bjalo ka ditšhaba ka moka tše di bapilego le lena. ₁₅Le hlokomeleng gore monna yo le mmeago kgoši ke yena yo Morena a mo kgethilego. E swanetše go ba yo mongwe wa setšhaba sa gabolena; le se ke la bea mofaladi kgoši. ₁₆Kgoši a se ke a ba le dipere tše ntši, goba a roma batho Egepeta go yo reka dipere tša go oketša tše a nago natšo, ka gobane Morena o itše setšhaba sa gagwe se se ke sa tsoga se boetše fao. ₁₇Kgoši a se be le basadi ba bantši, gore a se aroge go Morena; le gona a se ke a ikhumiša ka silibera le gauta. ₁₈Ge e šetše e le kgoši a ingwalollele puku ya melao ya Modimo le ditaelo tša gagwe tše di ngwalolotšwego pukung ya mathomo ye e swerwego ke baprista ba Balefi. ₁₉A sware puku yeo, a e bale ka mehla bophelo bja gagwe ka moka, gore a tle a ithute go boifa Morena le go phetha ka potego tšohle tše di ngwadilwego ka go yona. ₂₀Seo se tla mo dira gore a se ke a ikgopola gore o phala Baisraele ba gabo, le gore a se ke a tshela le e tee ya ditaelo tša Morena. Ke moo yena le ditlogolo tša gagwe ba tlago buša naga ya Israele nako ye telele.”